Sapa te palin besai alam kerajaan surga ¹ Rama yak bala murid Yesus datai ngau betanyak: "Sapa te palin besai alam kerajaan surga?" ² Maka Yesus ngamik surang nemiak mit, dengkah Ya detengah-tengah sidak ³ lalu banai: "Aku madah kitak, antik kitak ndai betobat ngau upa nemiak mit tuk, kitak ndai bakal tamak kalam kerajaan surga. ⁴ Sapa te upa nemiak mit tuk, ya te palin besai alam kerajaan surga. ⁵ Ngau sapa te nyamut nemiak upa tuk alam namaKu, ia nyamut Aku." Sapa te nyesat ke urang ⁶ "Sapa te nyesat ke salah sikuk ari nemiak mit tuk te pecayak ngau Aku, lebih baik bagi ya antik batu kilangan dekebat ke rekung ya lalu detengelam kalam laut. ⁷ Celaka denia ngau semua penyesatan ya: mimang penyesatan kalah bisik, tapi celaka urang te nyuruh yak bisik. ⁸ Antik jari kaki kitak nyuruh kitak sesat, tungkung, buai, lebih baik kitak idup ngau jari kudung atau timpang aripada kaki jari utuh tamak kalam api kekal. ⁹ Ngau antik mata kitak nyesat ke kitak, cukit, buai, lebih baik kitak idup ngau mata sigik, aripada desempalung ke api neraka ngau mata dua. ¹⁰ Kingat ke, nang ngangap ndai sik reti bala nemiak mit tuk. Aku madah kitak: bisik malaikat sidak de surga te selalu ngupuk mua Apai Ku de surga. ( ¹¹ Empadai Anak Mensia datai untuk nyelamat ke te ayap.)" ¹² Tipa penapat kitak? Antik urang bisik seratus ikuk domba, siskuk dentara domba yak ayap, ndai me ya nudi ke te semilan puluh semilan ikuk yak lalu angkat ngegak sikuk te sesat? ¹³ Aku madah kitak: Antik ya berasil nemu sikuk yak, lebih gaga aripada te semilan puluh semilan ¹⁴ Upa yak ugak Apai kita te de surga, ndai kak ngisak ke surang ari bala nemiak tuk ayap." ¹⁵ Antik sama dirik mulah dusa, rara ya kedirik. Antik ya kak ninga, kitak nemu ya antus agik. ¹⁶ Antik ya ndai kak ninga ke kitak, baik surang dua kiyak, isak ke keterang re dua tiga urang saksi, pekara yak tau depecayak. ¹⁷ Antik ya ndai kak ninga ke sidak, padah ke soal yak ngau jemaat. Antik ya ngai ugak ninga ke jemaat, pedak ya sebagai urang te ndai ngelala Allah atau pengumpul cukai. ¹⁸ Aku madah kitak: Sebenar, nama te kitak kebat de denia tuk, bakal tekebat de surga, ngau nama te kitak lecut de denia, bakal te lecut de surga. ¹⁹ Udek Aku madah kitak agik: antik dua urang dentara kitak de denia tuk sepekat mintak nama te kitak kak, pemintak kitak bakal dekabul Apai Ku te de surga. ²⁰ Empadai dini dua atau tiga urang bekumpul alam namaKu, diyak Aku bisik detengah-tengah sidak." ²¹ Udek Petrus datai, banai ngau Yesus: "Tuhan, sampai berapa kalik aku ngampun urang antik sidak mulah dusa ngau aku? Sampai tujuh kalik?" ²² Saut Yesus: "Bukai!" Aku madah mih: Bukai sampai tujuh kalik, tapi sampai tujuh puluh kali tujuh kalik. ²³ Empadai hal kerajaan surga sempama surang raja te kak mulah peritungan ngau anak buah ya. ²⁴ Dah ya kak mulai beritung, dadap ke ngau ya surang te berutang sepuluh ribu talenta. ²⁵ Tapi empadai urang yak ndai mampu ngelunas ke utang ya, raja yak merintah isak ke nyual ya tamai bala bini anak ngau semua reta bena untuk mayar utang ya. ²⁶ Maka anak buah yak sujud nyemah ya, jekuh ya: Sabar lau kejap, bala utang ku bakal kulunas. ²⁷ Lalu tegerak ati raja kasih ngau anak buah yak, dapus ya utang ngau debibas ke ya urang yak. ²⁸ Tapi rama anak buah yak keluar, ya betemu ngau anak buah lain te berutang seratus dinar ngau ya. Ya nangkap urang yak ngau nyekak rekung ya, jekuh ya: Bayar utang mih! ²⁹ Maka sujud kawan ya yak, muhun ngau ya: Sabar lau kejap, utangku bakal kulunas. ³⁰ Tapi ya ngai, deserah ya ke penyara kawan ya yak sampai utang ya lunas. ³¹ Medak piyak, sedih ati bala kaban-kaban ya, sidak ngisah ke yak ngau tuan sidak. ³² Raja yak nyuruh ngumai mensia yak, lalu banai ngau ya: "Ui anak buah te jaik, utang mih dah kuapus empadai mih muhun ngau aku. ³³ Ndai kah mih kalah ngasih kaban mih, upa aku ngasih mih? ³⁴ Maka luat tuan yak, ya deserah ke ngau algojo, sampai utang ya lunas. ³⁵ Apai Ku te de surga bakal piyak ugak ngau kitak, apabila kitak ndai kak ngampun pangan ngau sepenuh ati kitak."