¹ Inini, mangonaai bala jolu nya kolai tulisan ka aku: inyanan baik bagi lalaki akai ntah mancama batina. ² Tapi, obai adanya perzinahan, satiap lalaki sabaiknya ada bininya siku dahan satiap batina ada lakinya siku. ³ Laki harus mamonuhai kawajibannya agan bininya, uba inyan jam bini agan lakinya. ⁴ Bini tidak bakuasa agan tubuhnya siku, tapi lakinya. Uba inyan jam tidak bakuasa agan tubuhnya siku, tapi bininya. ⁵ Jangan am kolai manjauhai siku manyiku, kacuali agan persatujuan bersama akai samantara waktu akai kolai bebas mangonyu waktu kolai akai badoa. Jadi inyan, hidup sasama lagi tam akai iblis ntah mancubaai kolai karna katidakmampuan kolai dalam mangandalian diri. ⁶ Tapi, Aku mangataan ini sabagai kalongaran, bukainya sabagai printah. ⁷ Aku baharap samua urang uba diri aku. Tapi, satiap urang ada karunianya siku dari Allah, nya siku dalam jolu ini dahan nya siku dalam jolu inyan. ⁸ Akai nya ntah manikah dahan para balu, aku mangataan bahwa lobih baik bagi sia jika totap dalam kaadaan uba aku. ⁹ Tapi, sia ntah dapat mangandalian diri, sabaiknya sia manikah. Sobab, lobih baik manikah daripada lobur obai hawa nafsu. ¹⁰ Akai nya manikah, aku konyu bala printah ini [bukainya dari aku, tapi dari Tuhan], inyaam bini ntah ulih maningalan lakinya, ¹¹ [tapi amun inya jadi talanyur maningalan lakinya, inya harus tidak kawin, atau babalik didamaian agan lakinya], dahan laki ntah ulih manyara bininya. ¹² akai nya salobihnya, aku mangataan [aku, bukan Tuhan] bahwa kalau samadikan ada bini nya ntah percaya, dahan batina inyan hona hidup sasama agan inya, jangan am manyara bininya inyan. ¹³ Uba inyan jam amun batina ada laki nya ntah percaya, dahan lalaki inyan hona hidup sasama agan inya, jangan inya maningalan lakinya inyan. ¹⁴ Obai laki nya ntah percaya inyan dukudusan bininya, dahan bini nya ntah percaya di kudusan lakinya. Amun ntah uba inyan, bala anak kolai inyanananak-anak najis, tapi inini sia kudus. ¹⁵ Tapi,amun nya ntah percaya inyan hona bapisah, biaran inya bapisah. Dalam jolu uba ini, saudara atau saudari ntah terikat am. Tapi, Allah jadi mamangil kita akai hidup dalam damai sejahtra. ¹⁶ Karna hai bini, uba apa kolai tahu kalau kolai pacaan manyalamatan laki kolai? Atau, uba apa bi kolai tahu, hai laki, kalau kolai pacaan manyalamatan bini kolai? ¹⁷ Tapi, uba nya jadi Tuhan totapan akai satiap urang, uba nya Allah jadi mamangil sia-sia masing-masing, totap tam hidup dalam kaadaan uba inyan am. Uba inyan jam aku printahan agan samua jemaat. ¹⁸ Ada bi urang nya dipangil waktu inya jadi disunat? Jangan inya mahilakan tana-tana sunatnya. Ada bi urang nya waktu dipangil bolum basunat? Jangan am inya disunat. ¹⁹ Sobab, basunat atau pan ntah basunat, ntahnya penting. Namun, nya penting inyanan kataatan agan bala printah Allah. ²⁰ Satiap urang harus diap dalam kaadaan uba waktu inya dipangil. ²¹ Apa kolai ni budak waktu dipangil nan? Jangan kolai mahawatiran jolu inyan. Tapi, amun kolai dapat jam nyadi urang nya merdeka, lobih baik gunaan kasompatan inyan. ²² Sobab, inya nya waktu dipangil dalam Tuhan inyanan budak, inya nan urang merdeka umpu Tuhan. uba inyan jam, waktu urang merdeka nya di dipangil, inya nan budak Kristus. ²³ Kolai jadi ditobus agan roga lunas, karna inyan jangan am kolai nyadi budak mansia. ²⁴ Bala samadikan, kahonanya satiap urang totap diap sasama agan Allah, dalam kaadaan uba waktu dipangil. ²⁵ Inini,mangonaai bala urang nya bolum kala manikah, aku ntah ada printah dari Tuhan. Tapi, aku mangonyu pandapatku sabagai urang, nya blas kasih Tuhan, dapat dipercaya. ²⁶ Aku maangap jolu ini baik dalam kaadaan sulit uba inini, inyanan lobih baik bagi siku urang akai totap diap uba apa adanya. ²⁷ apa kolai nan terikat agan bini? Jangan mausahaan sara biar am. Apa kolai nan bolum terikat agan bini? Jangan am kolai mangoyap bini. ²⁸ Tapi, amun kolai manikah, kolai ntah badosa. Dahan, amun ada batina dara manikah, inya ntah badosa. Tapi, sia nya manikah pacaan mangalapai bala kasulitan hidup duniawi, dahan kahonaku kolai tahinar dari bala jolu inyan. ²⁹ Bala samadikan, maksudku nan waktunya ija sadikit tam. Jadi mulai inini, biaram sia nya babini nan, hidup saolah-olah sia ntah ada bininya, ³⁰ sia nya manangis saolah-olah ntah manangis, sia nya bersukacita saolah-olah ntah bersukacita, sia nya mamboli saolah-olah ntah maumpuainya, ³¹ dahan sia nya mamakai bala jolu dunia ini, saolah-olah ntah mamakainya. Sobab, kaadaan dunia ini tongahan sonyap. ³² Kahonaku kolai bebas dari kahawatiran. Urang nya manikah mamikiran bala jolu mangonaai Tuhan, uba nya hona manyonangan Tuhan. ³³ Tapi, urang nya manikah mamikiran bala jolu duniawi, uba apa nya hona manyonangan bininya, ³⁴ dahan perhatiannya tabagi-bagi. Batina nya ntah manikah dahan bala batina dara mahawatiran bala jolu mangonaai Tuhan akai inyanyadi kudus, baik tubuh atau pan rohnya. Tapi, batina nya manikah mahawatiran bala jolu dunia ini, uba apa dapat manyonangan hati lakinya. ³⁵ Aku manataan jolu ini akai kauntukan kolai siku ma, bilanya pakai manjorat kolai, tapi akai jolu nya baik akai palayatan kolai agan Tuhan ntah taganggu. ³⁶ Amun ada urang nya maangap bahwa inya jadi malabuhan jolu nya pantas agan batina daranya obai dara inyan jadi dewasa am dahan uba inyan am saharusnya, biaram inya malabuhan apa nya dikahonaainya, inya tidak badosa; biaram sia manikah. ³⁷ Tapi, inya jadi mantap am dalam hatinya, tidak di babah paksaan, ada kuasa dalam kahonanya siku, dahan jadi mamutusan dalam hatinya manikahai daranya inyan, maka inya pan batinak baik am. ³⁸ Jadi, amun inya manikahai batina inyan inya berbuat bonar, tapi amun inya ntah manikahai batina inyan, parbuatannya inyan pan baik ma. ³⁹ Bini terikat salama lakinya ija hidup. Tapi, amun lakinya jadi hilakam, inya bebas akai manikah agan sopa pan nya dikahonaainya, asal urang di dalam Tuhan. ⁴⁰ Tapi, manurut pandapatku, inya lobih bahagia amun inya totap dalam kaadaannya, dahan manurutku, aku pan ada roh Allah jam.