¹ Inini, mangonaai daging nya dipersembahan akai bala berhala. Kita tahu ma kalau kita pan ada pangatahuan. Pangatahuan manjawat somong, tapi kasih mambangun. ² Amun ada urang nya mangira bahwa inya tahu agan bala jolu, inya balum mangatahuai nya saharusnya inya tahu. ³ Tapi, amun siku urang mangasihai Allah, inya pan dikenal Allah. ⁴ Karna inyan, mangonaai makatan bala daging nya di persembahan akai berhala, kita tahu bahwa tidak ada berhala di dunia ini, dahan tidak ada Allah kacuali Inya, satu-satunya. ⁵ Tapi, kalaupan ada nya disobut allah-allah, baik surga ataupan di bumi, [ubanya ada banyak "allah" dahan ada banyak "tuhan"], ⁶ tapi bagi kita baya ada satu Allah, inyanam Bapa. Dari Inyaam sagala jolu dahan kita ada akai Inya. Dahan, baya ada satu Tuhan, inyanam Kristus Yesus, nya obai Inya sagala jolu ada, dahan kita ada malaluai Inya. ⁷ Biarpan uba inyan, tidak samua mansia ada pangatahuan ini. Tapi, babaropa urang, nya jadi tabiasa agan berhala sampai inini, mamakan makatan inyan sabagai makatan nya dipersembahan akai berhala. Karna inyan, hati nurani sia nya lomah manyadi tacomar. ⁸ Makatan tidak akan mahampikan kita agan Allah. Kita pan ntah pacaan lobih buruk amun nta mamakannya. atau pan pacaan lobih baik amun kita mamakannya. ⁹ Tapi, ingat tam bahwa kabebasan kolai ini jangan malah jadi batu sandungan bagi sia nya lomah. ¹⁰ Karna, amun ada urang nya maniat kolai, nya ada pangatahuan, makan dalam kuil berhala, pasti hati nuraninya, amun inya lomah, pacaan diteguhan akai makan bala daging nya dipersembahan akai berhala? ¹¹ Jadi, malaluai pangatahuan kolai, urang nya lomah inyan, inyaam samadikan kolai, nya akainya Kristus jadi mati, manyadi banasa. ¹² Jadi, obai badosa agan bala samadikan saiman kolai dahan malukaai hati nuraninya nya lomah, maka kolai badosa agan Kristus. ¹³ Karna inyan, amun makatan maakibatan samadikan saimanku tersandung, tidak pacaan kala makan daging sampai salama-lamanya akai aku ntah manjawat samadikanku tersandung.