¹ Udah Yesus bepesan ngau kedua belas murid-Ya, angkat Ya rin, untuk ngajar ngau madah injil alam kuta-kuta sidak. Yesus ngau Yohanes pemanik ² Alam penyara Yohanes ninga pempulah Kristus, ³ udek nyuruh murid-murid ya nanyak ngau Ya: "Nuan kah te kak datai yak? atau kami kalah nunguk urang bukai?" ⁴ Yesus nyaut sidak: "Angkat ngau padah ngau Yohanes kin nama te kitak dinga, nama te kitak pedak: ⁵ urang butak medak, urang tungkut bejalai, urang kusta tahir, urang bangap ninga, urang mati bangkit, ngau urang meskin depadah kabar baik. ⁶ Gagalah urang te ndai kecewa, ngau nolak Aku. ⁷ Udak murid-murid Yohanes angkat, Yesus banai ke Yohanes ngau urang mayuh: "Kak kenama kitak angkat ke padang pasir? Medak buluh te deguncang ribut kin kituk? ⁸ Atau medak urang te bepengau alus? Urang te bepengau alus cucuk nugau de istana raja. ⁹ Jadi, kak kenama kitak angkat kin? Kak medak nabi? Benar me, Ku madah kitak, ya lebih re nabi. ¹⁰ Tentang ya bisik detulis: Pedak, Aku nyuruh utusanKu dulau re Mih, Ya nyiap ke jalai dedepan Mih. ¹¹ Aku madah kitak: Dentara sidak te deperanak ke urang inuk, ndai sik te tampil lebih besai ari Yohanes pemanik, tapi te palin mit alam kerajaan surga, lebih besai re Yohanes pemanik. ¹² Mulai re Yohanes pemanik tampil sampai pituk, kerajaan surga de siring, ngau urang te nyirung kak ngelabak nguasa ¹³ semua nabi ngau kitab Taaurat benubuat sampai Yohanes tampil ¹⁴ ngau antik kitak kak nerimak ya, ya yak me Elia te kak datai. ¹⁵ Sapa te bepening, ya kalah ninga. ¹⁶ Ngau nama Kunyemak ke sidak tuk? Sidak tuk upa nemiak te duduk de pasar te banai ngau kaban-kaban ya: ¹⁷ Kami nyepu terempit bagi kitak, Tapi kitak ndai nari, Kami nyanyi ke kidung duka, Tapi kitak ndai bekabung. ¹⁸ Empadai Yohanes datai, ya ndai makai, ndai minum, sidak madah: Ya kesarung sitan. ¹⁹ Udek Anak mensia datai, ya makai, minum, sidak madah: Pedak ke, Ya urang muluk ngau peminum, kaban pengumpul cukai ngau urang bedusa. Tapi hikmat Allah debenar ke ulih pempulah ya." ²⁰ Udek Yesus ngecam kuta-kuta te ndai betubat, walaupun diak Ya mayuh mulah mujizat. ²¹ "Celaka kitak Khorazim! Celaka kitak Betsaida! Sekira de Tirus ngau Sidon jtejadi mujizat upa te arah kitak, sidak pasti udah lamak betubat. ²² Aku madah kitak: Pada ari pengakiman, te detangung Tirus ngau Siddon lemput re tangungan kitak. ²³ Ngau kitak Kapernaum, Nama kitak kak denaik sampai ke langit? Ndai, kitak bakal deturun sampai ke sebayan! Empadai antik de Sodom tejadi mujizat upa te ntang kitak, pesti kuta yak gik bediri sampai ari tuk. ²⁴ Aku madah kitak: Pada ari pengakiman, negeri Sodom lebih lemput ari tangungan kitak. ²⁵ Rama yak banailah Yesus: "Aku besukur ngau Nuan Apai, Tuhan langit ngau bumi, empadai semua yak Nuan labuk bagi urang te bijak ngau numut, tapi Nuan padah bagi urang mit. ²⁶ U Apai, yak me te bekenan ngau Nuan. ²⁷ Semua dah deserah ke Apai ngau Aku, ndai sik urang te ngelala Anak selain Apai, ndai sik te ngelala Apai selain Anak ngau urang te depecayak Anak. ²⁸ ngau Aku semua te letih lesu, bebeban berat, Aku kak nyuruh kitak lega. ²⁹ San kuk te Kupasang, ngau belajar ngau Aku, empadai aku lemah lembut ngau ndai sumung, udek jiwa kitak bulih ketenangan. ³⁰ Empadai kuk te Kupasang yak lemput, udek beban Aku sik lemput.