Perintah Allah ngau adat istiadat Yahudi ¹ Udek urang Farisi ngau ahli Taurat ari Yerusalem datai ngau Yesus, banai: ² "Nama murid-murid Mih ngelangar ukum ngau adat istiadat inik akik kita? Sidak ndai masuk jari sapan makai." ³ Tapi saut Yesus ngau sidak: "Nama pulah kitak ngelangar perintah Allah demi adat istiadat inik akik kitak?" ⁴ Empadai Allah befirman: Hormat ke apai inai kitak, ngau lagik: Ngau sapa te ngutuk apai ngau inai ya pasti dukum mati. ⁵ Tapi jekuh kitak: Sapa te banai ngau apai ngau inai ya: Nama te bisik ntang aku, te tau deguna ke ngidup kitak, dah ku berik ngau Allah, ⁶ urang yak ndai kalah hotmat ke apak ngau umak ya. Berete jekuh kitak firman Allah ndai beguna demi adat istiadat kitak. ⁷ Ui bala urang te mulah direk baik! Benar me nubuat nabi Yesaya tentang kitak: ⁸ Bansa tuk muji Aku ngau mulut na, padahal ati ya jauh re Aku. ⁹ Pecuma sidak semayang ngau Aku, sedang ke pengajar sidak yak ari mensia." ¹⁰ Udek Yesus ngumai urang mayuh ngau banai ngau sidak: ¹¹ Dinga ke buti: bukai te tamak kalam mulut te najis ke urang, tapi te keluar re mulut, yak te najis ke urang." ¹² Maka bala murid datai ngau batanyak ngau Ya: "Nuan ketau kalau anai Nuan yak dejadi ke senangkan urang-urang Farisi?" ¹³ Saud Yesus: "Bala pentanam te ndai detanam ApaiKu te du surga, bakal decabut ngau akar-akar e. ¹⁴ Isak ke sidak yak. Sidak yak urang butak te ngiring urang butak. Antik urang butak nuntun urang butak, pesti sidak tamak kalam lubang semua. ¹⁵ Lalu Petrus banai ngau Ya: "Jelas ke ngau kami reti perempama Nuan." ¹⁶ Saut Yesus: "Kitak pan nyaruk ugak?" ¹⁷ Ndai mek kitak ketau ke nama te tamak kalam mulut, turun ke perut, debuai de jaman? ¹⁸ Tapi nama ke keluar re mulut berasal ralam ati, yak mek te najis ke urang. ¹⁹ Empadai re ati timul semua pemikir jaik, munuh, zinah, cabul, ncuri, sumpah pelsu ngau hujat. ²⁰ Yak mek te najis ke urang. Tapi makai ngau jari te ndai debasuk ndai najis ke urang. ²¹ Udek Yesus angkat riyak, bejalai lansung ke daerah Tirus ngau Sidon. ²² Urang inuk Kanaan ari daerah yak datai ngau Ya, jekuh ya: "Kasih me ke aku u Tuhan, anak Daud, empadai anak inuk ku kesarung sitan, sisa benar ya." ²³ Tapi Yesus matang ndai sik nyaut. Udek bala murid datai ngau Ya, jekuh sidak: "Suruh ya angkat, ya nurut kita samil menciak merabak." ²⁴ Saut Yesus: "Aku dekirim hanya ngau domba te ayap re Israel." ²⁵ Tapi inuk yak minik ngau nyemah Ya samil banai: "Tuhan, tulung aku." ²⁶ Tapi saut Yesus: "Ndai matut ngamik ruti te desiap ke bagi nemiak lalu desempalung ke ngau ukui." ²⁷ Jekuh inuk yak: "Benar Tuhan, tapi ukui yak makai sisak te jatuk re mija tuan ya." ²⁸ Saut Yesus ngau ya: "U ibuk, besai iman nuan, jadi piyak em upa te kedekak nuan." maka anak ya semuh sekelin yak. ²⁹ Udah nudi daerah yak, Yesus nganyak pantai danau Galilea ngau naik katau bukit lalu duduk diyak. ³⁰ Udek urang mayuh begerumung datai ngau Ya ngemaik urang lumpuh, urang timpang, urang butak, urang bisuk, ngau te bukai, udek ngeletak sidak katau de kaki Yesus, ngau Yesus nyemuh ke sidak. ³¹ Maka tebelenga bala urang mayuh te medak urang bisuk numut banai, urang lumpuh bejalai, urang butak medak, sidak muji Allah Israel. ³² Udek Yesus ngumai bala muridYa ngau banai: "Atiku tegerak ulih belas kasih ngau urang mayuh yak. Udah tiga ari sidak nurut Aku, sidak ndai sik pemakai. Aku ndai kak nyuruh sidak pulai ngau perut lapar, ilak sidak tempisan de jalai." ³³ Saut bala murid Ya: "Tipa kita ngenyang ke urang te pemayuh-mayuh de tempat te sunyik upa tuk?" ³⁴ Tanyak Yesus ngau sidak: "Berapa ruti ntang kitak?" "Tujuh," jawab mereka, "ngau bisik sikit ikan mit." ³⁵ Udek Yesus nyuruh urang mayuh yak duduk de tanah. ³⁶ Udah yak Ya ngamik ketujuh utik ruti ngau ikan-ikan tadik, ngucap syukur, udek melah-melah ke ruti, deberik Ya ngau bala murid, Bala murid magi ke ngau urang mayuh. ³⁷ Sidak te diyak makai sampai kenyang. Udek sidak ngumpul ke sisak ruti, tujuh bakul penuh. ³⁸ Te tamai makai diyak empat ribu bala bakas, apan temasuk bala inuk ngau bala nemiak. ³⁹ Udek Yesus nyuruh urang mayuh yak pulai. Ya naik perau angkat ke Magadan.