¹ Uba iniam kahonanya urang nan mamperhitukan kami nyaam sabagai bala hamba Kristus dahan bala urang nya dipercayaai bala rahasia Allah. ² Agan uba inyan, bala urang nya dipercaya agan bala jolu nya baroga harusnya mambuktian bahwasia dapat dipercaya. ³ Tapi, bagiku ntah penting amun aku kolai dihakipai atau di hakipai pangadilan mansia. Bahkan, aku siku ntah mahakipai diriku. ⁴ Sobab, aku ntah manyadarai apa pan agan diriku siku. Tapi, bukainya obai jolu inyan aku di bonaran, tapi Tuhan nam nya mahakipai aku. ⁵ Karna inyan, jangan am mahakipai sabolum waktunya, nyaam sobolum Tuhan datang. Inya nya pacaan manorakai bala jolu nya ditapuan dalam kagolapan dahan manyataan maksud hati. Lalu, satiap urang pacaan manarima pujian dari Allah. ⁶ Bala samadikan, aku jadi malabuhan bala jolu ini agan diriku siku dahan Apolos demi kolai akai di dalam kami, kolai dapat balajar akai malampau'ai apa nya tatulis hinganya ntah ada salah siku dari kolai nya manyadi somong siku agan nya bukainya. ⁷ Sobab, sopa bi nya mambeda-bedaan kolai? Apa nya ada di kolai, nya bukai kolai trima? Dahan, Amun memang kolap manarimanya, maapa kolai manyomokan diri saolah-olah ntah manarimanya? ⁸ Kolai jadi dikonyang am, kolai nyadi kaya am! Biar ntah ada kami pan, kolai nyadi raja am! Aku maha baharap kolai bonar-bonar jadi manyadi raja akai kami pan dapat mamarintah sasama agan kolai. ⁹ Sobab, manurutku, Allah jadi manompatan kami, para rasul, di tompat nya terahir, uba bala urang nya di jatuai hukupan mati; karna di jadian tontotan akai dunia, baik akai bala malaikat atau pan mansia. ¹⁰ Kami bodoh demi Kristus, tapi kami bijaksana dalam Kristus. Kami lomah, tapi kami kuat. Kolai terhormat, tapi kami hina. ¹¹ Sampai inini am, kami kalaparan dahan haus, bapakaian compang camping, dipukulai, dahan hidupmangambara. ¹² Kami bapahora tulang, bagawi agan kami siku. Waktu kami dicaci-maki, kami memberkatai. Waktu kami disiksa, kami batahan. ¹³ Waktu kami difitnah, manjawab agan lomah lomut. bahkan, sampai inini, kami manyadi uba kuyah di dunia ini, kotoran dari sagala jolu. ¹⁴ Aku manulis bala jolu ini bukainya akai mampermaluan kolai, tapi akai manasehatai kolai sabagai bala anak nya kukasihai. ¹⁵ Sobab, biar pan guru kolai sapuluh ribu dalam Kristus, kolai ntah ada banyak bapa. Karna dalam Yesus Kristus, akunam nya nyadi bapa kolai malaluai Injil. ¹⁶ Jadi, aku manyurukan kolai, jadi tam urang nya manurutai taladanku! ¹⁷ Inyanam sobabnya, aku mautus Timotius ka kolai, anakku nya kukasihai dahan nya setia di dalam Tuhan. Inya pacaan maingatan kolai mangonaai bala jalanku dalam Kristus, ubanya aku ajaran di muna-muna, dalam satiap jemaat. ¹⁸ Babaropa dari kolai nyadi somong, saolah-olah aku ntah pacaan datang lagi ka kolai ¹⁹ Tapi, aku pacaan copat datang ka kolai, amun Tuhan mangahonaai, dahan aku pacaan mangatahuai bukai baya pamaniran bala urang somong inyan, tapi agan kuasa sia jam. ²⁰ Sobab,krajaan Allah bukainya dalam pamaniran tapi dala kuasa. ²¹ Apanya kolai kahonaai? Apa aku harus datang ka kolai agan tungkah atau agan kasih dahan roh kalomahlomutan?