Murid-murid mutik genum ari Sabat ¹ yak, ari Sabat, Yesus bejalai de lahan genum. Empadai lapar, murid-murid-Ya mutik igik genum lalu demakai. ² Medak piyak, urang Farisi banai ngau Ya: "Pedak, murid-murid Mih mulah te ndai desagi ari Sabat." ³ saut Yesus ngau sidak: "Ndai me kitak maca nama te depulah Daud rama ya ngau sidak te tamai ya lapar, ⁴ tipa ya tamak kalam rumah Allah, ngau sidak makai ruti te ndai tau demakai sebali iman-imam? ⁵ Atau ndai me kitak maca alam kitab Taurat, pada ari yak imam-imam ngelangar hukum Sabat de bait Allah, tapi ndai salah? ⁶ Aku madah kitak: Dituk bisik te lebih re bait Allah. ⁷ Antik kitak ensaruk reti firman tuk: Te kedekak Aku bah belas kasih bukai persembahan, tentu kitak ndai ngukum urang te ndai sik salah. ⁸ Empadai Anak mensia Tuhan datau ari Sabat." ⁹ Udah agkat rin, Yesus tamak rumah ibadat sidak. ¹⁰ Diyak bisisk uraang te temati jari sepiak. Sidak nanyak ngau Ya: "Tau kah nyemuh ke urang pada ari Sabat?" Maksud sidak, isak ke taau nyalah ke Ya. ¹¹ Yesus banai ngau sidak: Antik bisik dentara kitak dituk te empu dua ikuk domba, ngau domba kitak tamak kalam lubang pada ari Sabat, ndai kah kitak nangkap udek ngeluar ke domba yak? ¹² Ndai kah mensia lebih berega repada domba? maka taulah mulah te baik pada ari Sabat. ¹³ Udek jekuh Yesus ngau uraang yak: "Surung ke jari mih!" Jari dulur ke ya, maka jari ya lansung semuh, panci upa te sepiak. ¹⁴ Udek urang-urang Farisi keluar bepekat kak munuh Ya. ¹⁵ Tapi Yesus ketau ke rencana sidak, udek rari Ya rin. Yesus Hamba Tuhan 15b Mayuh urang tamai Yesus, ngau Ya nyemuh ke sidak semua. ¹⁶ Ya ndai nyagi sidak madah urang, Ya yak sapa. ¹⁷ Isak ke genap firman te depadah nabi Yesaya: ¹⁸ "Pedak ke, yak HambaKu te Kupilih, te Kukasih, ngau Ya jiwaKu bekenan; Ku kak naruh rohKu katau Ya, ngau Ya bakal madah keukum ngau bansa-bansa. ¹⁹ ndai bebantah, ngau ndai ragak, urang ndai sik ninga ingan Ya dejalai-jalai. ²⁰ Buluh te patah tekulai ndai deputus ke Ya, sumu te ngeredup ndai depadam ke Ya, sampai Ya nyadi ke ukum yak menang. ²¹ Bansa-bansa ngarap ke Ya. ²² Bisik urang te kesarung sitan debaik ngau Yesus. urang yak bisuk ngau butak, udek Yesus nyemuh ke ya, yak nyuruh ya lalu numut banai ngau medak. ²³ Maka, urang mayuh te diak tebelenga, jekuh sidak: "Ya tuk nampak e anak Daud." ²⁴ Tapi rama urang Farisi ninga yak, sidak banai: "Ngau Beelzebul pengulu sitan, Ya ngusir sitan" ²⁵ Tapi Yesus ketau ke pemikir sidak, lalu banai, jekuh Ya: "Setiap kerajaan te perarak pesti benasa, ngau setiap kuta atau rumah tangak te pecah belah ndai tau tan. ²⁶ Upa yak ugak kalau sitan ngusir sitan, sidak pesti tebagi-bagi ngau ngelawan dirik kedirik; tipa kerajaan sidak tau tan? ²⁷ Jadi antik Aku ngusir sitan ngau kuasa Beelzebul, ngau kuasa sapa anak buah kitak ngusir ya? Empadai sidak yak me te jadi hakim kitak. ²⁸ Tapi antik Aku ngusir sitan ngau kuasa roh Allah, maka sebenar kerajaan Allah udah datai ngau kitak. ²⁹ Tipa cara urang tamak ke langkau urang te kuat, ngerebut reta bena antik mensia te kuat yak ndai dekebat dulau? Udah dekebat, baruk mek ya tau ngerampuk langkau yak. ³⁰ Sapa te ndai tamai Aku, ya ngelawan Akau ngau sapa te ndai ngumpul tamai aku, ya nyarak. ³¹ Maka Kumadah kitak: "Semua dusa ngau mejah teradap mensia tau daampun, tapi mejah roh Kudus ndai dapat dampun. ³² Antik urang nelah te nentang anak Mensia, ya tau dampun, tapi te nentang roh Kudus, ya ndai tau dampun, de denia tuk ngau de sebayan sik ndai. ³³ Antik urang madah pun yak baik, baik ugak buah ya; antik pun yak depadah jaik, jaik ugak buah ya, empadai ari buah yak me pun dekelala. ³⁴ U kitak kenturun ular tedung, tipa kitak tau nelah te baik, sedang ke kitak jaik? Empadai te detelah meluap re ati. ³⁵ Urang te baik ngeluar ke te baik ari mpu ya te baik, urang te jaik ngeluar ke te jaik ari mpu ya te jaik. ³⁶ Tapi Aku madah kitak: Setiap anai te sia-sia te detelah urang, kalah depetangung jawab ke ya pada ari pengakiman. ³⁷ Empadai nunak ke anai kitak tau debenar ke ngau tau dukum. ³⁸ Rama yak, ahli Taurat ngau urang Farisi banai ngau Yesus: "Guru, kamai kak medak sutik kecelik re Nuan?" ³⁹ Saut Ya ngau sidak: "Angkatan te jaik ngau ndai setia tuk nuntun kecelik. Tapi ndai sik kecelik te tau deberik selain kecelik nabi Yunus. ⁴⁰ Upa Yunus nugau deperut ikan tiga ari tiga malam, upa yak ugak anak Mensia nugau deperut tanah tiga ari tiga malam. ⁴¹ Rama ari kiamat, urang-uraang Niniwe bangkit tamai angkatan tuk ngau ngukum sidak ugak. Empadai urang-urang Niniwe betubat rama dah ninga kisah Yunus, padahal sebenar te dituk lebih re Yunus! ⁴² Rama ari kiamat, ratu re selatan bangkit tamai angkatan tuk, ngau ngukum sidak ugak. Empadai ratu yaak datai re jungkau belangak kak ninga hikmat Salomo, padahal te dituk lebih re Salomo." ⁴³ "Antik roh jahat keluar re mensia, ya meritau te tempat te ransi ngegak te tau ngau nugau. Tapi ya ndai bulih. ⁴⁴ Udek ya banai: Aku kak bekalih ke langkau te Kuinang subak. Maka ya angkat, lalu nemu langkau yak puang, bersih tesapu, rapi teratur. ⁴⁵ Udek ya keluar, ngemaik tujuh roh te lebih jaik ari pada ya, sidak tamak ngau nugau diak. Maka mensia yak jadi lebih jaik re peruba. Upa yak me perataur angkatan te jaik tuk." ⁴⁶ Rama Yesus ketengah banai ngau urang mayuh diyak, inai ngau menyadik-Ya bediri deluar kak betemu ngau Ya. ⁴⁷ maka bisik surang banai ngau Ya: "Pedak, inai ngau menyadik Nuan deluar, kak betemu ngau Nuan." ⁴⁸ Tapi saut Yesus ngau sidak te madah ke peluluk yak ngau Ya: "Sipa inaiKu? ngau sapa menyadik Aku?" ⁴⁹ Udek jekuh Ya samil nunyuk karah murid-murid-Ya: "Tuk inaiKu ngau menyadikKu! ⁵⁰ Sapa te ngerja penekak ApaiKu de surga, ya yak mek menyadik bakas, menyadik inuk, ya yak mek inaiKu