¹ Sobab inyan, jadi tam bala paniru Allah, uba bala biak nya dikasihai. ² Hidup tam dalam kasih, sama uba Yesus mangasihai kita dahan mangonyu diri-Nya akai kita salaku persembahan dahan kurban nya harum bagi Allah. ³ Tapi, jangan ada percabulan atau sagala macam kacomaran atau kasarakahan, disobut pan jangan obai jolu inyan ntah pantas ada ditongah urang kudus. ⁴ Jangan ada bala kata kotor dahan bala kata bodoh atau gurauan nya kasar -- nya ntah pantas -- sabaliknya ucapan syukur. ⁵ Sobab, kolai tahu pasti bahwa urang cabul, ntah suci atau urang sarakah manyomah patung nya ntah pacaan dapat warisan dalam krajaan Kristus dahan Allah. ⁶ Jangan sampai ada urang manipu kolai agan bala kata puang obai bala jolu inyan am nya mandatakan murka Allah akai bala biak daraka. ⁷ Jadi, jangan bakawal agan sia. ⁸ Holu ni kolai nan kapotakan, tapi inini kolai torakam dalam Tuhan. Hidup tam salaku bala anak torang ⁹ Obai buah dari torang inyanan samua kabaikan, kaadilan, dahan kabonaran, ¹⁰ dahan mancuba mangatahuai apa nya manyonangan Tuhan. ¹¹ Dan jangan janjumpatan bala kalakuan nya ntah manghasilan buah, sabaliknya talanyakai tam bala kalakuan inyan. ¹² Sobab, mamaniran bala hal nya sia labuhan bakakolit inyan pan maha mamaluan. ¹³ Tapi, samua nya ditalanyakai agan torang nyadi katiatan ¹⁴ obai samua nya nyadi nyata inyanam torang. Inyan sobabnya dikataan, "Huas tam, oy kolai si tukang tiu! Angkat tam dari antara urang mati, dahan kristus pacaan manyinarai kolai." ¹⁵ Jadi, parotian baik-baik uba apa kolai hidup, jangan uba urang bebal, nyadi urang bijak tam, ¹⁶ Pakai tam waktu nya ada nan agan sabaik-baiknya obai hari-hari ini inyanan jahai. ¹⁷ Karena inyan jangan bodoh, tapi pahapai tam apa inyan kahona Tuhan. ¹⁸ Jangan mabuk angur obai jolu inyan ntah pantas sabaliknya ponuhai tam agan roh. ¹⁹ Bapanir tam siku agan nya bukai dalam Mazmur, kidung pujian dahan nyanyian rohani, dahan manyanyi tam lalu jawat lagu pujian pakai Tuhan agan saponuh hati kolai. ²⁰ Mangucap syukur selalu agan bala jolu ka Allah Bapa dalam nama Tuhan kita, Yesus Kristus. Nasehat akai Laki Bini ²¹ Tunuk tam siku agan nya bukai dalam takut agan Kristus. ²² Bala bini, tunuktam agan laki kolai, uba agan Tuhan. ²³ Sobab, laki nan kapala dari bini, uba Kristus nan kapala jemaat, inyan nam Tubuh-Nya, dahan Inya siku jam Juru Slamatnya. ²⁴ Tapi uba jemaat tunuk agan Kristus uba inyan jam bini harus tunuk agan laki dalam sagala jolu. ²⁵ Bala laki kasihai tam bini kolai uba kristus mangasihai jemaat dahan mangonyu diri-Nya bagi jemaat. ²⁶ Akai mangudusan sia agan mambarosihainya agan pabasuan arai agan Firman. ²⁷ Agan uba inyan, Yesus dapat mampersembahan jemaat ka diri-Nya dalam kemuliaan, ntah banoda, atau ntah koyut, atau sajenisnya sampai jamaat nyadi kudus dahan ntah ada colanya. ²⁸ Uba inya jam bala lalaki harus mangasihai bininya uba tubuhnya siku. Inya nya mangasihai bininya, mangasihai dirinya siku. ²⁹ Sobab, ntah kala urang nya mambonci tubuhnya siku, tapi inya mamalihara dahan marawatnya. Uba inyan jam nya Kristus labuhan bagi jemaat ³⁰ obai kita ni bala anggota tubuh-Nya. ³¹ Iyanam sobabnya, lalaki pacaan maningalan bapanya dahan umanya dahan manyatu agan bininya sampai kaduanya nyadi satu tubuh. ³² Rahasia ini bosar, dahan aku mangataan ini dalam hubukan antara Kristus agan jamaat. ³³ Tapi, kahonanya satiap kolai mangasihai bini kolai uba diri kolai siku dahan bini harus mahormatai lakinya