¹ Holuni, kolai mati dalam bala palangaran agan bala dosa kolai, ² nya waktu inyan kolai bajalan manjumpatai jalan dunia, manjumpat'ai panguasa karajaan angin, roh nya inini bagawi di tongah bala biak ntah patuh. ³ Dimasa uba sia nan, kita samua holu pan hidup jam dalam nafsu kadagikan kita, mamuasan kahona daging dahan pikiran kita. Pada dasarnya kita ni bala biak durhaka, sama uba mansia bukai jam. ⁴ Tapi, Allah, nya kaya agan belas kasih dahan obai kasih-Nya nya bosar inyan Inya mangasihai kita, ⁵ bahkan pas kita mati dalam bala palangaran kita, Inya mahidupan kita sasama agan Kristus obai anugerah kolai dislamatan, ⁶ dan Inya mambangkitan kita agan Sia dahan manduduan kita sasama agan Sia di surgawi dalam Yesus Kristus, ⁷ Akai masa nya pacaan datang, Inya ulih manunyuan kakayaan anugerah-Nya nya ntah taukur dalam kabaikan-Nya agan kita dalam Yesus Kristus. ⁸ Sobab, obai anugerah kolai dislamatan malaluai iman dahan ini bilanya dari diri kolai siku, tapi karunia dari Allah, ⁹ bilanya hasil usaha kolai, supaya ntah ada siku pan nya manyomokan diri. ¹⁰ Kita ni jawatan Allah, diciptaan dalam Yesus Kristus akai malabuhan gawi baik nya disiapan Allah sabolumnya akai kita suba hidup di dalamnya. ¹¹ Obai inyan, ingat tam kolai holuan tai lahir salaku urang kafir, nya disobut "Urang ntah basunat", obai sia nya manyobut diri salaku "Urang basunat", inyanan sunat nya dilabuhan ka tubuh agan tangan mansia. ¹² Ingat waktu inyan kolai hidup ntah ada Kristus, tapisah dari kawargaan Israel dahan bala urang asing bagi ikatan perjanyian nya dijanyian, ntah ada pengharapan dahan ntah ada Allah dalam dunia ini. ¹³ Tapi, inini, dalam Yesus Kristus, kolai holu tai maha jauh lalu dibaba nyadi damping obai darah Kristus. ¹⁴ Sobab, Inya siku nan damai sejahtera kita nya jadi manjawat kadua bolah pihak nyadi satu dahan jadi mahancuran tembok permusuhan nya mamisahan, ¹⁵ Agan mahapus permusuhan dalam daging-Nya, inyanam Hukum Taurat nya baisi bala printah dahan bala katotapan akai di dalam diri-Nya Inya manjawat kaduanya nyadi siku mansia baharu, sampai manyadi perdamaian, ¹⁶ dahan mandamaian kaduanya agan Allah dalam satu tubuh malaluai salib, sampai mamatian permusuhan. ¹⁷ Inya datang dahan mambritaan damai sejahtera ka kolai nya jauh dahan damai sejahtera ka sia nya damping. ¹⁸ Obai, malaluai Inya, kita dua ni ada jalan mansu ka Bapa dalam satu Roh. ¹⁹ Jadi, kolai bilanya bala urang asing tam dahan bilanya pandatang tam, tapi sasama warga agan bala urang kudus dahan bala anggota kaluarga Allah, ²⁰ nya didirian di pucu dasar para rasul dahan para nabi, agan Yesus Kristus siku salaku Batu Panjurunya. ²¹ Dalam Kristus, samua bangunan tongahan disatuan sasama dahan manyadi Bait Suci dalam Tuhan. ²² Dalam Inya, kolai pan tongahan didirian sasama jam akai nyadi tompat tingal Allah dalam Roh.