Doa Yesus untuk murid-murid Ya ¹ Piak me jekuh Yesus. Udek Ya nenguak ke langit, banai: "Apai, dah senta tuk; mulia ke Anak Nuan isak Anak Nuan bemulia ke Nuan. ² Upa te udah Nuan berik ngau Ya kuasa atas semua te idup, piak ugak Ya merik ke idup te kekal ngau semua te udah Nuana berik ngau Ya. ³ Tuk me idup te kekal yak, sidak ngelala Nuan, cuma sikuk Allah te benar, ngau ngelala Yesus kristus te dah Nuan utus. ⁴ Aku dah bemulia ke Nuan de tanah aik, ngau cara nemuk ke kereja te dah deberik ngau Aku isak Ku pulah. ⁵ Nyak nyuruh u Apai, mulia ke Aku ngaua Nuan kedirik ngau kemuliaan te kebisik Ku dehadirat Nuan se'apan denia bisik. ⁶ Aku dah madah ke nama Nuan ngau semua urang, te Nuan berik ngau Aku re denia. Sidak yak empu Nuan, ngau Nuan dah merik ke sidak ngau Aku, ngau sidak dah nunak firman Nuan. ⁷ Pituk sidak ketau, semua te Nuan berik ngau Aku yak berasal re Nuan. ⁸ Empadai semua firman te Nuan padah ngau Aku, dah Kupadah ngau sidak, ngau sidak dah nerimak yak. Sidak ketau bebenar, antik Aku tuk berasal re Nuan, ngau sidak pecayak antik Nuan me te ngutus Aku. ⁹ Aku bedoa untuk sidak. Bukai untuk denia Aku bedoa, tapi untuk sidak te dah Nuan berik ngau Aku, empadai sidak yak empu Nuan ¹⁰ ngau semua empu Nuan empu Aku, ngau Aku udah demulia alam sidak. ¹¹ Ngau Aku ndai sik agik de denia tuk, tapi sidak agik bisik de denia, ngau Aku datai ngau Nuan. Apai te kudus, jaga sidak alam nama Nuan, nama te dah Nuan berik ngau Aku, isak sidak jadi sutik sama upa Kita. ¹² Pelamak Aku tamai sidak, Aku nyaga sidak alam nama Nuan, nama te dah Nuan berik ngau Aku; Aku dah nyaga sidak, ngau ndai sikuk re sidak te benasa, bukai re te dah detentu untuk benasa, isak genap semua te tetulis alam Kitab Suci. ¹³ Tapi pituk Aku datai ngau Nuan ngau Aku madah semua tuk sementara Aku agik alam denia, isak penuh sukacita Aku alam dirik sidak. ¹⁴ Aku dah merik ke firman Nuan ngau sidak, ngau denia ngemencik sidak, empadai sidak bukai re denia, upa Aku bukai re denia. ¹⁵ Aku ndai mintak isak Nuan ngamik sidak re denia, tapi isak Nuan ngelinuk sidak re te jaik. ¹⁶ Sidak bukai re denia, upa Aku bukai re denia. ¹⁷ Kudus ke sidak alam kebenar; firman Nuan yak kebenaran. ¹⁸ Upa Nuan dah ngutus Aku k'alam denia, piak ugak Aku dah ngutus sidak k'alam denia; ¹⁹ ngau Aku ngudus ke dirik bagi sidak, isak sidak dekudus ke ugak alam kebenaran. ²⁰ Ngau bukai cuma untuk sidak yak na Aku bedoa, tapi urang-urang te pecayak ngau Aku empadai pemadah sidak; ²¹ isak semua sidak jadi sutik, upa Nuan alam Aku ngau Aku alam Nuan, isak sidak ugak alam Kita, isak denia pecayak Nuan me te dah ngutus Aku. ²² Ngau Aku dah merik sidak kemuliaan, te udah Nuan berik ngau Aku, isak sidak jadi sutik, upa kita sutik: ²³ Aku alam sidak, ngau Nuan alam Aku isak sidak sempurna jadi sutik, isak ke denia ketau, Nuan te dah ngutus Aku, ngau Nuan ngasih sidak upa Nuan ngasih Aku. ²⁴ U Apai, Aku kak, dini Aku nugau, sidak bisik diak ugak tamai Aku, sidak te dah Nuan berik ngau Aku, isak sidak medak kemuliaan Aku te dah Nuan berik ngau Aku, empadai Nuan dah ngasih Aku seapan denia tuk bisik. ²⁵ U Apai te adil, memang denia tuk ndai ngelala Nuan, tapi Aku ngelala Nuan, ngau sidak tuk ketau, Nuan me te ngutus Aku; ²⁶ ngau Aku dah madah ke nama Nuan ngau sidak, ngau Aku bakal madah ke yak, isak kasih te Nuan berik ngau Aku bisik alam sidak, ngau Aku alam sidak."