¹ Amun kolai jadi diangkatan sasama Kristus, goyap am bala jolu nya di pucu, tompat Kristus diap, duduk di sabolah kanan Allah. ² Pikiran tam bala jolu nya di pucu, bilanya bala jolu nya di bumi. ³ Sobab, kolai jadi matiam dahan hidup kolai dioma'an agan Kristus dalam Allah. ⁴ Waktu Kristus, nya inyani hidup kolai, manyataan diri-Nya, kolai pan pacaan dinyataan dalam kamuliaan sasama agan Inya. ⁵ Karna inyan, matian tam bala sifat nya baasal dari sifat duniawi kolai nan, inyanam percabulan, kacomaran, hawa nafsu, kahona nya jahai, dahan kasarakahan, nya inyanam panyomahan agan berhala. ⁶ Bala jolu ini am nya manyobaban murka Allah datang nan. ⁷ Holuan tai,kolai pan malabuhannya jam waktu kolai ija hidup di dalapnya nan. ⁸ Tapi inini, buakan tam samua inyan: kagodi hati, kamurkaan, kaboncian, fitnah, dahan pamaniran kotor dari bibir kolai. ⁹ Jangan babula'ai siku manyiku obai kolai jadi ningalan mansia manah kolai sasama dengan bala kelakuannya. ¹⁰ Konaan tam mansia baharu, dahan torus dibaharuai dalam pangetahuan sasuai agan gambar dari Penciptanya. ¹¹ Dalam hal inyan, ntah ada lagi urang Yunani atau urang Yahudi, urang nya basunat atau urang yang ntah basunat, urang Barbar atau urang sakit, budak atau urang mardeka, tapi Kristus inyanam sagalanya dalam samuanya. ¹² Jadi, sabagai bala urang pilihan Allah, nya kudus dahan nya dikasihai, kolai konaan tam blas kasih, dahan karamahan, karendahan hati, kalomutan, dahan kasabaran. ¹³ Sabar tam siku agan nya bukai, dahan sasama maamputai amun memang ada inya basalah agan nya bukai. Sama uba Tuhan jadi maampuatai kolai, jadi kolai pan harus sasama mangamputai jam. ¹⁴ Di pucu samua inyan, konaan tam kasih, akai pangobat nya sampurna. ¹⁵ Kahonanya damai sejahtera Kristus mangandalian hati kolai obai memang akai inyan am kolai dipangil njadi satu tubuh, dahan basyukur tam. ¹⁶ Kahonanya pamaniran Kristus diap di dalam kolai agan malimpah, agan sagala hikmat kolai mangajar dahan manasihatai siku manyiku akai manyanyian mazmur, bala lagu pujian, dahan bala nyanyian rohani, samuanya agan ponuh ucapan syukur di dalam hati kolai agan Allah. ¹⁷ Apa pan nya kolai labuhan, dalam pamaniran atau pan kalakuan, labuhan tam samua inyan dalam nama Tuhan Yesus, kaping maucap syukur agan Allah Bapa, malaluai Sia. ¹⁸ Bala bini, tunuk tam agan laki kolai uba saharusnya dalam Tuhan. ¹⁹ Bala laki, kasihai tam bini kolai dahan jangan balaku kasar agan sia. ²⁰ Bala biak, patuhai tam urangtuha kolai dalam sagala jolu obai jolu ini manyonangan Tuhan. ²¹ Bala bapa, jangan manyobab'an bala anak kolai godi akai sia ntah nyadi patah samangat. ²² Bala budak, patuhai tam bala tuan hunin nya ada di dunia ini dalam sagala jolu. Labuhan tam inyan bilanya baya waktu sia maniat kolai dahan akai manyonangkan sia tapi agan satulus hati obai gola agan Tuhan. ²³ Apa pan nya kolai labuhan, labuhan tam agan saponuh hati uba akai Tuhan dahan bukainya akai mansia. ²⁴ Sobab kolai tahu bahwa dari Tuhan kolai pacaan manarima warisan akai upah kolai. Kristus Tuhan nam nya tongahan kolai layatai nan. ²⁵ Sobab, urang nya basalah pacaan manarima balasan obai kasalahan nya dilabuhannya dahan ntah ada pengecualian.