¹ Jadi, obai Kristus jadi mandrita sacara jasmani, kahonanya hunin mampersanjataai diri hunin agan pikiran nya sama, sobab urang nya jadi mangalapai penderitaan jasmani, tongaam babuat dosa nan ² sampai dalam manjalatai sisa hidup di duni ini, inya ntah lagi manurutai kahonak mansia, tapi kahonak Allah. ³ Sobab cukup am waktu di masa lalu hunin nan nya malabuhan kabiasaan bala urang nya ntah mangenal Allah; hidup dalam hawa nafsu, kamabukan, pesta pora, minum-minum, dahan panyembahan berhala nya ponuh kakejian. ⁴ Inini, sia sangat heran waktu manomuai bahawa hunin ntah lagi jumpat dalam kabejatan liar nya sia labuhan. Karna inyan, sia mamfitnah hunin. ⁵ Tapi, sia pacaan mangonyu pertanggungjawaban ka Inya nya mahakipai urang hidup dahan urang mati. ⁶ Akai alasan iniam, Injil dibritaan ka bala urang nya inini jadi mati am sahinga biar pan sia jadi dihakipai di dunia ini sasuai agan standar mansia, tapi sia hidup sacara roh manurut ukuran Allah. ⁷ Akhir dari sagala jolu nya jadi dampikam. Karna inyan, waspada tam dahan bajaga-jaga tam akai dapat badoa. ⁸ Talobih dari samua inyan, trus tam saling mangasihai agan bonar-bonar sobab kasih manutupai banyak bala dosa. ⁹ Tunyuan tam karamahan siku agan nya bukainya tanpa mangeluh. ¹⁰ Obai satiap urang jadi manarima karunia, pergunaan tam inyan akai malayatai siku agan nya bukainya sabagai palayan nya baik agan bamacam karunia dari Allah: ¹¹ sopa nya bapanir, labuh tam inya bapanir sabagai urang nya manyampaian firman Allah; dahan sopa nya malayatai, labuh tam inya malayatai agan kakuatan nya Allah konyuai sahinga dalam sagala jolu, Allah dimuliaan malaluai Yesus Kristus. Bagi Inya am kamualiaan dahan kuasa sampai salama-lamanya. Amin. ¹² Bala samadikan nya kukasihai, jangan takonyat am agan api pencobaan nya datang akai mauji hunin nan, saolah-olah jolu nya aneh malabuhai hunin. ¹³ Tapi, bersukacita tam obai hunin jumpat nguti bagia n dalam panderitaan kristus sahinga hunin pan dapat bersukacita dahan rinang tatawa diwaktu kamuliaanNya dinyataan. ¹⁴ BErbahagia tam amun hunin dihina karna nama Kristus, sobab Roh kamuliaan dahan Roh Allah diap di dalam hunin. ¹⁶ Tapi, sopa pan nya mandrita sabagai urang Kristen, jangan am inya malu, sabaliknya kahonanya inya mamuji Allah obai manangung sobutan inyan. ¹⁷ Saatnyaam penghakipan dimulai dari kaluarga Allah. Dahan, amun penghakipan Allah dimulai dari kita, uba apa am nasib bala urang nya ntah taat agan Allah nan? ¹⁸ Amun urang saleh ja uyuh akai dislamatan, uba apa agan urang jahai dahan urang nya badosa inyan? ¹⁹ Karna inyan, biaram sia nya mandrita obai kahonak Allah, mempercayaan jiwanya ka Sang pensipta nya setia, kaping trus malabuhan apa nya baik.