Urang tungkut desemuh ke ¹ Udah yak, Yesus naik kalam perau, lalu nyemerang. Udek ya datai ke kuta-Ya. ² Debaik sidak ngau Ya urang te tungkut te galai de kasur. Rama Yesus medak iman sidak, banai Ya ngau urang lumpuh yak: "Pecayak ke, ui anak-Ku, dosamu dirik dah dampun." ³ Banai me bala ahli Taurat alam ati: "Ya ngujat Allah." ⁴ Tapi Yesus ketau ke pemikir sidak, udek banai: "Nama kitak mikir ke te jaik alam kitak? ⁵ Ni te lebih mudah, madah: Dosa dirik dah daampun, atau: Angkat me, bejalai udek? ⁶ Isak ke kitak ketau kalau de denia tuk Anak mensia bekuasa ngampun dusa"-Udek Ya banai ngau urang te tungkut yak-:'Angkat, katung peninuk yak, pulai kin! ⁷ Udek mensia yak lalu angkat ngau pulai. ⁸ Udek urang mayuh te medak hal yak takut, lalu ngemulia ke Allaah te udah merik kuasa sampai upa yak ngau mensia. Matius pengumpul pajak tamai Yesus ⁹ Seudah Yesus angkat riyak, Ya medak urang te penama Matius duduk de rumah cukai, banai ngau ya: "Tamai aku." Udek Matius bediri lalu tamai Ya. ¹⁰ Rama Yesus makai de langkau Matius, mayuh datai bala pengumpul cukai ngau urang bedusa makai tamai Ya ngau murid-murid Ya. ¹¹ Rama urang Farisi medak yak, sidak banai ngau murid-murid Yesus: "Nama guru kitak makai tamai pengumpul cukai ngau rang bedusa?" ¹² Yesus ninga ngau banai: "Bukai urang sihat te perlu ke tabib tapi urang pedih. ¹³ Jadi angkat ngau pelajar ke reti firman tuk: Te Kukedekat yak belas kasih, bukai persembahan, empadai aku datai bukai kak ngumai urang te benar, tapi urang bedusa." ¹⁴ Udek murid-murid Yohanes datai ngau Yesus, banai: "Nama kami ngau urang-urang Farisi bepuasa, tapi murid-murid Nuan ndai?" ¹⁵ Saut Yesus ngau sidak: "Tau kah bala kaban pengantin bakas beduka selamak pengantin yak tamai sidak? Tapi masa yak bakal datai pengantin yak damik re sidak, rama yak me sidak puasa. ¹⁶ Ndai sik surang pun te namal ke kain te baik ngau te jaik, empadai antik piyak, penamal yak ngerusak baju baik. ¹⁷ Piyak ugak anggur te baru ndai detepuk ke kantung kulit te tuai, empadai antik piyak, kantung yak teridang, anggur yak tebuai ngau kantung ancur. Tapi anggur te baru detaruh alam kantung te baru ugak, piyak me isak teintu kedua-dua yak." ¹⁸ Ketengah Yesus banai ngau sidak, datai kepalak rumah ibadat, lalu nyemah Ya, banai: "Anak ku te inuk baruk dah luput, tapi datai ngau engkah ke jari Nuan katau ya, pasti ya idup." ¹⁹ Udek Yesus ngau murid-murid-Ya angkat namai retuai yak. ²⁰ Rama yak bisik urang inuk te udah 12 taun kenak pedih pendarahan maju damping ke Yesus ari belakang, nyapai ramai jubah-Ya. ²¹ Empadai jekuh ya alam ati: "Asal ku japai ramai jubah-Ya, aku pesti semuh." ²² Tapi Yesus malik ngau medak ya, udek banai: "Teguh ke ati dik, u anak-Ku, iman dik dah nyelamat ke dik." Mulai ari yak inuk yak semuh. ²³ Rama Yesus datai ke rumah kepalak ibadat, Ya medak urang mayuh ragak, ngau sidak nyepu terempit, ²⁴ banai Ya: "Angkat kin, empadai nemiak tuk ndai mati tapi tinuk." Tapi sidak ketawak ke Ya. ²⁵ Udah uraang mayuh yaak dusir, Yesus megai jari nemiak yak, nemiak yak lalau bangkit. ²⁶ Udek berita yak tesebar kesemua daerah diyak. ²⁷ Rama Yesus angkat rin kak bejalai agik, dua urang te butak nurut Ya samil banai: "Kasih ke kami u Anak Daud." ²⁸ Udah Yesus tamak kalam rumah, datai dua urang butak ngau ya, Yesus nanyak sedua: "Pecayak kah kitak aku tau ngerja yak?" Saut sedua: Ya Tuhan kami pecayak." ²⁹ Udek Yesus nyapai mata sedua, samil banai: "Upak ya mek sesuai ngau iman kitak." ³⁰ Mata sedua menclak sekelin. Yesus bepesan tegas ngau sedua, jekuh Ya: "jaga bah, nang sampai bisik urang ketau soal tuk." ³¹ Tapi sidak nyebar ke kisah yak sekamat daerah yak. ³² Ketengah sedua te butak keluar, urang bisuk te kesarung sitan debaik ngau Yesus. ³³ Udah sitan dusir, urang bisuk jadi tau banai, yak te nyuruh urang mayuh iran, jekuh sidak: "Te upa tuk apan suah depedak urang de Israel." ³⁴ Tapi urang Farisi banai: " Ngau kuasa pengulu sitan Ya ngusir sitan." ³⁵ Upa yak mek Yesus ngelingik kuta ngau disa; Ya ngajar de rumah ibadat ngau madah ke injil kerajaan surga ngau nyemuh ke semua pemedih. ³⁶ Medak urang mayuh, tegerak ati Yesus ngau belas kasih, empadai sidak udah ndai turus, upaa domba te ndai sik gembala. ³⁷ Jekuh Ya ngau murid-murid Ya: Tuaian mayuh tapi pekerja sikit. ³⁸ Maka mintaklah ngau tuan te ngempu tuaian yak, isak ya ngirim pekerja-pekerja untuk tuaian yak