Yohanes pemanik debunuh ¹ Rama yak, berita-berita tentang Yesus datai ke pening Herodes, raja wilayah. ² Udek ya banai ngau anak buah ya: "Tuk me Yohanes pemanik; ya udah bangkit dentara sidak te mati, yak mek nyuruh bala kuasa bekerja alam ya. ³ Empadai Herodes suah nyuruh nangkap Yohanes, metuk ngau menyara ke ya, tekait Herodias, bini Filipus menyadik ya. ⁴ Empadai Yohanes suah ngerara ya, jekuh Yohanes: "Ndai tau mih ngamik Herodias!" ⁵ Herodes ining munuh ya tapi takut ngau urang mayuh te ngakuk Yohanes nabi. ⁶ Tapi rama ari ulang taun Herodes, anak dara Herodias nari detengah-tengah sidak, begaga ke ati Herodes, ⁷ yak nyuruh Herodes besumpah kak merik nama te depintak ya. ⁸ Udah dasut inai ya, nemiak yak banai: "Berik ngau aku dituk kepalak Yohanes pemanik alam talam." ⁹ Udek sedih ati raja, tapi empadai sumpah ya, empadai bala tamu, deperintah ke ya ugak untuk merik ke yak. ¹⁰ Desuruh ya nungkung kepalak Yohanes de penyara. ¹¹ Kepalak Yohanes dengkah alam talam, deberik ke ngau nemiak yak, nemiak yak merik ke ngau umak ya. ¹² Udek datai murid-murid Yohanes pemanik ngamik mayat lalu dekubur. Udek sidak angkat madah ke yak ngau Yesus. ¹³ Udah ninga berita yak, Yesus rari riyak, yak kak angkat ke tempat te sunyik ngau perau. Tapi urang mayuh ninga ngau nurut Ya, bedarat re kuta sidak. ¹⁴ Rama Yesus naik kedarat, ya medak urang mayuh, tegerak ati Ya kasih ke sidak ngau nyemuh ke pemedih sidak. ¹⁵ Dah kak malam, murid-murid Ya datai ngau banai ngau Ya: "Tempat tuk sunyik, ari dah kak malam. Suruh sidak pulai isak sidak meli pemakai de kampung-kampung." ¹⁶ Tapi saut Yesus ngau sidak: "Sidak ndai sah angkat, kitak kalah merik sidak makai." ¹⁷ Saut sidak: "Te bisik ntang kaami dituk cuma limak ruti ngau dua ikuk ikan." ¹⁸ Jekuh Yesus: "Baik ngau Aku kituk." ¹⁹ Udek urang mayuh yak desuruh Ya duduk de rumput. Damik Ya limak ruti ngau dua ikuk ikan yak, Yesus nengadah ke langit, ngucap berkat, udek ruti yak debelah-belah ke Ya, deberik Ya ngau bala murid, bala murid magi ke ngau urang mayuh. ²⁰ Sidak makai sampai kenyang, udek sidak ngumpul ke sisak, dua belas bakul penuh. ²¹ Te tamai makai diak kira-kira limak ribu bala bakas apan temasuk bala inuk ngaau nemiak. ²² Udah yak Yesus nyuruh bala murid Ya naik ke perau ngenulau ke Ya keseberang, sementara Ya nyuruh urang maayuh tadik pulai. ²³ Udah urang mayuh yak desuruh pulai, Yesus naaik katau bukit, bedoa kedirik, rama ari dah kak malam, Ya kedirik diak. ²⁴ Perau bala murid Ya dah jauh re pantai, kenak guncang gelumang empadai ribut kayah. ²⁵ Kira-kira jam tiga malam, Yesus datai ngau sidak bejalai datau aik. ²⁶ Rama bala murid medak Ya bejalai datau aik, sidak tekejut, lalu banai: "Itu hantu!", menciak empadai takut. ²⁷ Tapi Yesus lansung banai ngau sidak: "Tenang! Tuk Aku, nang takut!" ²⁸ Udek Petrus banai ngau Ya: "Tuhan, antik yak Nuan, isak ke aku ngau Nuan kiak, bejalai datau aik." ²⁹ Jekuh Yesus: "Kituk em!" Maka Petrus turun re perau ngau bejalai datau aik nemu Yesus. ³⁰ Tapi rama ya ngasai bisik ribut, ya takut ngau mulai menciak: "Tuhan, tolonglah aku!" ³¹ Sekelin yak Yesus ngulur ke jari, megai ya ngau banai: "U urang te ndai pecayak, nama mih ruh?" ³² Udek sedua naik ke perau, ribut baduk. ³³ Sidak te de perau nyemah Ya, jekuh sidak: "Matang benar mek Nuan tuk anak Allah." ³⁴ Sepenatai de seberang sidak bedarat de Genesaret. ³⁵ Rama Yesus de kelala bala urang detempat yak, sidak madah ke Ya ke semua daerah diyak. Maka semua urang te pedih debaik ngau Ya. ³⁶ sidak ngumuk isak tau nyapai ramai jubahYa. Semua urang te nyapai jubahYa jadi semuh.