Perempama tentang surang pengunsai ¹ Pada ari yak Yesus keluar re langkau yak ngau duduk de tepi lepung. ² Maka urang mayuh begerumung datai ngelingik Ya, yak nyuruh Ya tamak kalam perau ngau duduk alam yak, sedangkan urang mayuh bediri de pantai. ³ Ya mayuh madah ke hal alam perempama ngau sidak. Jekuh Ya: "Bisik urang pengunsai, keluar untuk ngunsai. ⁴ Rama ya ngunsai, kedak benih jatuk de jalai, datai burung, demakai sampai abis. ⁵ Kedak jatuk de tanah te bebatu-batu, benih yak lansung tumuh, empadai bisik tanah sikit. ⁶ Tapi udah tumuh mata panas, jadi layus empadai ndai sik akar. ⁷ Kedak jatuk de belayan durik, udek durik yak makin besai, ngempik ya sampai mati. ⁸ Kedak jatuk de tanah te baik lalu bebuah: bisik te seratus kalik lipat, enam puluh kalik lipat, tiga puluh kalik lipat. ⁹ Sapa te bepening, ya kalaj ninga!" ¹⁰ Maka murid-murid datai, betanyak ngau Ya: "Nama nuan madah sidak dempama ke? ¹¹ Saut Yesus: "Ngau kitak deberik karunia untuk ngetau ke rahasia kerajaan surga, tapi ngau sidak ndai. ¹² Empadai sapa te bisik, ya deberi agik, isak ya mangkin jadi mayuh; tapi sapa te ndai sik, aari ya damik. ¹³ Nyak mek nyuruh Aku banai dempama ke semua ngau sidak; sekalik pun sidak mencelak, sidak ndai medak, sekalik pun sidak ninga sidak ndai nyaruk. ¹⁴ Genap me nubuat nabi Yesaya ngau sidak te madah: Kitak ninga tapi ndai nyaruk, kitak ninga tapi ndai tangap. ¹⁵ Empadai ati bansa tuk dah tebal, pening sidak dah berat ninga, mata sidak dah mpejam, isak nang sidaak medak ngau mata sidak, nang ninga ngau pening sidak, nang nyaruk ngau ati sidak, lalu bekalih ngau Aku nyemuh ke sidak. ¹⁶ Tapi gagalah empadai mata kitak medak, pening kitak ninga. ¹⁷ Aku madah kitak: "Mayuh nabi ngau urang benar kak medak nama te kitaka pedak tapi sidak ndai dapat medak, kak ninga nama te kitak dinga tapi ndai dapat ninga. ¹⁸ dinga ke perempama ke penabur yak. ¹⁹ Tiap urang te ninga tentang kerajaan surga, tapi ndai nyaruk, datai te jaik, ngerebut te dunsai alam ati urang yak; nyak mek benih te dunsai sisi jalai. ²⁰ Benih te dunsai de tanah te bebatu yak urang te ninga firman yak, deterimak ya ngau ati gaga. ²¹ Tapi cuma tan kejap empadai ndai sik akar. Antik datai pemedih ngau sisa empadai firman, mensia yak lansung murtad. ²² Te dunsai de belayan durik yak urang te ninga firman, gudaan denia, ngaua tipu daya kekaya ngempik firman sehingga ndai bebuah. ²³ Te dunsai de tanah te baik, yak urang te ninga firman yak, nyaruk, yak nyuruh ya bebuah, bisik te seratus kalik lipat, enam puluh kalik lipat, tiga puluh kalik lipat." ²⁴ Yesus nerang ke sutik perempama agik ngau sidak, jekuh-Ya: "Hal kerajaan surga sempama urang te ngunsai benih te baik duma ya. ²⁵ Ketengah urang tinuk, datai munsuh ngunsai ke benih lalang dentara genum, lalu angkat. ²⁶ Rama genum yak tumuh ngau terbit, nampak ugak lalang. ²⁷ Udek anak buah urang te mpu uma yak datai ngau banai: "Tuan, benih Nuan unsai duma bukai mek benih te baik? Reni penatai lalang yak? ²⁸ Saut Tuan yak: Munsuh te ngerja yak. Jekuh anak buah ngau ya: Kak ndai nuan, kami ncabut lalang yak? ²⁹ Saut Ya: "Nang, amang genum tamai tecabut, rama kitak nyabut lalang yak. ³⁰ Isak ke sedua tumuh bereta sampai ngetam, rama yak Aku kak banai ngau sidak te ngetam: Kumpul ke lau lalang yak, kebat ngau pun-pun untuk detunu; udek gendum dekumpul, tepuk kalam lupungKu." ³¹ Yesus nerang ke perempama lain agik ngau sidak, jekuh Ya: "Hal kerajaan surga yak sempama igik sesawi, te damik ngau dunsai urang duma ya. ³² Yak igik te palin mit re semua jenis benih, tapi antik dah tumuh, sesawi lebih besai re semua pakuk bukai, ya jadi penugau burung-burung besarang. ³³ Ya madah ke tuk ugaak ngau sidak: "Hal kerajaan surga yak sempama ragi te damik urang inuk, degudak ya kalam tepung terigu tiga sukat sampai khamir semua yak." ³⁴ Semua yak depadah Yesus ngau urang mayuh alam perempama, tik ndai piyak, ndai sik te depadah Ya ngau sidak, ³⁵ isak ke genap firman te depadah nabi: "Aku kak mukak mulutKu, madah ngau perempama, Aku kak nelah hal te tepelabuk mulai re denia peruba jadi." ³⁶ Maka Yesus nudi ke urang mayuh yak lalu pulai. Murid-murid ya datai ngau Ya, banai: "Jelas ke ngau kami reti perempama tentang lalang duma ayak." ³⁷ Ya nyaut, jekuh Ya: "Urang te ngunsai ke benih yak Anak Mensia; ³⁸ uma yak denia. Benih te baik yak anak-anak kerajaan, ngau lalang ana-anak te jaik. ³⁹ Munsuh te ngunsai ke benih lalang yak sitan. Rama ngetam yak ari kiamat, ngau bala te ngetam yak malaikat. ⁴⁰ Maka, upa lalang yak dekumpul ngau detunu kalam api, piyak ugaka mek rama rama ari kiamat. ⁴¹ Anak mensia bakal nyuruh bala malaikat-Ya, ngau sidak bakal ngumpul ke semua te nyesat ke urang, ngau semua urang te mulah pengenyaik ralam kerajaannya. ⁴² Semua yak bakal desempalung kalam dapur api, din kedinga sabak ngau kerit gigi. ⁴³ Rama yak mek urang-urang benar mancak ke cahaya upa mata panas alam kerajaan apai sidak. Sapa te bepening, kalah ninga!" ⁴⁴ "Hal kerajaan surga yak sempama reta te tepelabuk duma, te detemu urang, lalu delabuk ya agik. Empadai gaga ya angkat, nyual semua pemisik ya , udek meli uma yak. ⁴⁵ Upa yak ugak hal kerajaan surga, sempama pedagang te ngegak mutiara te baik. ⁴⁶ Dah detemu mutiara te palin berega yak, ya angkat nyual semua pemisik ya, udek meli mutiara yak." ⁴⁷ "Upa yak ugak hal kerajaan surga, sempama pukat te delabuh ke aik, udek ngumpul ke semua jenis ikan. ⁴⁸ Udah penuh, pukat yak dirit ke pantai, udek sidak sidak ngau ngumpul ke ikan te baik kalam cupai, ngau te jaik debuai sidak. ⁴⁹ Upa yak ugak pada ari kiamat: Malaikat-malaikat datai merarak ke urang jaik re urang baik. ⁵⁰ Lalu nyempalung ke urang jaik ke dapur api; din mek bisik sabak ngau kerit gigi. ⁵¹ Nyaruk kah kitak semua yak?" Saut sidak: "auk, kami nyaruk." ⁵² Maka Yesus banai ngau sidak: "Maka setiap ahli Taaurat te nerimak pengajar ari kerajaan surga yak sempama tuak rumah te ngeluar ke reta te baru ngau lamak ari pemisik ya." Yesus ndai deterimak de nazareat ⁵³ Seudah Yesus temuk bekisah ke perempama tadik, Ya angkat riyak. ⁵⁴ Sepenatai Ya de tempat asal, Yesus ngajar diyak de rumah ibadat sidak. Sidak tebelenga ngau banai: "Reni ya bulih hikmat ngau kuasa, untuk mulah bala mujizat yak? ⁵⁵ Bukai me Ya yak anak tukaang kayu?Bukai me inai Ya te penama Maria, ngau menyadik Ya: Yakobus, Yusuf, Simon, dan Yudas? ⁵⁶ Ndai me semua menyadik inuk Ya tamai kita dituk? Jadi reni Ya bulih semua yak?" ⁵⁷ Lalu sidak keciwa, ngai nerimak Ya. Maka Yesus banai ngau sidak: "Nabi dehormat dini-dini, sebali detempat asala ngau derumah dirik." ⁵⁸ Empadai sidak ndai pecayak, ndai mayuh mujizat dekerja ke Ya diak.