¹ Sobab, akai hunin tahu maha raja borat perjuakan nya jadi aku labuhan akai hunin nan, dahan akai sia nya ada di Laodikia, dahan akai samua urang nya bolum kala batomu muka agan aku. ² Tujuanku akai hati sia tahibur dahan disatuan dalam kasih sampai sia mandapat samua kakayaan nya baasal dari jaminan dahan pangarotian dahan pangatahuan dari rahasia Allah,Inyan am Kristus siku. ³ Dalam inya, dioma'an bala harota dari hikmat dahan pangatahuan. ⁴ Aku mangataan hal ini akai ntah ada urang nya pacaan manipu hunin agan perdebatan nya kadingaannya mansuk akal. ⁵ Sobab biarpan tubuh jasmaniku ntah sasama agan hunin tapi aku sasama agan hunin dalam roh, dahan aku basukacita maniat kadisiplinan hunin nya baik dahan ka teguhan iman hunin dalam Kristus. ⁶ Jadi, Obai hunin jadi narima Yesus Kristus sabagai Tuhan, hiduptam trus dalam Sia, ⁷ Baakar dahan bangun tam diri hunin dalam sia, Kuatan tam Iman hunin uba nya jadi diajaran ka hunin, dahan malimpah tam agan ucapan syukur. Hahati tam akai jangan ada urang nya manjorat hunin agan pilsafat nya kosong dahan manyosatan,nya baasal dari adat mansia dahan bala asas roh dunia, dahan bukainya bala prinsip kristus. ⁹ Sobab, dalam sia didiapai saluruh kaponuhan keilahian nya hidup dalam bentuk jasmani. ¹⁰ Hunin nyadi ponuham dalam Inya, inyanam kapala akai samua pamarintah dahan panguasa. ¹¹ Dalam Inya, hunin pan disunat jam, bukainya agan sunat nya di labuhan agan tangan mansia, tapi agan sunat nya dilabuhan oleh Kristus, agan manota tubuh kadagingan nya badosa. ¹² Dalam baptisan, hunin dikuburan sasama agan Kistus, dahan diangkat sasama agan Inya malaluai iman kolai dalam kuasa Allah nya maangkatan Inya dari antara urang mati. ¹³ Biarpan holu ni kolai mati dalam bala palangaran dahan dalam kadagikan nya ntah basunat, Allah jadi manjawat kolai hidup sasama agan Inya jadi Inya maamputai samua palangaran kita. ¹⁴ Inya jadi mambatalan surat hutang dahan bala aturan tuntutannya nya mahalakai hubukan antara Allah agan kita. Inya jadi manguti dahan mamakuannya di pucuk kayu salib. ¹⁵ Inya ngaloyaai bala pamarintah dahan panguasa, lalu sia nyadi tontonan nya mamaluan obai kamonangan-Nya di pucuk kayu salib. ¹⁶ Karna inyan, jangan biaran siku pan mahakipai kolai agan hal pamakatan dahan minuman atau pan hari raya kaagamaan, parayaan bulan baharu atau hari Sabat. ¹⁷ Samua inyan baya bayakan mangonaai bala hal nya pacaan datang, tapi bentuk nya sabonarnya inyani Kristus. ¹⁸ Jangan biaran urang nya sonang bapura-pura rendah hati dahan panyomahan ka bala malaikat mahakipai kolai. Sia nan bala urang nya hobi agan paniatan bala jolu nya detail lalu manjawat pikiran sia somong obai bala ide duniawi. ¹⁹ Urang nya uba inyan ntah bapigap kuat agan kapala. Kapala inyan am nya manuna samua tubuh, dahan saluruh tubuh disatuan Allah agan bala sendi dahan bala otot, samuanya tumuh agan pertumuhan nya baasal dari Allah. ²⁰ Amun sasama agan Kristus kolai jadi matiam agan bala aturan dunia, lalu maapa kolai saakan-akan ija nyadi umpu dunia, tunuk agan bala aturan uba ini: ²¹ "Jangan cama, jangan diasaai, jangan di diraba"? ²² Bala aturan ini pacaan binasa pas diturutai obai bala aturan inyan di jawat badasar printah dahan ajaran mansia. ²³ Bala aturan uba inyan memang katiatan bijaksana obai mandaholuan ibadah nya bapusat agan diri siku dahan karendahan hati palsu lalu panyiksaan tubuh. Tapi, samua inyan bila ada nilainya, baya akai mamuasan kadagikan ma.