Gembala te baik ¹ "Aku madah kitak: Sapa te tamak kalam kan'ang domba ngau cara ngelangkah pagar, ya pencuri atau perampuk; ² tapi sapa te tamak ngelalu lawang, ya yak gembala domba. ³ Penyaga mukak lawang untuk ya, domba-domba ninga ke ingan ya, ngau ya ngumai domba-domba ya nunak ke nama sidak, udek ya ngiring sidak keluar. ⁴ Antik semua domba dah debaik ya keluar, ya belajar de mua sidak, sidak nurut re belakang empadai sidak ngelala ingan ya. ⁵ Tapi ingan urang nyaruh, sidak ngai tamai, malah ke sidak rari, empadai uraang nyaruh yak ndai sidak kelala." ⁶ Yak me te depadah Yesus alam perempamaan ngau sidak, tapi sidak ndai nyaruk nama maksud te jekuh Ya banai piak ngau sidak. ⁷ Jekuh Yesus sekalik agik: "Aku madah kitak, sebenar Aku tuk me lawang ngau domba-domba yak. ⁸ Semua urang te datai se'apan Aku, nyak pencuri ngau perampuk, ngau domba-domba yak ndai ninga ke sidak. ⁹ Aku me lawang; barangsapa tamak ngelalu Aku, ya bakal selamat, ngau ya bakal tamak ngau keluar ngau nemu ke padang rumput. ¹⁰ Pencuri datai cuma kak encuri, munuh ngau ngemenasa; Aku datai isak urang bisik ngempu idup, bisik alam semua kelimpah. ¹¹ Aku me gembala te baik. Gembala te baik merik ke nyawa bagi domba-bomba ya; ¹² sedang ke urah te d'upah te bukai gembala, ngau te bukai ngempu domba-domba yak, rama medak serigala datai, nudi ke domba-domba yak rari, nyak nyuruh serigala yak ngeransik ngau ngererak domba-domba yak. ¹³ Ya rari empadai ya urang te d'upah ngau ndai merati ke domba-domba yak. ¹⁴ Aku me gembala te baik, Aku ngelala domba-domba Ku, ngau domba-domba Ku ngelala Aku ¹⁵ sama upa Apai ngelala Aku, ngau Aku ngelala Apai, ngau Aku merik ke nyawa Ku ngau domba-domba Ku. ¹⁶ Bisik agik ntang Ku domba-domba bukai, te bukai re sangkar tuk; domba-domba yak kalah Ku iring ugak, sidak bakal ninga ingan Ku, ngau sidak jadi sekaban ngau sikuk gembala. ¹⁷ Apai ngasih Aku, empadai Aku merik ke nyawa Ku isak bulih agik. ¹⁸ Ndai sik urang te ngamik yak re Aku, tapi Aku merik ke yak menurut penekak Aku kedirik. Aku bekuasa merik ke yak, ngaau bekuasa ngamik yak agik. Tuk mek tugas te Ku terimaak re Apai Ku." ¹⁹ Nyak nyuruh tim'ul ugak pebantah de'ntara urang-urang Yahudi empadai anak yak. Mayuh de'ntara sidaak banai: ²⁰ "Ya kesarung sitan ngau gila; nama kitak ninga ke Ya?" ²¹ Te bukai banai: "Yak bukai anai uraang kesarung sitan; tau nama sitan mencelakke mata urang butak?" ²² Ndai lamak udah yak, senta ari raya Pentahbisan Bait Allah de Yerusalem; rama yak kemprah celap. ²³ Ngau Yesus bejalai-bejalai de Bait Allah de seramik Salomo. ²⁴ Nyak nyuruh urang-urang Yahudi ngelingik Ya ngau banai ngau Ya: "Berapa lamak agik Mih ngisak ke kami idup bingung? Antik Mih Mesias, padah ke bebuti (terus terang) ngau kami." ²⁵ Yesus nyaut sidak: "Aku udah madah ke yak ngau kitak, tapi kitak ndai pecayak; kereja-kereja te Ku pulah alam nama Apai Ku, yak me te merik kesaksian tentang Aku, ²⁶ tapi kitak ndai pecayak, empadai kitak ndai temasuk domba-domba Ku. ²⁷ Domba-domba Ku ninga ke ingan Aku, ngau Aku ngelala sidak, ngau sidak namai Aku, ²⁸ ngau Aku merik ke idup kekal ngau sidak, ngau sidak ndai bakal benasa sampai page lusak, ngau ndai sik urang tau ngerebut sidak re jari Ku. ²⁹ Apai Ku te merik ke sidak ngau Aku, lebih besai re semua urang bukai, ngau ndai sik urang te tau ngerebut sidak re jari Apai. ³⁰ Aku ngau Apai sutik." ³¹ Sekalik agik urang-urang Yahudi ngamik batu ngau nikam Yesus. ³² Jekuh Yesus ngau sidak: "Mayuh pempulah baik te te berasal re Apai Ku te Ku padah ngau kitak; pempulah sutik ni te nyuruh kitak kak nikam Aku?" ³³ Saut urang-urang Yahudi yak: "Bukai empadai pempulah baik, kami kak nikam Mih, tapi empadai Mih ngujat Allah, ngau Mih te cuma mensia, nyama ke dirik ngau Allah." ³⁴ Jekuh Yesus ngau sidak: "Ndai nama bisik tetulis alam kitab Taurat kitak; Aku dah befirman: kitak allah? ³⁵ Antik sidak, ngau sapa firman yak depadah, dekumai allah-,-sedang ke Kitab Suci ndai tau balang-, ³⁶ agik gak kitak banai ngau Ya te dekudus ulih Apai, ngau te dah dutus YA kalam denia: Mih ngujat Allah? ³⁷ Antik Aku ndai ngereja ke kereja-kereja Apai Ku, nang pecayak ngau Aku, ³⁸ tapi antik Aku ngereja yak, ngau kitak ndai kak pecayak ngau Aku, pecayak na ke kereja-kereja yak, isak kitak tau ketau ngau nyaruk, bahwa Apai alam Aku ngau Aku alam Apai." ³⁹ Sekalik agik sidak ngencuba nangkap Ya, tapi Ya lepas de jari sidak. ⁴⁰ Udek Yesus angkat agik ke seberang Yordan, ke pengkerang Yohanes bemanik subak, udek Ya nugau diak. ⁴¹ Ngau mayuh urang datai ngau Ya, ngau banai: "Yohanes ndai suah mulah kecelik barang sutik, tapi semua te suah depadah Yohanes tentang urang tuk benar." ⁴² Ngau mayuh urang diak pecayak ngau Ya.