Urang te butak mulai re mit ¹ Rama Yesus ketengah ngelalu, Ya medak uraang te butak mulai re lahir. ² Murid-murid nanyak Ya: "Rabi, sapa te mulah dusa, urang tuk kedirik atau apai inai ya, nyuruh ya tuk delahir ke butak?" ³ Saut Yesus: "Bukai ya, bukai ugak urang tuai ya, tapi empadai kereja-kereja Allah kalah depadah alam ya. ⁴ Kita kalah ngereja ke kereja YA te ngutus Aku, selamak agik lawas, bakal datai malam, dini ndai sik sikuk urang te tau kereja. ⁵ Selamak Aku alam denia, Aku mek terang denia." ⁶ Udah Ya madah semua yak, Ya ngeludah ke tanah, nguncau ludah yak ngau tanah, udek degulai ke mata urang te butak tadik ⁷ udek banai ngau ya: "Angkat, baduk ke dirik k'alam kulam Siloam." Siloam rete yak "Te D'utus." Maka angkat urang yak, ya masuk dirik udek bekalih ngau mata dah mencelak. ⁸ Tapi bala tetangga ngau urang te ngelala ya sebagai pengemis, banai: "Bukai mek ya tuk te seruntik ngemis?" ⁹ Bisik te banai: "Benar, yak me ya." Bisik ugak urang te madah: "Bukai, tapi ampir sama ngau ya." Mensia yak kedirik banai: "Benar, aku me yak." ¹⁰ Jekuh sidak ngau ya: "Tipa mata mih tau mencelak?" ¹¹ Saut ya: "Urang te depadah Yesus yak ngaduk tanah, ngulai yak ke mata aku samil banai: Angkat ke Siloam, masuk dirik diak. Udek aku angkat, udah masuk dirik, aku tau medak." ¹² Udek jekuh sidak ngau ya: "Dini Ya?" Saut ya: "Aku ndai ketau." ¹³ Udek sidak ngemaik urang te butak tadi ngau urang-urang Farisi. ¹⁴ Rama Yesus ngaduk tanah ngau mencelak ke mata mensia yak, ari Sabat. ¹⁵ Nyak nyuruh urang-urang Farisi nanyak, tipa mata ya medak. Saut ya: "Ya ngulai ke tanah te dah d'aduk yak ke mata aku, nyak nyuruh aku medak." ¹⁶ Jekuh urang-urang Farisi kedak: "Urang tuk ndai datai re Allah empadai Ya ndai nyaga ari Sabat." Udek kedak madah: "Tipa urang te bedusa mulah mujizat te piak?" Udek timul padu dentara sidak. ¹⁷ Udek jekuh sidak ugak ngau urang te butak tadik: "Ngau mih, menurut mih sapa Mensia yak, empadai Ya dah mencelak ke mata mih?" Saut ya: "Ya seurang nabi." ¹⁸ Tapi urang-urang Yahudi ndai pecayak, ya tadik butak ngau pituk tau medak agik, sampai sidak ngumai urang tuai ya ¹⁹ ngau betanyak ngau sidak: "Tuk nama anak kitak, te depadah kitak butak mulai re lahir? Antik piak tipa pitu ya tau medak?" ²⁰ Saut urang tuai yak: "Te kami ketau, ya anak kami, ngau ya butak mulai re lahir, ²¹ tapi tipa ya tau medak kami ndai ketau, ngau sapa urang te mencelak ke mata ya, kami ndai ketau ugak. Tanyak ngau ya, ya udah besai, ya numut banai untuk dirik ya." ²² urang tuai ya banai miak, empadai sidak takut ngau urang-urang yahudi, empadai sidak dah bepekat, antik bisik uraang te ngakuk Ya Mesias, dekucil ke sidak. ²³ Nyak me nyuruh urang tuai ya madah: "Ya dah besai, tanyaak ke ngau ya kedirik." ²⁴ Udek sidak ngumai sekalik agik mensia te butak, banai ngau ya: "Padah ke kebenar dadap Allah; empadai kami ketau Mensia yak urang bedusa." ²⁵ Saut ya: "Mensia yak bedusa aatau ndai, aku ndai ketau, tapi te pesti ku ketau yak, aku peruba butak, udek pituk ku tau medak." ²⁶ Jekuh sidak ngau ya: "Nama te udah depulah Ya ngau mih? Tipa ya mencelak ke mata mih?" ²⁷ Saut ya: "Dah kupadah ngau kitak, kitak te ndai kak ninga, nama pulah kitak kak ninga yak agik? Amang ku kitak kak jadi murid Urang yak ugak?" ²⁸ Samil ngelinyak sidak banai ngau ya: "Mih murid Urang yak, kami tuk murid-murid Musa. ²⁹ Kami ketau, Allah dah befirman ngau Musa, tapi tentang Mensia yak kami ndai ketau reni penatai." ³⁰ Saut mensia yak ngau sidak: "Iran ugak antik kitak ndai ketau reni penatai Ya, sedang ke Ya dah mencelak ke mata aku." ³¹ kita ketau, Allah ndai ninga ke urang-urang bedusa, tapi urang benar te ngereja penekak YA. ³² Ari meliak sampai pituk pan suah ninga bisik urang te tau mencelak ke mata urang te lahir butak. ³³ Antik urang yak ndai datai re Allah ndai sik numut nama-nama." ³⁴ Saut sidak: "Mih tuk lahir alam dusa, mungkak mih kak ngajar kami? Udek sidak ngusir ya keluar. ³⁵ Yesus ninga ya d'usir sidak keluar. Udek Ya betemu ngau ya, banai: "Pecayak ndai mih ngau Anak Mensia?" ³⁶ Saut ya: "Sapa Ya? Tuhan? te nyuruh ku pecayak ngau Ya." ³⁷ Jekuh Yesus ngau ya: "Mih bukai cuma medak Ya, tapi Ya te ketengah banai ngau mih, Ya me yak!" ³⁸ Jekuh ya: "Aku pecayak, Tuhan!" udek ya sujud nyemah Ya. ³⁹ Jekuh Yesus: "Aku datai k'alam denia untuk ngukum, isak urang te ndai tau medak, tau medak, ngau sapa te medak jadi butak." ⁴⁰ Anai yak dedinga urang Farisi te nugau diak, udek sidak banai ngau Ya: "Nama yak berete kami butak ugak?" ⁴¹ Saut Yesus ngau sidak: "Sekira kitak butak, kitak ndai bedusa, tapi empadai kitak banai: kami medak, nyak nyuruh tetap me dusa kitak."