¹ Karna inyan, sabagai sasama penatua dahan saksi mata pandritaan Kristus, dahan pan sabagai urang nya pacaan nguti bagian dalam kamuliaan nya pacaan dinyataan, aku manyosahan bala penatua nya ada di antara hunin: ² Gambalaan tam bala domba Allah nya ada di hunin nan! Jangan obai paksaan, tapi harus rela, uba nya Allah kahonaai; jangan malabuhannya akai mandapatan kauntukan hina, tapi obai hunin basadia. ³ Jangan jam batindak sabagai panguasa agan sia nya dipercayaan dalam tanggung jawab hunin, tapi jadi tam taladan bagi kalompok inyan. ⁴ Agan uba inyan, pas nonanya Sang Gembala Agung datang, kolai pacaan manarima mahkota kamuliaan nya tidak akan layu. ⁵ Uba inyan jam, nya lobih muda, tunuk tam agan tuha pantuaan hunin; dahan kahonanya hunin samua rendah hati, siku agan nya bukanya: Allah menentang urang nya somong, tapai Inya mangonyu anugrah ka urang nya rendah hati. ⁶ Sobab inyan, rendahan tam diri hunin di babah tangan Allah nya ponuh kuasa. Maka, Inya pacaan maningian hunin mun dah sampai waktunya. ⁷ Sorahan tam samua kahawatiran hunin agan Allah obai Inya nya mamelihara hunin. ⁸ Waspada tam dahan bajaga-jaga tam! Musuh hunin nan, si Iblis, bajalan munar manir uba singa kalapararan. ⁹ Lawan Iblis nan! badiri kuat dalam iman hunin obai hunin tahu bahawa di saluruh dunia, bala samadikan saiman hunin pan manangung pandritaan nya kolai alapai nan. ¹⁰ Dahan, jadi hunin mandrita akai samantara waktu, Allah sumber sagala anugrah nya jadi mamangil hunin akai jumpat nguti bagian dalam kamuliaanNya nya kekal di dalam Kristus pacaan mamulihan, maneguhan, manguatan, dahan mambangun hunin. ¹¹ Bagi Inya am, kuasa akai salama-lamanya. Amin! ¹² Aku manulis surat singkat ini akai hunin malaluai Silwanus, nya kukenal sabagai samadikan saiman nya setia. Aku hona mangonyu semangat dahan kasaksian ka hunin, bahawa iniam anugrah nya sejati dari Allah. Badiri tam teguh di dalam anugrah inyan. ¹³ Jemaat nya ada di Babilonia, nya umat pilihan Allah jam, manyampaian salam akai hunin. Markus, anakku dalam Kristus, manyampaian salam jam akai hunin. ¹⁴ Bri salam siku agan nya bukai agan ciupan kasih. Damai sejahtra akai samua nya ada dalam Kristus. Amin.