¹ Bala biak, patuhai tam urangtuha kolai dalam Tuhan obai ini am jolu nya bonar. ² "Hormat'ai tam bapa agan uma kolai" ninini printah pertama nya disorotaai agan janji ³ "akai hidup kolai baik dahan kolai pacaan panyang umur di bumi". ⁴ Bala bapa, jangan manyobab'an bala anak hunin nyadi godi, tatapi bosaran tam sia dalam disiplin agan nasehat Tuhan. ⁵ Bala budak, patuhai tam tuan kolai nya ada di dunia ni agan hormat dahan gola, agan katulusan hati uba akai Kristus. ⁶ Jangan uba bala urang nya mancama gawi baya akai ditiat urang -- akai manyonangan mansia, tapi sabagai bala hamba Kristus nya malabuhan kahona Allah dari hati. ⁷ Malayatai agan soponuh hati uba akai Tuhan dahan bilanya akai mansia. ⁸ Sobab, kolai tahu, antah inya budak atau pan urang mardeka, amunnya melakuan jolu nya baik, Tuhan pacaan mongonyuai upah akai inya. ⁹ Bala tuan pan, labuhan jam ka bala hamba kolai. Tongaan tam maancam, obai katahuai tam, baik Tuan kolai atau Tuan sia sama-sama ada di surga dahan Inya ntah pilih kasih. ¹⁰ Ahirnya, nyadi kuat tam dalam Tuhan dahan dalam kuat kuasa-Nya. ¹¹ Pakai tam saluruh perlengkapan sanyata Allah akai kolai ulih badirin malawan tipu daya Iblis. ¹² Sobab, perjuakan kita bilanya melawan darah agan daging, tapi melawan bala pamarintah, bala panguasa, bala kakuatan dunia kagolapan ini, dahan malawan kakuatan roh dari si jahai nya ada di langit. ¹³ Obai inyan, pakai tam saluruh perlengkapan sanyata Allah akai kolai dapat totap batahan waktu ari nya jahai inyan datang, dahan pas semuanya jadi salesai am kolai totap badirin. ¹⁴ Maka, badirin togap tam, agan mengoncakan tali pendeng kebonaran di pungung dahan pakai baju zirah kaadilan, ¹⁵ dahan pasang tam alas kaki kolai agan kasiapan Injil damai sejahtera. ¹⁶ Dalam sagala hal, kuti tam prisai iman akai kolai ulih mehadapai samua panah api dari si jahai. ¹⁷ Kuti tam ketopong kaselamatan agan podang Roh, inyanam firman Allah, ¹⁸ kaping badoa satiap waktu dalam Roh agan samua doa dahan permohonan. Dalam doa kolai nan, bajaga-jaga tam agan sagala katekunan kaping manaikan samua permohonan akai samua urang kudus. ¹⁹ Badoa jam akai aku, akai waktu aku membuka nyawaku, dikaruniaan pamaniran akai aku agan berani membritaan rahasia Injil. ²⁰ Obai Injil inyan am, aku nyadi utusan nya kona pasung. Doa an tam akai aku brani mambritaannya uba apa saharusnya aku bapanir. ²¹ Tikhikus, samadikanku terkasih dahan palayan setia dalam Tuhan, aku hona memadahan bala jolu ka kolai akai kolai pan tahu jam uba apa kaadaanku dahan apa nya aku labuhan. ²² Aku memang mautus inya ka kolai akai tujuan ini,inyani akai kolai tahu kabar kami dahan akai inya mahibur hati kolai. ²³ Damai sejahtera akai bala samadikan saiman, dahan kasih agan iman dari Allah Bapa dahan Tuhan Yesus Kristus. ²⁴ Anugerah menyarotaai samua urang nya mengasihi Tuhan kita, Kristus Yesus, agan kasih nya tidak akan binasa.