¹ Uba inyan jam hunin nan, oy bala bini, tunuk tam agan laki hunin nan. Sobab, apabila di antara sia ada nya ntah taat agan Firman, sia dapat dimonangan agan tingkah laku bininya biarpan ntah bakata-kata, ² sobab sia dapat maniat maha murninya dahan terhormatnya tingkah laku hunin. ³ Jangan am kacantikan hunin baasal dari hiasan luar, misalnya dari maminti ramut, mamakai perhiasan omas, atau mamakai pakaian nya mahal-mahal. ⁴ Sabaliknya, kahonanya kacantikan hunin baasal dari dalam batin hunin, inyaam kacantikan nya ntah dapat layu, nya baasal dari roh nya lomah lomut dahan tenang. Inyan am nya baroga di mata Allah. ⁵ Sobab, uba inyanam bala batina kudus di zaman holuan tai, nya manaruh harapan sia agan Allah, mampercantik diri sia; nyaam dengan tunuk agan laki sia. ⁶ Uba inyan am Sara nan taat agan lakinya, Abaraham, dahan maningkaunya 'tuan'. Hunin nan bala anak Sara amun hunin babuat baik dahan ntah maasa gola waktu malabuhannya. ⁷ Uba inyan jam hunin, oy bala laki, hidup tam agan bini hunin dengan ponuh pangarotian obai sia kaum nya lobih lomah. Hormatai tam sia sabagai sasama hali waris dalam manarima anugrah hidup supaya bala doa hunin ntah tahalang. ⁸ Akhirnya, kahonanya hunin samua basatu dalam pikiran, belas kasih, kasih basamadikan, dahan karendahan hati. ⁹ Jangan mambalas kajahaian agan kajahaian, atau cacimaki agan cacimaki jam. Sabaliknya, akai inyan am hunin dipangil, nyaam akai mawarisai berkat. ¹⁰ Sobab Kitab Suci bakata, "Sopa pan nya mancintaai hidup, dahan hona maniat bala ari nya baik, inya harus manjaga lidahnya dari kajahaian, dahan bibirnya dari mangataan tipu muslihat. ¹¹ Inya pan harus manjauhan diri dari nya jahai dahan malabuhan nya baik. Harusnya inya mangoyap perdamaian, dahan bausaha manggoyapnya. ¹² Sobab, mata Tuhan mamparotian bala urang bonar, dahan poningNya mandingaan bala doa sia. Tapi, MuhaNya manantang bala urang nya malabuhan kajahaian." ¹³ Sopa pani nya pacaan mancalakaai hunin ni amun hunin rajin malabuhan jolu nya baik? ¹⁴ Tapi, saandainya hunin harus mandrita demi kabonaran, maka hunin pacaan diberkatai. "Jangan gola ma dahan jangan gentar agan sia nya manjawat hunin mandrita nan. ¹⁵ Tapi, kudusan tm Kristus sabagai Tuhan dalam hati hunin! Siap sadia tam akai manjawab sopa pan inya manuntut hunin mangonaai pengharapan hunin nan, ¹⁶ tapi labuhan tam inyan agan lomah lomut dahan hormat, sarota bahati nurani nya jaronih supaya waktu hunin difitnah, urang mancacimaki cara hidup hunin nya baik di dalam Kristus nyadi malu sikunya ma. ¹⁷ Sobab, lobih baik mandrita obai babuat baik, amun inyan memang kahonak Allah, daripada mandrita obai babuat jahai. ¹⁸ Obai Kristus jdi mandrita karna bala dosa, sakali akai samua urang, nya bonar mati akai nya tidak bonar, sampai Inya dapat mambaba kita ka Allah. Dibunuh sacara jasmani, tapi dihidupan di dalam Roh. ¹⁹ Dalam Roh, Inya pan hingkas jam dahan malabuhan pambritaan ka bala roh di penyara, ²⁰ inyaam sia nya holu ni taat waktu Allah dengan sabar mananti sia di zaman Nuh, samantara Nuh manjawat kapalnya. Malaluai kapal inyan, sadikit ma, nyaam nyaam baya dalapan urang ma, nya disalamatan dari arai bah. ²¹ Arai bah inyan malamakkan baptisan nya inini manyalamatan hunin. Baptisan bilanya akai mambarosihai kotoran dari tubuh, tapi marupaan permohonan ka Allah akai sabuah hati nurani malaluai kabangkitan Yesus Kristus, ²² inyaam Inya nya inini jadi naik ka surga dahan diap di sabolah kanan Allah; jadi samua malaikat, bala pamarintah, dahan bala panguasa ditunukan ka Inya.