Yesus deurapi de Betania ¹ Enam ari seapan Paskah Yesus datai ke Betania, penugau Lazarus te debangkit ke Yesus dentara urang mati. ² Diak depulah jamuan untuk Ya ngau Marta ngelayan, tamai Ya makai diak Lazarus. ³ Nyak me Maria ngamik minyak narwastu merni te rega mahal, udek ngeminyak kaki Yesus ngau delap ya ngau buk ya; ngau bau minyak yak menuh ke sekamat rumah yak. ⁴ Tapi Yudas Iskariot, sikuk re murid-murid Yesus te kak nyerah ke Yesus, banai: ⁵ "Nama minyak narwastu yak ndai dejual tiga ratus dinar, ngau duit yak deberik ngau urang-urang miskin?" ⁶ Ya madah miak bukai empadai ya kasih ngau urang miskin, tapi ya kak encuri; ya tugam ngamik duit te detaruh alam kas te depegai ya. ⁷ Nyuruh jekuh Yesus: "Isak me ya mulah tuk, ngingat ke ari pengubur Aku. ⁸ Empadai urang miskin bisik selampur entang kitak, tapi Aku ndai selampur ntang kitak." ⁹ Mayuh urang Yahudi ninga, antik Yesus bisik din, ngau sidak datai bukai cuma empadai Ya, empadai kak medak Lazarus, te debangkit ke Ya dentara urang mati. ¹⁰ Udek imam-imam kepalak bepekat kak munuh Lazarus ugak, ¹¹ ya yak me te nyuruh mayuh urang Yahudi nudi ke sidak ngau pecayak ngau Yesus. ¹² Ari sutek rama urang mayuh te mulah gawai ninga Yesus agik ketengah de jalai ke Yerusalem, ¹³ sidak ngamik daun palem, angkat ngusung ya samil mengap: "Hosana! Deberkat Ya te datai alam nama Tuhan, Raja Israel!" ¹⁴ Yesus nemu keledai biak sikuk, udek Ya naik katau yak, upa te bisik tetulis: ¹⁵ "Nang takut bala dara Sion, pedak, Raja kitak datai, duduk datau sikuk keledai." ¹⁶ Peruba bala murid Yesus ndai nyaruk hal yak, tapi seudah Yesus demulia ke, sidak tekingat, antik nas yak tentang Ya, ngau sidak udah ngereja ke yak ugak untuk Ya. ¹⁷ Urang mayuh te tamai Ya rama Ya ngumai Lazarus keluar re kubur ngau ngemangkit ke ya re'entara urang mati, merik kesaksian tentang Ya. ¹⁸ Nyak nyuruh urang mayuh yak ngusung Ya, empadai sidak ninga Ya te mulah mujizat yak. ¹⁹ Jekuh urang Farisi banai sama dirik: "Kitak medak kedirik, kitak sama sekalik ndai berasil, pedak, seluruh denia datai tamai Ya." ²⁰ De'entara sidak te angkat semayang pada ari raya yak, bisik urang Yunani. ²¹ Sidak yak nguang Filipus, te berasal re Betsaida de Galilea, udek banai ngau ya: "Tuan, kamai kak betemu ngau Yesus." ²² Filipus angkat madah ke yak ngau Andreas; Andreas sedua Filipus madah ke yak ngau Yesus. ²³ Tapi Yesus nyaut sidak, jekuh Ya: "Dah senta Anak Mensia demulia ke. ²⁴ Aku madah kitak: Antik igik gen'um ndai jatuk ke tanah ngau mati, ya sigik selampur; tapi antik ya mati, ya bebuah mayuh. ²⁵ Barangsapa te sayang ngau nyawa, bakal ayap nyawa, tapi barangsapa te ndai sayang ngau nyawa ya, ya nyaga yak untuk idup kekal. ²⁶ Barangsapa ngelayan Aku, yaa kalah tamai Aku ngau dini Aku nugau, diyak me ya nugau. Barangsapa ngelayan Aku, ya dehormat Apai. ²⁷ Pituk jiwa Ku sinuk (terharu) ngau nama te kak Ku padah? Apai, selamat ke Aku re te upa tuk? Ndai, empadai untuk yak me Aku datai k'alam saat tuk. ²⁸ Apai, mulia ke nama Nuan!" Udek tedinga ingan re surga: "Aku dah memulia ke Ya, ngau Aku bakal memulia ke Ya agik!" ²⁹ Urang mayuh te bediri diak ngau ninga ke yak banai, yak ingan guntur. Bisik ugak te madah: "Malaikat dah banai ngau Ya." ³⁰ Saut Yesus: "Ingan yak udah tedinga bukai empadai Aku, tapi empadai kitak. ³¹ Pituk gik ketengah ngukum denia tuk: sekelin tuk penguasa denia desempalung keluar; ³² ngau Aku, antik Aku detingik ke re denia tuk, Aku bakal ngentun semua urang datai ngau Aku." ³³ Ya miak madah ke tipa cara Ya mati. ³⁴ Udek saut urang mayuh yak: "Kami dah ninga re ukum Taurat, antik Mesias idup sampai page lusak; tipa Mih tau madah ke Anak Mensia kalah detingik ke? Sapa Anak Mensia yak?" ³⁵ Jekuh Yesus ngau sidak: "Sekejap na agik terang entang kitak. Pelamak terang yak gik bisik tamai kitak, pecayak na ngau ya, isak kitak ndai keleman; sapa te bejalai ara te keleman, ya ndai ketau kini ya kak angkat. ³⁶ Pecayak na ngau terang yak selamak ya bisik ntang kitak, isak kitak jadi anak-anak terang." Udah banai miak, Yesus angkat belabuk re entara sidak. ³⁷ Biar mek Yesus mayuh mulah mujizat de mua sidak, sik agik sidak ndai pecayak ngau Ya, ³⁸ isak genap firman te depadah nabi Yesaya: "Tuhan, sapa te pecayak ngau pemadah kami? ngau sapa jari kuasa Tuhan depadah?" ³⁹ Nyak nyuruh sidak ndai dapat pecayak, empadai Yesaya dah banai ugak: ⁴⁰ "Ya dah ngemutak ke mata, ngau negil ke ati sidak, isak sidak nang medak ngau mata, nang'ap ngau ati, udek bekalih, nyuruh Aku nyemuh ke sidak." ⁴¹ Hal yak depadah Yesaya, empadai Ya dah medak kemuliaan-Ya ngau dah banai tentang Ya. ⁴² Tapi mayuh ugak me de'entara pemimpin te pecayak ngau Ya, tapi empadai urang-urang Farisi sidak ndai kak ngakuk terus terang, isak sidak ndai dekucil. ⁴³ Empadai sidak lebih senang kehormat mensia repada kehormat Allah. ⁴⁴ Tapi Yesus banai: "Barangsapa te pecayak ngau Aku, ya bukai pecayak ngau Aku, tapi ngau YA te ngutus Aku; ⁴⁵ ngau barangsapa medak Aku, ya medak YA te ngukus Aku. ⁴⁶ Aku dah datai ke denia sebagai teraang, isak tiap urang te pecayak ngau Aku ndai nugau alam keleman. ⁴⁷ Ngau antik urang ninga anaiKu tapi ndai ngereja yak, Aku bukai hakim ya, empadai Aku datai bukai kak ngukum denia, tapi untuk nyelamat ke ya. ⁴⁸ Barangsapa ndai nerimak Aku, ngau ya ndai nerimak anai Ku, ya dah bisik hakim kedirik, firman te dah Ku padah yak me hakim ya rama kebaduk zaman. ⁴⁹ Empadai Ku banai bukai re Aku kedirik, tapi Apai te ngutus Aku, YA te merintah Aku untuk madah namaa te kalah Ku padah. ⁵⁰ Ngau Aku ketau, perintah YA yak idup te kekal. Jadi nama te Aku padah, Aku madah upa te defirman ke Apai ngau Aku."