¹ Uy hunin, bala urang Galatia nya Bodoh! Sopa nya jadi mamikat hunin nan? Ongka dihadapan hunin nan Yesus Kristus katiatan ma disaliban di hadapan umum? ² Sabuti jolu nya hona ku tanyaan ka hunin, hunin manarima roh nan obai manurutai Hukum Taurat, atau pan obai mandinga agan iman? ³ Maha bodoh tiam hunin ni? Hunin jadi mamulainya agan roh, maapa hunin inini hona maahirainya agan daging? ⁴ Sia-sia am hunin mahidap maha banyak pandaritaan inyan -- amun memang inyan kasia-siaan? ⁵ Jadi, mungkin bi Inya mangaruniaan roh ka hunin dahan malabuhan mujizat di tongah hunin obai hunin manjalatan Hukum Taurat, atau pan obai hunin ni mandinganya agan iman? ⁶ Sama uba Abraham nya percaya agan Allah jadi hal inyan diperhitukan ka inya akai kabonaran. ⁷ Obai inyan, katahuai tam bala urang nya baiman nam nya disobut bala anak Abraham. ⁸ Kitab Suci, jadi tahuam sabolumnya obai Allah pacaan mambonaran bala urang bukai Yahudi karna iman, jadi mandaholuan mambaritaan Injil ka Abraham agan panir, "Samua bangsa pacaan diBerkatai malaluai kolai." ⁹ Jadi, sia nya ba iman pacaan diberkatai sasama agan Abraham, urang percaya inyan. ¹⁰ Samua urang nya bagantung agan akarojaan Hukum Taurat ada di babah kutuk. Obai ada tatulis: "takutuk tam satiap urang nya ntah tunuk agan sagala jolu nya tatulis dalam kitab Hukum Taurat dahan malabuhannya." ¹¹ Jadi, jelasam inini bahawa ntah ada siku pan nya dibonaran di hadapan Allah obai Hukum Taurat, sobab "Urang bonar inya hidup karna iman". ¹² Tapi, Hukum Taurat tidak didasarai agan iman. Sabaliknya, "Urang nya malabuhan Hukum Taurat pacaan hidup karna hukumnya". ¹³ Kristus manobus kita dari kutuk Hukum Taurat manyadi kutuk bagi kita, sobab ada tatulis, "Takutuk tam urang nya digantung di kayu salib!" ¹⁴ Barokat ada dalam Yesus Kristus, berkat Abraham dapat sampai ka bala urang bukai Yahudi akai agan iman kita pan dapat manarima Roh nya jadi dijanyian inyan. ¹⁵ Bala samadikan, aku hona mangonyuai contoh dari kahidupan sahari-hari: Amun perjanyian jadi disahan, biarpan baya pernyataan antaramansia ntah ada urang nya dapat mambatalannya atau manamahai apa pan dalam perjanyian inyan. ¹⁶ Inini, mangona'ai perjanyian nya disampaian Allah ka Abraham dahan ka katurutannya. Allah ntah bapanir, "...ka bala katurutannya," nya manunyuk ka banyak katurutan. "...dahan ka katurutan kolai,"baartinya manunyuk ka siku urangma, inyaam Kristus. ¹⁷ Maksudku, Hukum Taurat nya muncul 430 tahun jadi inyan ntah dapat mambatalan perjanyian nya jadi disahan Allah. Maka, perjanyian inyan ntah ulih dihilakkan. ¹⁸ Amun warisan didasarai agan Hukum Taurat, maka warisan inyan tidak lagi didasarai agan perjanyian. Tapi, Allah maanugrahannya ka Abraham malaluai sabuti perjanyian. ¹⁹ Trus, maapa ada Hukum Taurat? Hukum Taurat ada obai bala palangaran, sampai katurutan inyan datang ubanya dimaksud perjanyian inyan dijawat. Hukum Taurat Inyan dipakai malaluai bala malaikat agan parantara. ²⁰ Tapi, Parantara bilanya akai mawakilai siku urang, padahal Allah inyanan satu. ²¹ Amun uba inyan, balawatan bi Hukum Taurat agan perjanyian Allah ni? Pastinya ntah! Sobab, amun Hukum Taurat diadaan akai dapat mangonyuai hidup, kabonaran pasti baasal dari Hukum Taurat. ²² Tapi, Kitab suci jadi mambatasai sagala jolu dahan samua urang di babah dosa supaya perjanyian karna iman dalam Kristus suba dikonyu ka sia nya percaya. ²³ Sabolum iman datang, kita ditawan di babah Hukum Taurat, ditahan sabagai tawanan sampai iman nya pacaan datang dinyataan. ²⁴ Aman uba inyan, Hukum Taurat inyanan pangawas kita sampai Kristus datang akai kita dapat dibonaran karna iman. ²⁵ Inini, iman tai datakam. Kita ntah lagi perlu Hukum Taurat akai pangawas kita. ²⁶ Dalam Yesus Kristus, samua hunin inyanan bala anak Allah malaluai iman. ²⁷ Hunin samua nya jadi dibaptis dalam Kristus jadi mangonaan Kristus. ²⁸ Ntah ada lagi urang Yahudi atau pan urang Yunani, Kuli atau urang Mardeka, lalaki atau batina obai hunin ni samua satu dalam Yesus Kristus. ²⁹ Aman hunin inyanan umpu Kristus, huni inyanam bala katurutan Abraham dahan bala hali waris sasuai agan perjanyian.