Yesus masuk kaki bala murid Ya ¹ Sementara seapan ari raya Paskah mulai, Yesus dah ketau, dah senta beralih re denia ngau Apai. Sama upa Ya ngasih bala murid Ya seruntik, piak gak pituk Ya ngasih sidak sampai ari kebaduk. ² Ketengah sidak makai bereta, Iblis misik ke rencana alam ati Yudas Iskariot, anak Simon, untuk ngehianat Ya. ³ Yesus ketau, Apai Ya nyerah ke nama semua ngau Ya, ngau bahwa Ya datai re Allah ngau bekalih ke Allah. ⁴ Udek Yesus angkat ngelecut ke jubah Ya. Damik Ya sehelai kain lenan deketang de pungung Ya, ⁵ udek Ya nuang aik k'alam basi, mulai masuk kaki bala murid Ya udek delap Ya ngau kain te de pungung Ya. ⁶ Udek Ya sampai ngau Simon Petrus. Jekuh Petrus ngau Ya: "Tuhan, Nuan kak masuk kaki ku?" ⁷ Saut Yesus: "Nama te Kupulah, mih ndai nyaruk pituk, page lusak baruk mih nyaruk." ⁸ Jekuh Petrus ngau Ya: "Nuan ndai masuk kaki ku sampai page lusak." Saut Yesus: "Antik Aku ndai masuk mih, mih ndai bulih bage alam Aku." ⁹ Jekuh Simon Petrus ngau Ya: "Tuhan, nang cuma kaki ku na, jari ngau kepalak ku kedak!" ¹⁰ Jekuh Yesus ngau Ya: "Barangsapa te udah manik, ya ndai perelu masuk dirik agik, bukai re masuk kaki, empadai ya dah bersih. Kitak udah beresih ugak cuma ndai semua." ¹¹ Empadai Ya ketau sapa te nyerah ke Ya. Nyak nyuruh Ya madah: "Ndai semua, kitak beresih." ¹² Dah temuk Ya amasuk kaki sidak, Ya nyaruk pengau agik, duduk de pengkerang tadik. Udek Ya banai ngau sidak: "Kitak nyaruk ndai nama rete te Ku pulah kemaya? ¹³ Kitak ngumai Aku Guru ngau Tuhan, kenak me yak, empadai Aku me Guru ngau Tuhan. ¹⁴ Antik Aku te Guru ngau Tuhan masuk kaki kitak, maka kitak kalah piak ugak, masuk kaki pangan; ¹⁵ empadai Aku dah merik teladan ngau kitak, isak kitak nunak nama te dah Ku pulah ngau kitak. ¹⁶ Aku madah kitak: "Sebenar, sikuk hamba ndai lebih besai repada tuan ya, atau utusan ndai lebih tingik repada te ngutus ya. ¹⁷ Antik kitak ketau semua tuk, gaga em kitak, antik kitak ngereja yak. ¹⁸ Aku ndai banai ke kitak. Aku ketau sapa te Ku pilih. Tapi nas tuk kalah genap: "Urang te makai ruti Ku, dah ngatung tumit ya teradap Aku. ¹⁹ Aku madah ke tuk ngau kita pituk seapan semua tuk tejadi, isak antik hal tuk tejadi, kitak pecayak, Aku me Ya. ²⁰ Aku madah kitak: Barangsapa nerimak urang te Kuutus, ya nerimak Aku, barangsapa nerimak Aku ya nerimak YA te ngutus Aku." ²¹ Dah Yesus madah miak ngau haru, udek besaksi: "Aku mdah kitak, sebenar bisik sikuk dentara kitak te bakal nyerah ke Aku." ²² Murid Ya nempenang sikuk surang, sidak pan matang pecayak, sapa te demaksud ke Ya. ²³ Sikuk dentara murid Yesus, murid te palin dekasih Ya, nyanai damping desepiak kanan Ya. ²⁴ Ngau murid sikuk yak, Simon Petrus merik isarat ngaua banai: "Tanyak ke sapa te demaksud ke Ya!" ²⁵ Murid te duduk damping Yesus yak malik ngau banai: "Tuhan, sapa yak?" ²⁶ Saut Yesus: "Ya me urang te Kuberik ruti, udah Ku enculup ke yak." Udah banai miak, Ya ngamik ruti, deculup ke Ya udek deberik Ya ngau Yudas anak Simon Iskariot. ²⁷ Udah Yudas bulih ruti yak, ya kesarung sitan. Nyak nyuruh Yesus banai ngau ya: "Nama te kak mih pulah, pulah em sekelin tuk." ²⁸ Tapi dentara sidak te duduk makai diak, ndai sik sikuk te nyaruk nama te de maksud ke Yesus banai miak ngau Yudas. ²⁹ Empadai Yudas megai duit kas, jadi bisik te ngira Yesus nyuruh ya meli nama-nama te deperelu untuk gawai yak, atau merik nama-nama ngaua uraang meskin. ³⁰ Yudas nerimak ruti yak udek lansung angkat. Rama yak ari dah malam. ³¹ Yudas angkat, Yesus banai: "Pituk Anak Mensia demulia ke ngau Allah demulia alam Ya. ³² Antik Allah demulia ke alam Ya, Allah bemulia ke Ya ugak alam dirik YA, bemulia Ya ngau sekelin. ³³ U bala anak Ku, ndai lamak agik Aku tamai kitak. Kitak ngegak Aku, upa te Ku padah ngau urang-urang Yahudi: Ke tempat Ku angkat, kitak ndai dapat kiak, piak ugak Ku madah ngau kitak. ³⁴ Aku merik perintah baru ngau kitak, isak kitak kalah sama ngasih pangan bukai; upa Aku dah ngasih kitak piak ugak kitak kalah sama kasih ngau pangan bukai. ³⁵ Ngau piak semua urang ketau, antik kitak yak murid-murid Aku, antik kitak sama ngasih pangan." ³⁶ Simon Petrus banai ngau Yesus: "Tuhan, kini Nuan angkat?" Saut Yesus: "Ke tempat Ku angkat, mih ndai dapat tamai Ku kin pituk, tapi page lusak mih bakal tamai Aku." ³⁷ Saut Petrus ngau Ya: "Tuhan, nama nok Aku pitok pan tau tamai Nuan? Aku bakal merik ke nyawa untuk Nuan!" ³⁸ Saut Yesus: "Nyawa Mih deberik ngau Aku? Sebenar Ku madah mih: "Se'apan manuk engkukuk, mih dah tiga kalik nyangkal Aku."