Sarak ¹ Udah temuk Yesus ngajar, Ya angkat ari Galilea, datai de daerah Yudea seberang sungai Yordan. ² Urang begerumung nurut Ya, Ya nyemuh ke sidak diak. ³ Udek urang-urang Farisi datai kak nguji Ya. Tanyak sidak: "Tau ndai urang nyarak ke bini ya ngau alasan nama-nama?" ⁴ Saut Yesus: "Ndai nama kitak maca, Ya te mulah mensia peruba inuk ngau bakas? ⁵ Firman Ya: "Bakas bakal nudi ke apai inai ya, sengkalik ngau bini ya, isak sedua jadi sutik. ⁶ Piyak mek sidak bukai agik dua tapi sutik. Maka nama te udah depesutik ke Allah ndai tau depesarak mensia." ⁷ Jekuh sidak ngau Ya: "Antik piyak, nama sebab Musa nyuruh merik ke surat sarak antik kak nyarak ke bini ya?" ⁸ Saut Yesus ngau sidak: "Empadai ati kitak keras maka Musa nyagi ke kitak nyarak bini, tapi sebenar dari peruba ndai upa yak." ⁹ Tapi aku madah kitak: "Sapa te nyarak bini, kecuali empadai zinah, lalu jadi ngau inuk bukai, ya bezinah." ¹⁰ Bala murid banai ngau Ya: "Antik piyak urang belaki bini, lebih baik ndai sah kawin." ¹¹ Tapi Ya nyaut sidak: "Ndai semua urang nyaruk anai yak, hanya urang te deberik penumut na. ¹² Bisik urang te ndai tau kawin empadai asal piyak re perut inai, bisik ugak urang ndai tau kawin empadai dekemela urang, bisik ugak urang te milih sengaja ngai kawin empadai kerajaan surga. Sapa te nyaruk, nyaruk am ya." ¹³ Udek urang ngemaik bala anak sidak ngau Yesus, isak Ya ngeletak ke jari atau kepalak nemiak samil bedoa ke sidak; tapi bala murid ngelai sidak. ¹⁴ Tapi Yesus banai: "Isak ke bala nemiak yak kituk, nang belaban ke sidak ngau Aku, urang te upa sidak tuk me te empu kerajaan surga." ¹⁵ Udek Ya ngeletak ke jari atau kepala sidak, dah yak angkat. ¹⁶ Bisik surang datai ngau Yesus, banai: "Guru, pempulah baik nama te kalah kupulah isak bulih idup te kekal?" ¹⁷ Saut Yesus: "Nama sebab mih nanyak Aku tentang nama te baik? Cuma sutik te baik. Antik mih kak idup, tunak ke semua perintah Allah." ¹⁸ Jekuh urang yak ngau Ya: "Perintah te ni?" Saut Yesus: "Nang munuh, nang bezinah, nang ncuri, nang besumpah pelsu, ¹⁹ hormat ngau apai inai, kasih ngau urang upa kasih ke dirik." ²⁰ Jekuh urang biak ngau Ya: "Semua yak dah kutunak, nama agik te kurang?" ²¹ Saut Yesus: "Antik mih kak baik benar, angkat, jual semua pemisik mih, berik ngau urang meskin, maka mih bulih reta de surga, udek datai kituk ngau tamai Aku." ²² Rama ya ninga Yesus miak, ya angkat ngau ati sedih, empadai mayuh reta ya. ²³ Yesus banai ngau bala murid: "Aku madah kitak, palin mar urang kaya tamak kalam kerajaan surga. ²⁴ Sekalik agik Aku madah kitak, lebih mudah unta tamak lubang jarum repada urang kaya tamak alam kerajaan Allah." ²⁵ Rama murid ninga yak, ruh pemikir sidak, lalu banai: "Antik piyak, sapa te tau deselamat ke?" ²⁶ Yesus nempenang sidak lalu banai: "Bagi mensia yak ndai mungkin, tapi bagi Allah semua mungkin." Upah tamai Yesus ²⁷ Udek Petrus nyaut Yesus: "Kami tuk dah nudi ke semua utai, tamai Nuan, jadi nama te ulih kami?" ²⁸ Saut Yesus ngau sidak: "Aku madah kitak, rama penciptaan agik, Anak Mensia nugau de tahta kemuliaan Ya, kitak te udah tamai Aku, duduk ugak datau dua belas tahta untuk ngakim kedua belas suku Israel. ²⁹ Ngau sapa urang te empadai Aku, nudi ke langkau, menyadik inuk, menyadik bakas, apai, inai, anak, uma, bakal nerimak seratus kalik lipat ngau bulih idup kekal. ³⁰ Tapi mayuh urang te dulau jadi penudi, te penudi jadi dulau."