Perempama tentang bala urang begajih de kebun anggur ¹ Hal kerajaan surga sempama tuan rumah te angkat lam kenyung begayap ngegak urang te tau kerja de kebun anggur ya. ² Udah sepekat ngau bala pekerja ngau upah sedinar sari, ya nyuruh sidak ke kebun anggur ya. ³ Kira-kira jam semilan, ya keluar agik, depedak ya bisik urang te ngangur de pasar. ⁴ Jekuh ya ngau sidak: "Kitak angkat ugak ke kebun anggur aku, nama te pantas bakal kuberik ngau kitak. Sidak pun angkat. ⁵ Kira-kira jam duabelas ngau jam tiga, ya keluar upa tadik agik. ⁶ Kira-kira jam lima babah ari ya keluar agik, medak sidak lalu banai: Nama kitak dituk ngangur bari ari? ⁷ Saut sidak ngau ya: Empadai ndai sik urang te ngupah kami. Saut ya ngau sidak: Angkat kin kitak ke kebun anggur aku. ⁸ Rama ari malam, tuan yak banai ngau manur ya: Kumai bala sidak te kerja, berik sidak upah, mulai re te penudi sampai ke te penulau. ⁹ Maka datai sidak mulai re te kerja jam limak, masing-masing bulih sutik dinar. ¹⁰ Udek tamak sidak te kerja dulau, sangkak bulih lebih mayuh, tapi sidak bulih sedinar ugak. ¹¹ Rama sidak nerimak yak, ngerungut ngau tuan yak, ¹² jekuh sidak: Sidak te penudi kerja cuma sejam, nuan nyama ke upah sidak ngau kami te bepanas sari napus. ¹³ Tapi tuan yak nyaut surang dentara sidak: Menyadik, aku bukai ndai adil. Kan kita udah sepekat sedinar sari? ¹⁴ Amik jatah kitak, angkat kin; aku kak merik sidak te masuk penudi sama pemayuh ngau mpu kitak. ¹⁵ Ndai mek aku bibas nguna ke empu aku upa penekak aku? Atau iri ati kah kitak, empadai aku baik ati? ¹⁶ Upa yak mek, urang te dulau jadi penudi, te dudi jadi dulau." ¹⁷ Rama Yesus kak angkat ke Yerusalem, Ya ngumai kedua belas murid, banai ngau sidak kedirik detengah jalai: ¹⁸ "Pituk kita angkat ke Yerusalem, Anak Mensia kak deserah ngau imam kepalak ngau ahli Taurat, sidak nyatuk ke Ya ukum mati. ¹⁹ Udek sidak nyerah ke Ya ngau bala bansa te ndai ngelala Allah, isak Ya dekeluluk, desesah, desalib, udek ari ketiga Ya debangkit ke." ²⁰ Bini ngau Anak Zebedeus datai ngau Yesus, bisik te kak depintak. ²¹ Jekuh Yesus: "Nama te kedekak nuan?" Saut ya: "Berik perintah, isak kedua urang anak aku, tau duduk alam kerajaan Nuan, surang sepiak kanan, surang sepiak kibak." ²² Saut Yesus ngau ya: "Nuan ndai ketau nama te nuan pintak. Tau nama kitak minum cawan te kalah depinum Aku?" Saut sidak: "Kami tau." ²³ Yesus banai ngau sidak: "CawanKu mimang kitak minum, tapi hal duduk desepiak kibak kanan Aku, Aku ndai sik hak merik ke yak, yak deberik ApaiKu ngau urang te dah desiap ke Ya." ²⁴ Ninga miak, luat kesepuluh murid ngau sedua menyadik. ²⁵ Tapi Yesus ngumai sidak lalu banai: "Kitak ketau, bahwa pemerintah merintah ngau jari besi, ngau bala penguasa merintah sidak ngau kerampak. ²⁶ Tapi ndai piyak dentara kitak. Kalau kitak kak besai, kitak kalah jadi pelayan, ²⁷ sapa te kak jadi urang tekemuka, ya kalah jadi anak buah; ²⁸ upa Anak Mensia datai, ndai untuk delayan, tapi ngelayan, merik ke nyawa Ya jadi tebusan bagi urang mayuh." ²⁹ Rama Yesus ngau bala murid keluar ari Yerikho, urang mayuh begerumung tamai Ya. ³⁰ bisik dua urang butak duduk de sisi jalai ninga kalau Yesus ngelalu, banai sedua: "Tuhan, Anak Daud, kasih me ke kami!" ³¹ Tapi urang mayuh ngerara sedua, nyuruh sedua sunyik. Tapi sedua makin kayah bingan: "Tuhan, Anak Daud, kasih me ke kami!" ³² Udek Yesus betegak ngau ngumai sedua, jekuh Ya: "Kitak dua kak Aku pulah tipa?" ³³ Saut sedua: "Tuhan, pulah isak kami tau medak." ³⁴ Tegerak ati Yesus ngau belas kasih, udek Ya nyapai mata sedua, sekelin yak sedua medak, lalu tamai Ya.