¹ Karna inyan hilakan tam samua kabencian, samua kamunafikan, samua hiri hati, dahan sagala macam fitnah. ² Uba bayi nya horu, kahonanya hunin mangahonaai susu rohani nya murni supaya hunin tumuh dalam kasalamatan hunin, ³ jika hunin memang bonar-bonar marasaan bahawa Tuhan inyan baik. ⁴ Waktu hunin datang ka Kristus, Batu Hidup nya ditulak mansia, tapi nya dipilih Allah dahan diangap maha baroga bagi Inya. ⁵ kolai pan uba bala batu hidup jam, nya didirian manyadi rumah rohani, imamat nya kudus akai mempersembahan bala kurban rohani nya berkenan agan Allah mamaluai Yesus kristus. ⁶ Obai Kitab Suci bakata, "Tiat tam, Aku malotaan sabuah batu di Sion, sabuah batu panyuru nya pilihan dahan nya mulia, dahan sopa pan nya percaya agan Inya tidak akan dipermaluan." ⁷ Jadi, batu inyan mulia bagi hunin nya percaya, "Batu nya ditulak bala tukang bangunan, udah manyadi batu panyuru," ⁸ dahan manyadi, "sabuah batu sandungan, dahan karang nya manyobaban urang jatuk." Sia tersandung obai ntah taat agan Firman. Inyan am jalan nya jadi ditontuan bagi siaan. ⁹ Tapi, hunin nan bangsa nya dipilih, imamat nya rajani, bangsa nya kudus, umat umpu Allah siku ma akai hunin dapat mambritaan bala kabaikanNya, nya jadi mamangil hunin kaluar dari kegelapan manuju ka torangNya nya ajaib. ¹⁰ "Holuan ni, hunin nan bukainya umat Allah, Tapi inini hunin nan umat Allah am. Holuan tai, hunin nan ntah dikonyuai belas kasihan, tapi inini hunin nan jadi manarima belas kasihan Allah am. ¹¹ Bala samadikan nya kukasihai, aku hona mansehatai hunin saagai panatang dahan urang asing di dunia ini akai manjauhan dari kahona hawa nafsu duniawi nya baprang malawan jiwa hunin. ¹² Jaga tam tingkah laku hunin nya baik nan di tongah bala urang nya bolum percaya supaya apabila sia mamfitnah hunin bajawat kajahaian, sia dapat maniat perbuatan hunin nya baik inyan, dahan pacaan mamuliaan Allah di ari pelawatan. ¹³ Demi nama Tuhan, tunuk tam agan satiap lembaga pamarintahan nya ditotapan mansia, baik agan raja sabagai panguasa tatingi, ¹⁴ atau agan para gubernur nya diutus raja akai mahukum para palaku kajahaian dahan akai mamuji bala urang nya babuat baik. ¹⁵ Sobab, uba inyan nam kahonak Allah: dengan babuat baik, hunin mambungkam katidaktahuan bala urang bodoh. ¹⁶ Hidyup tam sabagai bala urang nya merdeka, tapi jangan manggunaan kamerdekaan inyan sabagai topeng akai kajahaian. Sabaliknya, hidup tam sabagai bala hamba Allah. ¹⁷ Hormatai tam samua urang asing nan. Kasihai tam bala samadikan saiman, gola malu tam agan Allah, dahan hormatai tam raja. ¹⁸ Bala hamba, tunuk tam agan tuan hunin nan agan sagala hormat. Bilanya baya agan sia nya baik dahan lomah lomut, tapi agan sia nya tidak adil pan uba inyan jam. ¹⁹ Sobab marupaan kasih karunia, amun demi kasadarannya agan Allah, urang honak batahan dalam pandritaan obai katidakadilan. ²⁰ Sobab, jolu apa upah hunin amun agan katabahan hunin manarima pukulan karna perbuatan hunin nya badosa? Tapi, amun kolai mandrita karna babuat baik dahan hunin agan katabahan manarimanya, tinakan hunin inyan berkenan di hadapan Allah. ²¹ Sobab, akai inyan am hunin dipangil nan, obai kristus pan jadi mandrita akai hunin dahan maningalan taladan akai hunin akai hunin manyurutan jejakNya. ²² Inya ntah babuat dosa, dahan tipu daya ntah ada di nyawaNya. ²³ Waktu Inya diolok, Inya ntah mambalas agan olokan; waktu Inya mandrita, Inya ntah maancam, tapi manyorahan diriNya ka Allah nya pacaan mahakipai dengan adil. ²⁴ Inya nan jadi manangung dosa kita agan tubuhNya di kayu salib akai kita mati terhadap dosa, dahan hidup akai kabonaran. Agan bilur-biluNya, hunin disembuhan. ²⁵ Holuan tai, hunin uba bala domba nya hala sosat jaam, tapi inini hunin jadi babalik ka Sang Gembala dahan Palinung jiwa hunin am.