¹ Ada urang Farisi namanya Nikodemus. Inya nan pamimpin bangsa Yahudi. ² Disuatu malam, inya datang ka Yesus dahan bapanir, "Rabi, kami tahu ma kalau Duan nan Guru nya datang dari Allah obai ntah ada siku urang pan nya dapat malabuhan bala tana ajaib uba nya Duan labuhan nan, kacuali Allah ada sasama agan inya." ³ Jawab Yesus ka inya, "Sabonar-bonarnya Aku bapanir ka kolai, Amun siku urang ntah babalik dilahiran, inya ntah dapat maniat karajaan Allah." ⁴ Nikodemus batanya, "Uba apa mungkin urang dapat babalik dilahiran amun inya jadi tuha am? Dapat bi inya mansuk lagi ka dalam rahim umanya dahan babalik dilahiran?" ⁵ Jawab Yesus ka inya, Sabonarnya, Aku bakata ka kolai, amun urang ntah dilahiran dari arai arai dahan Roh, inya ntah dapat mansuk ka dalam karajaan Allah. ⁶ Apa nya dilahiran dari daging inyanan daging, dahan apa nya dilahiran dari Roh inyanam Roh. ⁷ Jangan heran ma obai kataKu agan kolai, 'Kolai harus babalik dilahiran.' ⁸ Angin batiup kamuna ja inya honak dahan kolai mandinga bunyinya, tapi kalau ntah kolai tahu dari muna asalnya dahan kamuna inya pacaan hingkas. Uba inyan jam agan satiap urang nya dilahiran dari Roh." ⁹ Nikodemus batanya, "Uba apa mungkin samua jolu ini bakajadian?" ¹⁰ Yesus manjawab, "Mongka kolai ni guru urang Israel, tapi kolai ntah mangerti bala jolu ini? ¹¹ Sabonarnya, Aku mangataan ka kolai kalau kami bapanir mangonaai apa nya kami katahuai dahan mambori kasaksian mangonaai apa nya kami tiat, tapi kolai ntah manarima kasaksian kami. ¹² Amun Aku mambori tahu kolai mangonaai bala jolu duniawi ja kolai ntah percaya, uba apa mungkin kolai pacaan percaya amun Aku mamborotahu kolai mangonaai bala jolu surgawi? ¹³ Ntah siku urang pan kala naik ka surga, kacuali Inya nya jadi turut tam dari surga, inyaam Anak Mansia. ¹⁴ Sama uba Musa manaikan ular tamaga di hutan, uba inyan jam Anak Mansia harus ditingian, ¹⁵ Supaya satiap urang nya percaya agan Inya mandapatan hidup kekal. ¹⁶ Karna Allah sangat mangasihai dunia ini, Inya mangonyu Anak TungalNya akai satiap urang nya percaya agan Inya tidak banasa, tapi bulih hidup nya kekal. ¹⁷ Karna Allah mautus AnakNya ka dunia bilanya akai mahakipai dunia, tapi supaya dunia disalamatan malaluai AnakNya. ¹⁸ Urang nya percaya agan Inya tidak akan dihukum, tapi urang nya ntah percaya jadi jadi di babah hukupan obai inya ntah percaya agan nama Anak Tungal Allah. V 19Iniam hukupan inyan: Torang jadi datakam ka dalam dunia, tapi mansia lobih rinang agan kagolapan daripada torang obai apa nya sia labuhan nan jahai. ²⁰ Obai satiap urang nya babuat jahai mambonci torang dahan ntah mantakai torang inyan akai bala kalakuannya ntah diungkit-ungkit. ²¹ Tapi, urang nya malakuan kabonaran manatakai torang inyan supaya dinyataan perbuatan-perbuatannya inyan dilabuhan dalam Allah." ²² Jadi inyan, Yesus agan bala muridNya hingkas ka tanah Yudea. Di nuhun, Inya mahabisan waktu agan siaan dahan mambaptis. ²³ Yohanes pan mambaptis di Ainon damping Salim obai ada banyak arai di nuhunan. Bala urang badatakan dahan dibaptis. ²⁴ Waktu inyan, Yohanes bolum dimansukan ka panjara. ²⁵ Lalu, timulam perdebatan antara babaropa murid Yohanes agan salah siku urang Yahudi mangonaai panyucian. ²⁶ Sia manomuai Yohanes dahan bapanir, "Guru,urang nya agan duan di saborang Yordan nan, nya duan basaksi mangonai Inya, tiat am, Inya pan mambaptis dahan samua urang datang ka Inya." ²⁷ Yohanes manjawab, "Mansia ntah dapat manrima apa pan, kacuali jolu inyan dikonyu ka inya dari surga. ²⁸ Hunin siku dapat mambori kasaksian bahawa aku kala bapanir, 'Aku bilanya Mesias,' tapi aku diutus akan mandaholuaiNya. ²⁹ Urang nya umpu panganten batina nan inyaam panganten lalaki; tapi kawal panganten lalaki, nya badiri dahan mandingaannya, maha bahagia mandinga suara panganten lalaki. ³⁰ Inya harus makin bosar dahan aku harus makin kocit." ³¹ "Inya nya datang dari pucu nan inyanam nya di pucu dari samuanya, Inya baasal dari bumi dahan bapanir mangonaai bala jolu nya ada di bumi. Inya nya datang dari surga nan di pucu dari bala jolu. ³² Inya mambori kasaksian mangonaai apa nya ditiat dahan apa nya didingaNya, tapi bala urang ntah manarima kasaksianNya. ³³ Urang nya manarima kasaksianNya maha mangakuai bahawa Allah inyan bonar. ³⁴ Sobab, urang nya diutus Allah pacaan manyampaian perkataan Allah obai Allah mangonyu Roh nya ntah tabatas. ³⁵ Bapa mangasihai Anak dahan manyorahan bala jolu ka dalam tanganNya. ³⁶ Urang nya percaya agan Anak maumpuai hidup kekal, tapi urang nya tidak mantaatai Anak tidak akan maniat kahidupan, tapi murka Allah totap ada akai inya."