¹ Dahan, waktu aku ka kolai, Bala samadikan, aku ntah datang agan kehebatan kata-kata atau hikmat akai mambritaan rasia Allah ka kolai. ² Sobab, aku mamutusan akai ntah mangatahuai apa pan di antara kolai salain Yesus Kristus, inyanam Inya nya disalib'an. ³ Aku sasama agan kolai dalam kalomahan, dalam kagolaan, dahan maha bagotar bagora. ⁴ Pamaniranku ataupan pambritaanku bukainya dalam kata-kata hikmat nya mayakitan, tapi agan bukti Roh dahan kuasa, ⁵ akai iaman kolai ntah badasaran hikmat mansia, tapi agan kuasa Allah. ⁶ Kami mangataan hikmat di antara sia nya dewasa, tapi bukainya hikmat zaman ini atau dari bala panguasa zaman ini nya pacaan dibanasaan, ⁷ tapi kami mangataan hikmat Allah dalam rahasia, hikmat nya ditapuan, nya Allah totapan sabolum permulaan zaman bagi kamuliaan kita. ⁸ Ntah ada bala panguasa zaman ini nya mangenalnya. Sobab, amun sia jadi mangenalnya, sia tdak akan kala manyalib'an Tuhan nay mulia. ⁹ Tapi, uba nya tatulis, "Apa nya mata bolum kala tiat, dahan poning bolum kala dinga, dahan bolum kala timul dalam hati mansia, samua inya Allah jadi sadiaan akai sia nya mangasihaiNya." ¹⁰ Tapi, Allah jadi manyataan bala jolu ini ka kita malaluai Roh obai Roh manyalidikai samua jolu, bahkan kadalapan Allah. ¹¹ Sobab, sopa bi di antara mansia nya mangatahuai bala jolu dari mansia salain roh mansia nya ada di dalamnya? Uba inyan jam, ntah ada siku pan nya mangatahuai bala jolu dari Allah salain Roh Allah. ¹² Inini, kita jadi manarima, bukainya roh dari dunia, tapi roh dari Allah akai kita dapat mangatahuai bala jolu nya dianugrahan Allah ka kita. ¹³ Bala jolu nya kami sobut jam ini, bukainya dalam kata-kata nya diajaran hikmat mansia, tapi nya diajaran Roh agan mambanikan bala jolu agan nya rohani. ¹⁴ Tapi, mansia nya ntah rohani ntah manarima bala jolu nya baasal dari Roh Allah obai bala jolu inyan marupaan kabodohan baginya. Inya ntah dapat dapat mamahapainya obai bala jolu inyan baya dapai dinilai sacara rohani. ¹⁵ Mansia nya rohani manilai samua jolu, tapi inya siku ntah dinilai sopa pan. ¹⁶ Sobab, "Sopa bi nya mangatahuai pikiran Tuhan lalu dapat manasihataiNya?" Tapi, kami ada pamikiran Kristus.