¹ Di hari nya ka tiga, ada pesta perkawinan di Kana, Galilea, dahan Uma Yesus ada di siatan. ² Yesus agan bala muridNya pan diundang jam ka pesta perkawinan inyan. ³ Pas angur habis, uma Yesus bapanir ka Inya, "Sia kahabisan arai angur." ⁴ Yesus manjawab, "Uma, apa hubukannya agan Aku? WaktuKu bolum datang." ⁵ Uma Yesus bapanir ka bala pelayan, "Apa pan nya Inya kataan ka hunin nan, labuhan ja." ⁶ Di sian, ada onam tong dari batu, nya biasa di pakai urang Yahudi di acara panyucian. Tiap tong inyan muatannya kira-kira dua buyung sampai tiga buyung. ⁷ Yesus bapanir ka bala palayan, "Isi tam bala tong inyan agan arai." lalu, sia maisi bala tong tai agan arai sampai ponuh. ⁸ Dahan, Yesus bapanir ka sia, "iniam kuti am sadikit dahan konyu ka pamimpin pesta." Lalu, sia pan mangonyu nya ka pamimpin pesta. ⁹ Waktu pamimpin pesta maasai arai nya jadi nyadi angur inyan, dahan inya pan ntah tahu dari muna asalnya [tapi bala palayan nya manguti arai inyan sia tahu ma], maka pamimpin pesta inyan maningkau pangaten lalaki, ¹⁰ dahan bapanir ka inya, "Satiap urang dituyukan arai angur nya baik holu dahan pas samua urang puas minum, horu dituyukan angur nya kurang baik lagian. Tapi hunin manyimpan angur nya baik sampai iniam." ¹¹ Tana ajaib pertama ini Yesus labuhan di Kana, Galilea, dahan manyataan kamuliaanNya, dahan bala muridNya percaya agan Inya. ¹² Jadi inyan, Yesus turun ka Kapernaum sasama gan uma, bala samadikan, dahan bala muridNya. Sia diap di di nuhun babaropa ari manahnya. ¹³ Ari Raya Paskah uran Yahudi jadi dampikam, dahan Yesus pan naik ka Yerusalem. ¹⁴ Di Bait Allah, Inya maniat bala urang bajualan lembu, domba, dahan burung dara, ongka bala pahurup duit duduk di nuhun. ¹⁵ Yesus manjawat cambuk dari tali dahan mausir sia samua kaluar dari Bait Allah, tamansuk samua domba dahan lembu siaan. Inya pan mambuakan jam bala duit grencengan dari bala pahurup duit dahan mambalian bala meja siaan. ¹⁶ Ka bala padagang burung dara, Yesus bapanir, "Baba kaluar samuanya dari sini ni! Jangan manyadian rumah bapaKu tompat akai bajual boli!" ¹⁷ Bala muridNya kaingatan bahawa ada tatulis: "Cinta agan rumah Kolai maloburan Aku." ¹⁸ Lalu , bala urang Yahudi manjawab dahan bapanir ka Inya, "Tana ajaib apa nya Duan tunyuan ka kami sampai Duan bahak malabuhan bala jolu ini ni?" ¹⁹ Yesus manjawab siaan, "Hancuran Bait Allah ini ni dahan dalam tiga ari Aku pacaan mandiriannya lagi." ²⁰ Sia manjawab, "Perlu 46 tahun akai mandirian Bait Allah ini ni, dahan Duan pacaan mandiriannya dalam waktu tiga ari?" ²¹ Tapi, nya Yesus maksud Bait Allah tai tubuhNya siku. ²² Karna inyan, waktu Yesus dibangkitan dari antara urang mati, bala muridNya taingat agan pamaniran ini; dahan sia percaya agan Kitab Suci dahan percaya agan pamaniran Yesus. ²³ Waktu Yesus ada di Yerusalem samanah parayaan Paskah, banyak urang percaya dalam namaNya obai maniat bala tana ajaib nya dilabuhanNya. ²⁴ Tapi, yesus siku ntah mampercayaan diriNya ka sia obai Inya mangenal samua urang, ²⁵ dahan ntah mamerluan sopa pan akai mambori kasaksian mangonaai mansia sobab Inya tahu agan apa nya ada dalam hati mansia.