¹ Tapi, Bala samadikan, aku ntah dapat bapanir agan kolai uba agan mansia nya rohani, tapi uba agan mansia duniawi, inyanam uba agan bala bayi dalam Kristus. ² Aku mangonyuai kolai minum susu, bukainnya makatan, obai kolai bolum mampu, bahkan inini pan kolai ija bolum mampu jam, ³ obai kolai ija duniawi. Sobab, amun ada tungi dengki dahan pasalisihan di antara kolai, inyan artinya kolai ija duniawi dahan hidup sacara mansia? ⁴ Sobab, waktu ada urang bapanir, "Aku di pihak Paulus," dahan nya bukai, "Aku di pihak Apolos," jadi baarti kolai inyanan mansia? Lalu, sopa bi Paulus inyani? Bala hamba nya obai sia kolai nyadi percaya uba nya Tuhan karuniaan ka tiap-tiap kolai. ⁶ Aku mananam, Apolos manyiram, tapi tapi Allah ny manumuhannya. ⁷ Jadi, jadi bukai nya mananam, bukai jam nya manyiram, tapi obai Allah nya manumuhannya. ⁸ Urang nya mananam dahan nya manyiram inyani satu, dahan masing-masing pacaan manarima upahnya siku sasuai agan usahanya siku. ⁹ Sobab, kami ni kawal sapagawian Allah; kolai nan huma Allah, bangunan Allah. ¹⁰ Sasuai agan anugrah Allah nya dikaruniaan ka aku, uba ahli bangunan nya lihai, aku malotaan fandasi dahan nya bukai mambangun di pucunya. Tapi, satiap urang harus maperhatian uba apa inya mambangun di pucuknya. ¹¹ Sobab, ntah ada siku pan nya dapat malotaan fandasi nya bukai salain nya jadi dilotaan, inyanam Kristus Yesus. ¹² Amun ada urang nya dapat mambangun di pucuk fandasi ini agan omas, perak, bala batu baroga, kayu, rumput, kampilai padi, ¹³ pakarojaan nya dilabuhan satiap urang pacaan jelas obai Ari inyan pacaan manyataannya agan api, dahan api inyan pacaan mauji uba apa jenis pakarojaan satiap urang. ¹⁴ Amun pakarojaan nya jadi siku urang bangun inyan batahan, inya pacaan manarima upah. ¹⁵ Amun pakarojaan inya lobur habis, inya pacaan rugi, tapi biar pan uba inyan, inya siku pacaan disalamatan, tapi kaadaannya botu am. ¹⁶ Ntah tahu bi kolai bahwa kolai nan Bait Allah dahan Roh Allah diap di dalam kolai? ¹⁷ Amun ada urang nya mahancuran Bait Allah, Allah pacaan mahancuran inya jam obai Bait Allah inyanan kudus, inyanam kolai. ¹⁸ Jangan ada urang nya manipu dirinya siku. Amun ada di antara kolai mangira obai inya bijaksana di xaman ini, biaram inya nyadi bodoh akai inya manyadi bijaksana. ¹⁹ Sobab, hikmat dunia ini inyanan kabodohan di hadapan Allah. Sobab, ada tatulis, Inyanam nya manangkap urang bijaksana dalam kalicikan sia," ²⁰ dahan pan, "Tuhan mangatahuai bala pikiran urang nya bijaksana, samuanya inyanan sia-sia." ²¹ Karna inyan, jangan ada siku pan nya bamegah dalam mansia. Sobab, sagala jolu inyanan umpu kolai, ²² baik Paulus, Apolos, atau pan Kefas, baik dunia, baik hidup, atau pan kamatian, baik bala jolu nya inini atau pan bala jolu nya pacaan datang; samuanya inyanan umpu kolai. ²³ Dahan, kolai nan umpu Kristus, dahan Kristus nan umpu Allah.