Batang anggur te benar ¹ "Aku me batang anggur te benar, Apai Ku pengusaha ya. ² Tiap dan ntang Aku te ndai bebuah, detungkung YA, ngau tiap dan te mit-mit te bebuah, deberesih Ya isak bebuah lebat. ³ Kitak mimang dah beresih empadai firman te Ku padah ngau kitak. ⁴ Nugau na alam Aku ngau Aku alam kitak. Sama ngau dan mit te ndai tau bebuah kedirik, antik ya ndai ningkil entang batang anggur, piak ugak mek kitak ndai bebuah, antik kitak ndai nugau alam Aku. ⁵ Aku tuk me batang anggur, kitak yak dan mit. Barangsapa te nugau alam Aku ngau Aku alam ya, ya bebuah lebat, empadai deluar Aku kitak ndai numut mulah nama-nama. ⁶ Barangsapa ndai nugau alam Aku, ya debuai keluar upa rang'ap, udek dekumpul urang, debaik detunu kalam api. ⁷ Antik kitak nugau alam Aku, ngau firman Ku nugau alam kitak, mintak na utai te kedekak kitak, kitak pesti bulih. ⁸ Dalam hal tuk Apai Ku demulia ke, yak antik kitak bebuah lebat, ngau apa yak kitak murid-murid Ku." ⁹ "Upa Apai dah ngasih Aku, piak ugak Aku dah ngasih kitak; nugau na alam kasih Ku yak. ¹⁰ Antik kitak nunak perintahKu, kitak bakal nugau alam kasih Ku, upa Aku nunak perintah Apai ngau Aku nugau alam kasih YA. ¹¹ Semua yak Ku padah ngau kitak, isak sukacita Ku bisik alam kitak, ngau sukacita kitak jadi penuh. ¹² Tuk me perintahKu, isak kitak kalah sama kasih ke panagan, upa Aku ngasih kitak. ¹³ Ndai sik kasih te lebih besai repada kasih urang te merik ke nyawa ya ngau kaban-kaban ya. ¹⁴ Kitak yak kaban Aku antik kitak mulah nama te Ku perintah ke ngau kitak. ¹⁵ Aku ndai madah kitak hamba agik, empadai hamba ndai ketau nama te depulah tuan ya, tapi Aku madah kitak kaban, empadai Aku dah madah kitak semua te Ku dinga re Apai. ¹⁶ Bukai kitak te milih Aku, tapi Aku te milih kitak. Ngau Aku dah netap ke kitak, isak kitak angkat ngau ngasil ke buah ngau buah kitak yak tetap, isak ke nama te kitak pintak ngau ngau Apai alam namaKu, deberik ke YA ngau kitak. ¹⁷ Tuk me perintah Ku ngau kitak: Kalah sama ngasih pangan." ¹⁸ Antik denia ngemencik kitak, kingat ke ya dah dulau ngemencik Aku repada kitak. ¹⁹ Sekira kitak re denia, tentu me denia ngasih kitak sebagai mpu sidak. Tapi empadai kitak bukai re denia, tapi Aku te milih kitak re denia, yak nyuruh denia ngemencik kitak. ²⁰ Kingat ke nama te dah Ku padah ngau kitak: Sikuk hamba ndai lebih tingik re tuan ya. Antik sidak dah nisa Aku, kitak sik desisa ugak; antik sidak ninga firmanKu, sidak ninga ugak nama te jekuh kitak. ²¹ Tapi semua yak depulah sidak teradap kitak empadai namaKu, empadai sidak ndai ngelala YA te ngutus Aku. ²² Sekira Aku ndai datai ngau ndai banai ngau sidak, tentu sidak ndai bedosa, tapi pituk sidak ndai sik tau besenangkan ke dosa sidak! ²³ Barang sapa ngemencik Aku, ya ngemencik Apai Ku ugak. ²⁴ Sekira Aku ndai suah mulah kereja detengah-tengah sidak upa te ndai suah depulah urang bukai, sidak tentu ndai bedosa. Tapi pituk, biar me sidak dah medak semua yak, sidak ngemencik baik Aku ngau Apai. ²⁵ Tapi firman te bisik tetulis alam kitab Taurat sidak kalah degenap: Sidak ngemencik Aku ndai sik sebab. ²⁶ Antik pengibur te kak Kuutus re Apai datai, Roh kebenaran te keluar re Apai, Ya besaksi tentang Aku. ²⁷ Tapi kitak kalah besaksi ugak, empadai kitak semua mulai re peruba tamai Aku."