¹ Nya kumaksud, salama hali waris inyan ija babiak inya ntah ada bedanya agan budak biarpan inya inyanam umpu bala jolu. ² Inya ada di babah kuasa pangawas dahan pangurus rumah tanga sampai waktunya jadi ditotapan bapaknya. ³ Uba inyan jam kita, waktu ija babiak, kita nyadi budak bala roh dunia ini. ⁴ Tapi, waktu hari panggenapan datang, Allah mangutus Anak-Nya nya lahir dari batina di babah Hukum Taurat, ⁵ Akai manobus sia nya di babah Hukum Taurat, akai kita dapat manarima pangangkatan nyadi bala anak-Nya. ⁶ Obai kolai inyan bala anak-Nya, Allah jadi mauutus roh Anak-Nya ka dalam hati kita, nya mamangil, "Abba, Bapa" ⁷ Maka kolai bukainya budak lagi tam, tapi anak. Amun kolai inyan anak, Allah manyadian kolai hali waris malaluai Kristus. ⁸ Holu ni waktu kolai ntah mangenal Allah, kolai nan budak dari bala jolu nya pada dasarnya bukainya Allah. ⁹ Tapi, inini, pas kolai mangenal Allah atau lobih topatnya dikenal Allah, ubaapa mungkin kolai babalik lagi ka bala roh dunia nya lomah dahan ntah baguna inyan? Apa kolai nan honak diperbudak lagi? ¹⁰ Kolai malaluai bala hari, bala bulan, bala musim dahan bala tahun! ¹¹ Aku gola jangan-jangan pahora tulangku nya jadi ku labuhan akai kolai nyadi sia-sia. ¹² Aku mohon agan kolai, bala samadikan, turut tam uba aku obai aku pan nyadi uba kolai. Kolai ntah ada salah agan aku. ¹³ Akai kolai tahu, mulanya aku mangabaran Injil ka kolai obai aku mahidap panyakit. ¹⁴ Biar pan kondisi badanku ni akai ujian bagi kolai, kolai ntah mahina atau manulak aku. Sabaliknya, kolai manyamut aku saakan-akan aku ni malaikat Allah, dahan saakan-akan aku ni Yesus Kristus inyanam! ¹⁵ Uba apa agan berkat nya kolai rasaan inyan inini? Sobab, aku suba basaksi mangonaai kolai holu, amun ulih, mancungkit mata kolai dahan mangonyunya ka aku kolai pan rela. ¹⁶ Hiba aku inini nyadi musuh kolai bi obai aku manunyuan kabonaran ka kolai ni? ¹⁷ Bala urang inyan bausaha mandapatan kolai tapi maksud ntahnya baik. Sia hona maunsian kolai dengan harapan kolai pacaan manggoyapai sia. ¹⁸ Memang baik amun hala bagairah ma malabuhan bala jolu agan tujuan baik dahan bilanya baya waktu aku sasama agan kolai. ¹⁹ Bala anakku, demi kolai aku rela sakali lagi manangung podihnya malahiran sampai Kristus dinyataan dalam kolai. ²⁰ Harapanku, aku suba sasama agan kolai inini dahan maubah nada suaraku obai aku habis akal am mahadap ai kolai ni. ²¹ Paniran ka aku, uy kolai nya hona hidup di babah Hukum Taurat, maapa kolai ntah maningaan Hukum Taurat? ²² Karna ada tatulis, Abraham ada dua anak lalaki; Siku lahir dari batina budak, dahan nya siku lagi dari batina merdeka. ²³ Tapi anak dari budak batina inyan dilahiran manurut daging, sodakan anak nya dari batina merdeka dilahiran malaluai perjanyian. ²⁴ Tiat tam kisah ini pakai lambang obai dua batina ini malambangkan dua perjanyian. Satu inyanan perjanyian dari Gunung Sinai dahan malahiran bala anak perbudakan. Inyanam Hagar. ²⁵ Inini, Hagar malambangkan Gunung Sinai di tanah Arab, sama uba Yerusalem wayah ini, obai inya hidup dalam perbudakan sasama agan bala anaknya. ²⁶ Tapi, Yerusalem nya dipucu inyanam batina nya merdeka dahan Inya nan uma kita. ²⁷ Obai ada tatulis, "Bersukacita tam, uy batina nya mandul nya ntah malahiran. Basura balahap tam, Uy kolai nya ntah maasaan podihnya malahiran. Sobab, lobih banyak anak dari batina nya hidup sikunya dari pada batina nya balaki. ²⁸ Bala samadikan kolai nan bala anak perjanyian uba Ishak nan. ²⁹ Jadi waktu inyan, Anak nya lahir manurut daging maaniaya anak nya lahir manurut roh, uba nya bakajadian sampai jaman inini. ³⁰ Tapi, apa nya dikataan Kitab Suci? "Usir tam budak batina inyan agan bala anaknya nan, obai anak budak batina inyan ntah pacaan nyadi hali waris sasama agan anak batina merdeka." ³¹ sobab inyan, bala samadikan kita bilanya bala anak dari batina budak, tapi kita anak dari batina mardeka.