¹ "Semua tuk Ku padah ngau kitak, isak kitak nang kecewa ngau ndai nerimak Aku. ² Kitak dekucil ke urang, malah bisik saat urang te munuh kitak nyangkak kalau pempulah sidak bebakti ngau Allah. ³ Sidak mulah te piak empadai sidak ndai ngelala benar sapa Apai ngau Aku. ⁴ Tapi semua tuk dah Ku padah ngau kitak, isak antik datai saat page kitak kingat, Aku dah madah ke yak ngau kitak." "Hal tuk ndai Ku padah ngau kitak re peruba, empadai pelamak tuk Aku agik betamai kitak, ⁵ tapi pituk Aku angkat ngau YA te ngutus Aku, ngau ndai sik sikuk te nanyak ngau Aku: "Kini nuan angkat? ⁶ Tapi empadai Aku madah ke hal tuk ngau kitak, nyak nyuruh ati kitak beduka. ⁷ Tapi benar te Kupadah ngau kitak: Beguna bagi kitak, antik Aku angkat. Empadai antik Aku ndai angkat, pengibur yak ndai datai ngau kitak, tapi antik Aku angkat, Aku bakal ngutus Ya ngau kitak. ⁸ Ngau antik Ya datai, Ya bakal nginsaf ke denia aakan dosa, kebenar, ngau penghakiman; ⁹ akan dosa empadai sidak ndai pecayak ngau Aku; ¹⁰ akan kebenar empadai Aku angkat ngau Apai ngau kitak ndai medak Aku agik; ¹¹ akan penghakiman empadai penguasa denia tuk dah dukum. ¹² Agik mayuh hal te kalah Ku padah ngau kitak, tapi pituk pan dapat nangung yak. ¹³ Tapi antik Ya datai, Roh Kebenaran, Ya bakal mimpin kitak kalam semua kebenaran; empadai Ya ndai banai ari Ya kedirik, tapi semua utai te dedinga Ya, yak me te depadah Ya ngau Ya madah kitak ke nama te kak datai. ¹⁴ Ya memulia ke Aku, empadai Ya madah kitak nama te deterimak Ya re Aku. ¹⁵ Semua utai te dempu Apai, Aku ngempu; nyak nyuruh Aku banai: Ya bakal madah ngau kitak nama te deterimak Ya re Aku." ¹⁶ Tingal sekejap agik kitak ndai medak Aku, ngau sekejap ugak kitak medak Aku." ¹⁷ Ninga miak, bala murid banai sama direk: "Nama rete Ya banai ngau kita: Tingal sekejap na ngau kitak ndai medak Aku, ngau tingal kejap ugak kitak bakal medak Aku? Ngau: Aku angkat ngau Apai?" ¹⁸ Mungkak jekuh sidak: "Nama rete Ya banai: Tingal kejap agik? Kita ndai ketau nama maksud Ya." ¹⁹ Yesus ketau, sidak kak nanyak ke utai ngau Ya, udek Ya banai ngau sidak: "Nama kitak banai sama dirik tentang te Ku padah tadik: Tingal sekejap agik kitak medak Aku, ngau tingal sekejap na ugak kitak medak Aku? ²⁰ Aku madah kitak: Sebenar, kitak bakal nyabak ngau meratap, tapi denia gaga; kitak te beduka, tapi duka kitak berubah jadi gaga. ²¹ Urang inuk beduka rama ya beranak, tapi udah baduk beranak, ya kelupa ke duka ya, empadai gaga ke anak lahir ke denia. ²² Piak ugak mek kitak pituk dekelingik duka, tapi Aku bakal medak kitak agik, ngau ati kitak gaga, ngau ndai sik te tau ngerampas pengaga yak re kitak. ²³ Ngau pada ari yak, kitak ndai bakal nanyak ke nama-nama ngau Aku. Aku madah kitak: "Semua utai te kitak mintak ngau Apai, bakal deberik ke Ya ngau kitak alam namaKu. ²⁴ Sampai pituk kitak pan suah mintak nama-nama alam namaKu. Minta na maka kitak bulih, isak pengaga kitak penuh. ²⁵ Semua tuk Ku padah ngau kitak ngelalu kiasan. Bisik senta Aku banai ngau kitak ndai ngau kiasan, tapi lansung terus terang madah ke Apai ngau kitak. ²⁶ Pada ari yak kitak bedoa alam namaKu. Ngau ndai Ku madah kitak, antik aku minta ke kitak ngau Apai, ²⁷ Apai ngasih kitak, empada kitak dah ngasih Aku ngau pecayak, bahwa Aku datai re Allah. ²⁸ Aku datai re Apai, ngau Aku datai k'alam denia; ngau Aku nudi ke denia ugak ngau angkat ngau Apai." ²⁹ Jekuh murid-murid Ya: "pedak, pituk Nuan banai terus terang ndai ngau kiasan. ³⁰ Pituk kami ketau bahwa Nuan ketau semua utai, ndai perelu urang betanyak ngau Nuan. Nyak nyuruh kami pecayak, bahwa Nuan datai re Allah." ³¹ Saut Yesus ngau sidak: "Pecayak ndai kitak pituk? ³² Pedak, saat e datai, malah udah datai, bahwa kitak deperarak ke tempat kitak masing-masing ngau kitak nudi ke Aku kedirik. Tapi Aku ndai kedirik, Apai tamai Aku. ³³ Semua tuk Ku padah ngau kitak, isaka kitak bulih damai sejahtera alam Aku. Alam denia kitak bulih penisa, tapi kuat ke ati kitak, Aku dah ngalah ke denia."