Yesus ngumai kedua belas rasul ¹ Yesus ngumai kedua belas murid ngau merik sidak kuasa ngusir sitan, nyemuh ke pemedih. ² Tuk nama kedua belas yak: Simon te dejenang Petrus ngau Andreas menyadik ya, Yakobus anak Zebedeus ngau Yohanaes menyadik ya, ³ Filipus ngau Bartolomeus, Tomas ngau Matius pengumpul cukai, Yakobus anak Alfeus, ngau Tadeus. ⁴ Simon urang Zelot ngau Yudas Iskariot te behianat ngau Yesus. ⁵ Yesus bepesan ngau kedua belas murid te dekirim Ya: "Nang kitak nyelimpang ke jalai bansa bukai, ngau nang kitak tamak ke kuta urang Samaria, ⁶ Tapi kitaka kalah angkat ngau domba-domba te ayap ari umat Israel. ⁷ Angkat ngau padah: Kerajaan Surga udah damping. ⁸ Semuh ke urang pedih, bangkit ke urang mati, tahir ke urang kusta, usir kebe sitan. Kitak udah bulih yak ngau cuma-cuma, maka berik ke yak ngau cuma-cuma ugak. ⁹ Nang kitak ngemaik mas, pirak, temaga alam pengetang pungung kitak. ¹⁰ Nang kitak ngemaik bekal selamak bejalai, nang ngemaik baju dua lamar, sanai ngau tungkat, empadai pekerja patut bulih upah. ¹¹ Antik kitak kuta atau disa, gegak urang te tau detumpang, nugau diyak sampai kitak angkat. ¹² Antik kitak tamak langkau urang, berik salam ngau sidak. ¹³ Antik sidak patut nerimak, salam yak turun atau kepalak sidak, tapi antik ndai, salam yak pulai ngau kitak agik. ¹⁴ Antik uraang ndai kak nerimak kitak alam langkau ya, ngau ndai kak ninga te jekuh kitak, keluar dudi ke langkau atau kuta yak, kibas ke debu re kaki kitak. ¹⁵ Aku madah kitak: Pada ari pengakiman, tanah Sodom ngau Gomora lebih lemput tangungan aripada kuta yak. ¹⁶ Pedak, Aku ngirim kitak upa domba ketengah-tengah serigala, maka kitak kalah pintar upa ular, tulus upa merpati. ¹⁷ Tapi kalah waspada ngau semua urang; empadai bisik te kak nyerah ke kitak ngau majelis agama, ngau sidak bakal nyesah kitak de ibadat sidak. ¹⁸ Empadai aku, kitak diring ngau penguasa-penguasa, ngau raja-raja, isak jadi kesaksi bagi sidak ngau bala urang ndai ngelala Allah. ¹⁹ Antik sidak nyerah ke kitak, kitak ndai sah gaduh ke nama te kak depanai, empadai semua yak bakal Ku berik ngau kitak rama yak ugak. ²⁰ Empadai bukai kitak te banai tapi Roh Apai kita; Ya te banai alam kitak. ²¹ Urang nyerah ke menyadik untuk debunuh, piyak ugak apai ngau anak. Anak meruntak ngau urang tuai, ngau munuh sidak. ²² Ngau kitak bakal debencik semua urang empadai nama Aku; tapi urang te betahan sampai kebaduk, bakal selamat. ²³ Antik sidak nisa kitak de kuta sutik, kitak rari ke kuta bukai; Aku mdah kitak: sapan kitak temuk nengah kuta-kuta de Israel, Anak mensia udah datai. ²⁴ Murid ndai lebih aripada guru, anak buah ndai lebih ari tuan ya. ²⁵ Antik murid dah sama ngau guru, anak buah dah sama ngau tuan ya, yak udah cukup. Antik tuak langkau depadah Beelzebul, apalagik mek isik ya. ²⁶ Kitak ndai sah takut ngau sidak, empadai ndai sik te tetutup te ndai debukak, ngau ndai sik te tepelabuk te ndai deketau. ²⁷ Nama te kupadah ngau kitak alam keleman, kitak padah alam ladak, ngau nama te Kubisik ke pening kitak, padah ke yak ari atau atap langkau. ²⁸ Nang takut ke sidak te tau munuh tubuh, tapi ndai dapat munuh jiwa; tapi kitak kalah takut ngau Ya te tau munuh tubuh ngau jiwa alam neraka. ²⁹ Ndai kah burung pipit dejual dua ikuk seduit? tapi ndai sik sikuk te tau jatuk ke tanah deluar kedekak Apai kita. ³⁰ Ngau kitak, buk de kepalak kitak teritung semua. ³¹ Maka kitak nang takut, kitak lebih berega re burung pipit. ³² Setiap urang te ngakuk aku de depan mensia, aku ngakuk ya de depan Apai Ku de surga. ³³ Tapi sapa te nyaangkal Aku de mua mensia, Aku nyangkal ya ugak de mua Apai Ku de surga. ³⁴ Nang kitak ngira kalau Aku datai ngemaik damai datau bumi; Aku datai bukai ngemaik damai tapi pedang. ³⁵ Empadai Aku datai kak merarak urang re apak ya, anak inuk re inai ya, menantu re mentua ya, ³⁶ ngau munsuh urang yak, bala urang seisik rumah ya. ³⁷ Sapa te ngasih Apai Inai ya lebih re pada Aku, ya ndai layak bagi Aku; sapa te ngasih anak bakas atau anak inuk lebih re pada Aku, ya ndai layak bagi Aku. ³⁸ Sapa te ndai ngesan salib ngau tamai Aku, ya ndai layak bagi Aku. ³⁹ Sapa te ngait nyawa, nyawa ya ayap, sapa te ayap nyawa empadai Aku, ya bulih nyawa ya agik. ⁴⁰ Sapa te nyamut kitak, ya nyamut Aku, sapa te nyamut Aku, ya nyamut Apai te ngirim Aku. ⁴¹ Sapa te nyamut nabi sebagai nabi, ya bulih upah nabi, sapa te nyamut urang benar sebagai urang benar, ya bulih upah urang benar. ⁴² Sapa te merik secawan aik celap ngau salah sikuk murid Aku, Kumadah kitak: Ya pasti bulih upa dari ya."