¹ OSobab inyan am, aku, nya dipanyaraan obai Tuhan, manyosahan kolai akai hidup sapadan agan pangilan nya udah kolai tarima. ² Agan sagala karendahan hati dahan kalomahlomutan, agan kasabaran, akai saling manangung beban dalam kasih, ³ usahaan tam sakuat tanaga akai mamalihara kasatuan Roh dalam ikatan damai sejahtera. ⁴ Baya ada satu tubuh dahan satu Roh, sama halnya waktu kolai dipangil ka satu harapan dari pangilan kolai inyan, ⁵ satu Tuhan, satu iman, dahan satu baptisan, ⁶ satu Allah, dahan bapa dari samua, nya di pucu samuanya, malaluai samuanya, dahan dalam samuanya. ⁷ Tapi, akai kita masing masing dikonyu'ai Anugrah sasuai agan ukuran karunia Kristus. ⁸ Inyanam sobabnya, di paniran, "Waktu Inya naik ka tompat tingi, Inya manangkap bala urang nya ditahan, dahan mangonyu karunia ka manusia." ⁹ Pas dikataan, "Inya naik," inyan baarti Inya pan jadi turun tam ka bumi? ¹⁰ Inya, nya turun, Inya jam nya naik lobih tinggi dari samua langit akai inya mamonuhai bala jolu. ¹¹ Inya nam nya mangonyuai, baik bala rasul, bala nabi, bala pambrita Injil, bala gembala, ataupan bala pangajar, ¹² Akai malengkapai bala urang Kudus dalam malabuhan palayatan akai pambangunan Tubuh Kristus, ¹³ sampai kita samua nyadi kasatuan iman dahan pangatahuan agan Anak Allah, inyan am mansia dewasa, manurut ukuran tingkat pertumuhan nya sasuai agan kaponuhan Kristus. ¹⁴ Agan uba inyan, kita bilanya babiak tam nya dipatimakan galumang dahan dibaba ka koyan ka koni obai bamacam angin pangajaran, obai tipu daya mansia, dahan obai kacarodian dari panipuan nya licik. ¹⁵ Sabaliknya, mangataan kabonaran dalam kasih, Kita pacaan tumuh dalam sagala jolu ka Inya, nya inyanam Kapala, inya am Kristus. ¹⁶ Obai dari Inya nam samua tubuh tasusun lalu dikobat sasama nyadi satu malaluai dukungan satiap sendi. Amun masing-masing malakuan bagiannya, tubuh pacaan tumuh lalu mambangun dirinya siku dalam kasih. ¹⁷ Obay inyanam, ku paniran dahan kutegasan dalam Tuhan, jangan lagi kolai hidup uba urang nya ntah percaya nan,nya hidup dalam pikiran sia sia. ¹⁸ Pangarotian sia nyadi golap dahan tapisah dari kahidupan Allah obai kabobohan dalam diri sia nya disobab'an obai kakorasan hati sia. ¹⁹ Parasaan sia nyadi tumpul dahan sia manyorahan diri ka hawa nafsu akai malabuhan bamacam kacomaran agan kasarakahan. ²⁰ Tapi, bilanya uba inyan cara kolai balajar mangonaai kristus. ²¹ Saumpama kolai memang jadi mandinga mangonaai Inya dahan diajar dalam Inya, percis uba kabonaran nya ada dalam Yesus, ²² Buakan tam mansia manah kolai nya kolai dapat dari cara hidup kolai nya manah, nya tongahan dirusak hawa nafsu nya manipu nan. ²³ Baharuai tam roh pikiran kolai. ²⁴ Pakai tam mansia nya baharu, nya diciptaan dalam rupa Allah dalam kaadilan dahan kakudusan nya sejati. ²⁵ Karna inyanam, agan mambuakan kapalsuan, ayu am satiap kolai bapanir mangonaai kabonaran agan sasama kolai obai kita sasama anggota dari satu tubuh. ²⁶ Godi tam dahan jangan bajawat dosa. Jangan biaran Mataari tangolam dalam hati kolainya godi. 27Jangan Mangonyu kasompatan akai setan. ²⁸ Orang nya jadi mangolit, jangan mangolit lagian. Lobih baik kalau inya bagawi koras dahan malabuhan gawi nya baik agan tangan-nya siku akai inya dapat jolu akai dibagian ka urang nya mamerluan. ²⁹ Jangan biaran panir kotor kaluar dari nyawa kolai, tapi baya panir baik nya mambangun urang nya mamerluan maka pamaniran inyan mamberkatai sia nya mandinganya. ³⁰ Jangan manjawat duka bagi Roh kudus Allah, sebab obai Inyaam kolai disegelai akai hari panobusan nona nan. ³¹ Buakan tam sagala macam kapahitan, kagemaran, kamarahan, pertikaian, dahan paniran fitnah, dahan samua kajahaian, dahan jauhan tam inyan dari kolai. ³² Basikap ramah tamah tam siku agan nya bukainya nan, bahati nya lomut tam, dahan sasama maamputai, uba Allah dalam Kristus pacaan maamputai kolai.