Rumah Apai ¹ Nang gelisah ati kitak, pecayak na ngau Allah, pecayak ugak ngau Aku. ² De rumah Apai Ku mayung penugau. Antik ndai piak, tentu Aku mdah ngau kitak. Empadai Aku kin nyiap ke tempat untuk kitak. ³ Ngau antik Aku dah angkat kin, ngau nyiap ke tempat untuk kitak, Aku bakal datai agik, ngemaik kitak ke tempat Aku, isak dini Aku nugau, kitak bisik diak. ⁴ Ngau kini Aku angkat, kitak ketau jalai kiak." ⁵ Jekuh Tomas ngau Ya: "Tuhan, kami ndai ketau kini Nuan angkat, tipa kami ketau jalai kin?" ⁶ jekuh Yesus ngau Ya: "Aku tuk jalai, benar, ngau idup. Ndai sik urang tau datai ngau Apai antik ndai ngelalu Aku. ⁷ Sekira kitak ngelala Aku, tentu kitak ngelala ugak Apai Ku. Pituk kitak ngelala YA ngau kitak dah medak YA." ⁸ Jekuh Filipus ngau Ya: "Tuhan, bak laabak tunyuk ke ngau kami Apai, yak na dah cukup bagi kami." ⁹ Jekuh Yesus ngau ya: "Dah pelelamak Aku tamai kitak Filipus, tapi mih ndai ngelala Aku? Barangsapa te dah medak Aku ya dah medak Apai; tipa mih banai: Tunyuk ke Apai ngau kami. ¹⁰ Ndai pecayak nama mih, Aku alam Apai, Apai alam Aku? Nama te Ku padah ngau kitak, aku ndai madah re Aku kedirik, tapi Apai te nugau alam Aku, YA me te mpu kereja yak. ¹¹ Pecayak na ngau Aku, antik Apai alam Aku ngau Aku alam Apai; atau palin ndai pecayak ke bala asil kereja yak. ¹² Akau madah kitak: Sebenar barangsapa pecayak ngau Aku, ya ngereja ugak bala kereja te Ku pulah, malah ke lebih besai repada yak. Empadai Aku angkat ngau Apai; ¹³ ngau nama semua te kitak pintak alam nama Ku, bakal Ku pulah, isak Apai demulia alam Anak. ¹⁴ Antik kitak mintak bala utai alam nama Ku, bakal ku kereja." ¹⁵ "Antik kitak ngasih Aku, kitak bakal nunak semua perintah Ku. ¹⁶ Aku bakal mintak ngau Apai, ngau YA bakal merik penulung bukai, isak Ya nyereta kitak sampai page lusak, ¹⁷ yak Roh kebenaran. Denia ndai dapat nerimak Ya, empadai denia ndai medak ngau ndai ngelala Ya. Tapi kitak ngelala Ya, empadai Ya nyereta kitak ngau bakal nugau alam kitak. ¹⁸ Aku ndai bakal nudi ke kitak upa yatim piatu. Aku datai agik ngau kitak. ¹⁹ Tingal sekejap agik, ngau denia ndai bakal medak Aku agik, tapi kitak medak Aku, empadai Aku idup ngau kitak bakal idup. ²⁰ Rama yak me kitak ketau, Aku alam Apai ngau kitak alam Aku ngau Aku alam kitak. ²¹ Barangsapa megai perintah Ku ngau ngereja ke yak, ya me te ngasih Aku. Ngau barangsapa ngasih Aku, ya dekasih Apai Ku, ngau Aku sik ngasih Ya, ngau Aku bakal nyata ke dirik ngau ya." ²² Yudas, te bukas Iskariot banai ngau Ya: "Tuhan, nama nok Nuan kak madah ke dirik ngau kami, bukai ngau denia?" ²³ Saut Yesus: "Antik urang ngasih Aku, ya nunak firmanKu, ngau Apai Ku bakal ngasih ya ngau kami datai ngau ya, ngau nugau tamai ya. ²⁴ Barangsapa ndai ngasih Aku, ya ndai nunak firmanKu; ngau firman te kitak dinga yak bukai re Aku, tapi re Apai te ngutus Aku. ²⁵ Semua yak Kupadah ngau kitak selagik Aku tamai kitak; ²⁶ tapi pengibur-Roh Kudus, te kak d'utus Apai alam nama Ku, Ya me te ngajar ke semua utai ngau kitak ngau te ngingat ke kitak bala nama semua te dah Ku padah ngau kitak. ²⁷ Damai sejahtera ku dudi ngau kitak. Damai sejahtera Ku berik ngau kitak, ngau nama te Ku berik ngau kitak bukai upa te denia berik ngau kitak. Nang ati kitak kasak kisik. ²⁸ KItak dah ninga Aku dah banai ngau kitak: Aku angkat, tapi Aku datai agik ngau kitak. Sekira kitak ngasih Aku, kitak tentu gaga empadai Aku angkat ngau Apai, empadai Apai lebih besai repada Aku. ²⁹ Ngau pituk ugak Aku madah ngau kitak, seapan tuk tejadi, isak kitak pecayak antik page lusak tejadi. ³⁰ Ndai mayuh agik anai Ku ngau kitak, empadai penguasa denia tuk datai ngau ya ndai bekuasa atas Aku. ³¹ Tapi isak denia tuk ketau, Antik Aku ngasih Apai, ngau Aku ngereja ke semua te deperintah ke Apai ngau Aku, buh kita angkat retuk."