Lazarus debangkit ke ¹ Bisik urang te ketengah pedih, nama ya Lazarus. Ya nugau de Betania, kampung Maria sedua adik ya Marta. ² Maria yak me inuk te suah ngeminyak kaki Tuhan ngau minyak mur ngau ngelap yak ngau buk ya. ³ Ngau Lazarus te pedih yak menyadik ya. Inuk dua urang yak merik peluluk ngau Yesus: "Tuhan, ya te nuan kasih, pedih." ⁴ Rama Yesus ninga peluluk yak, Ya banai: "Pemedih yak ndai nyuruh mati, tapi madah ke kemuliaan Allah, empadai ulih pemedih yak, Anak Allah demulia ke." ⁵ Yesus asal te ngasih Maria sidak tiga anyadik. ⁶ Tapi udah Ya ninga Lazarus pedih, Ya semaja nugau dua ari agik de pengkerang Ya nugau; ⁷ tapi udah yak, Ya banai ngau murid-murid Ya: "Buh kita bekalih agik ke Yudea." ⁸ Murid-murid banai ngau Ya: "Rabi, pan lamak tuk urang-urang Yahudi ncuba nikam Nuan, agik kak Nuan bekalih kin?" ⁹ Saut Yesus: "Ndai me bisik dua belas jam alam se'ari, sapa te bajalai lawas ari, kaki ya ndai tesentuk, empadai ya medak terang denia tuk. ¹⁰ Tapi antik urang bejalai malam ari, kaki ya tesentuk, empadai ndai sik terang alam dirik ya." ¹¹ Piak me anai Ya, udah yak Ya banai ngau sidak: "Lazarus menyadik kita, ya tetinuk, tapi Aku angkat kin kak neguk ya." ¹² Jekuh murid-murid yak ngau Ya: "Tuhan, antik ya tetinuk, ya bakal sem'uh." ¹³ Tapi te demaksud ke Yesus yak mati, sangkak sidak yesus bebenar madah ke tetinuk upa selama. ¹⁴ Nyak nyuruh Yesus banai ngau terus terang: "Lazarus dah mati; ¹⁵ tapi sukur Aku ndai sik din rama yak, upa yak lebih baik bagi kitak, isak kitak tau belajar pecayak. Buh kita angkat kin ngau ya pituk." ¹⁶ Udek Tomas, te dejenang Didimus, banai ngau kaban-kaban ya, murid-murid bukai: "Buh kita kin ugak, isak mati tamai Ya." ¹⁷ Rama Yesus datai, Ya nemu Lazarus dah empat ari alam kubur. ¹⁸ Betania teletak damping ngau Yerusalem, kekira dua mil penyauh. ¹⁹ Diak mayuh urang Yahudi dah datai ngau Maria sedua untuk ngibur sidak, empadai menyadik sidak te mati. ²⁰ Rama Marta ninga Yesus datai, ya angkat kak betemu, ngau Maria dudi de rumah. ²¹ Jekuh Marta ngau Yesus: "Tuhan, sekira Nuan dituk, menyadik ku pasti ndai mati. ²² Tapi pituk sik aku ketau, Allah pesti merik semua utaai te Nuan pintak re YA." ²³ Jekuh Yesus ngau Maria: "Menyadik kitak bangkit." ²⁴ Jekuh Marta ngau Ya: "Aku ketau antik ya bangkit tamai bala urang rama kebaduk jaman." ²⁵ Saut Yesus: "Aku tuk me kebangkitan ngau idup; barangsapa pecayak ngau Aku, ya tetap idup biarpun ya dah mati, ²⁶ ngau setiap urang te idup te pecayak ngau Aku, ndai mati sampai page lusak. Pecayak ndai dik ke hal tuk?" ²⁷ Saut Marta: "Auk Tuhan, aku pecayak, Nuan Mesias, Anak Allah, te datai k'alam denia." ²⁸ Udah banai miak, ya angkat ngumai menyadik ya Maria, bebissik ngau ya: "Guru bisik din, Ya ngumai dik." ²⁹ Ninga miak, Maria angkat nemu Yesus. ³⁰ Tapi rama yak Yesus paan datai ke kampung yak, Ya agik nugau de pengkerang Marta nemu Ya. ³¹ Rama urang-urang Yahudi te tamai Maria de rumah, medak Maria angkat keluar, sidak nurut ya, desangkak sidak ya kak angkat ke kubur. ³² Sepenatai Maria re pengkerang Yesus nugau, ya tesungkur de kaki, banai ngau Ya: "Tuhan, sekira Nuan bisik dituk, menyadik ku pasti ndai mati." ³³ Rama Yesus medak Maria nyabak ngau urang-urang Yahudi te tamai ya, tegerak ati Ya. Ya banai: ³⁴ "Dini ya depegalai kitak?" Saut sidak: "Tuhan, buh pedak!" ³⁵ Yesus nyabak. ³⁶ Jekuh urang-urang Yahudi: "Pedak, besai nar kasih Ya ngau ya!" ³⁷ Tapi sidak kedak banai: "Ya te mampu mencelak ke mata urang butak, ndai sangup nama ya mulah isak mensia yak ndai mati?" ³⁸ Udek Yesus angkat ke kubur. Kubur yak upa gua, detutup ngau batu. ³⁹ Jekuh Yesus: "Angkat batu yak!" Marta, menyadik mensia te mati banai ngau Ya: "Tuhan, ya udah bau, dah empat ari ya mati." ⁴⁰ Saut Yesus: "Ndai me udah Kupadah ngau kitak: "Antik kitak pecayak, kitak bakal medak kemuliaan Allah?" ⁴¹ Udek sidak ngatung batu yak. Yesus nenguak katau samil banai: "Apai, Aku ngucap sukur ngau Nuan empadai dah ninga ke Aku. ⁴² Aku ketau Nuan ninga ke Aku seruntik, tapi empadai urang mayuh ngelingik Aku dituk, Aku madah miak, isak sidak pecayak, Nuan te ngutus Aku." ⁴³ Udah banai miak, Ya bingan ngau ingan kayah: "Lazarus, keluar kituk!" ⁴⁴ Urang te udah mati yak lansung keluar, kaki jari ya agik tebalut kain kapan, ngau mua ya agik detutup kain peluh. Jekuh Yesus ngau sidak: "Bukak ke kain-kain yak, isak ya angkat." ⁴⁵ Mayuh dentara urang-urang Yahudi te datai ngau medak nama te dah depulah Yesus, pecayak ngau Ya. ⁴⁶ Tapi bisik urang te angkat ngau urang-urang Farisi, ngau madah ngau sidak nama te depulah Yesus. ⁴⁷ Udek imam-imam kepalak ngau urang-urang Farisi ngumai Mahkamah Agama untuk bekumpul, ngau sidak banai: "Nama te kalah kita pulah? Empadai urang yak mayuh mulah mujizat. ⁴⁸ Antik kita ngisak ke Ya, maka semua urang pecayak ngau Ya, ngau urang-urang Roma bakal datai ngeramput tempat suci ngau bansa kita." ⁴⁹ Tapi sikuk dentara sidak, Kayafas, Imam Besai taun yak, banai ngau sidak: "KItak ndai ketau nama-nama, ⁵⁰ lebih beguna bagi kitak, sikuk mensia mati untuk bansa kita, repada semua bansa kita benasa." ⁵¹ Hal yak depadah ya bukai re dirik ya, tapi sebagai Imam Besai pada taun yak ya benubuat, bahwa Yesus bakal mati untuk bansa yak, ⁵² ngau bukai untuk bansa yak na, tapi untuk ngumpul ngau nyutik ke anak-anak Allah te teperarak. ⁵³ Mulai ari yak sidak sepakat untuk munuh Ya. ⁵⁴ Nyak nyuruh yesus ndai tampil agik demua urang mayuh de'ntara urang-urang Yahudi, Ya angkat re yak ke daerah damping padang pasir, ke kuta te benama Efraim, ngau diak Ya nugau tamai murid-murid Ya. ⁵⁵ Rama yak ari raya Paskah urang Yahudi dah damping ngau mayuh urang re negeri yak angkat ke Yerusalem untuk nyuci ke dirik se'apan paskah yak. ⁵⁶ Sidak ngegak Yesus ngau samil bediri alam Bait Allah, sidak banai sama dirik: "Tipa menurut kitak, Ya datai ugak ndai ke gawai?" ⁵⁷ Sementara yak, imam-imam kepalak ngau urang-urang Farisi dah merik perintah isak sapa urang te ketau dini penugau Ya, madah isak sidak tau nangkap Ya.