¹ Yesus detangkap Udah Yesus madah ke semua yak, keluar Ya riyak tamai bala murid ngau sidak angkat ke seberang sungai Kidron. Diak bisik taman, Ya tamak kalam taman yak tamai bala murid Ya. ² Yudas te menghianati Yesus ketau ugak pengkerang yak, empadai Yesus rajin bekumpul ngau murid-murid Ya diak. ³ Nyak nyuruh Yudas datai kiak ugak ngemaik sepasukan prajurit ngau bala penyaga Bait Allah te desuruh imam-imam kepalak ngau urang-urang Farisi lengkap ngau bala jentira, suluh ngau senjata. ⁴ Nyak nyuruh Yesus te dah ketau semua te nimpak Ya maju ke mua banai ngau sidak: "Sapa te kitak gegak?" ⁵ Saut sidak: " Yesus re Nazaret." Jekuh Ya ngau sidak: "Aku me Ya." Yudas te menghianati Ya diak ugak bediri tamai sidak. ⁶ Rama Ya banai ngau sidak: "Aku me Ya," sidak mun'ur ngau jatuk ke tanah. ⁷ Maka Ya betanyak ugak: "Sapa te kitak gegak?" Jekuh sidak: "Yesus re Nazaret." ⁸ Saut Yesus: "Dah Ku padah ngau kitak, Aku me Ya. Antik Aku te kitak gegak, isak ke sidak tuk angkat." ⁹ Piak me isak genap firman te depadah Ya: "Are sidak te Nuan serah ngau Aku, ndai sik sikuk te Ku isak benasa." ¹⁰ Udek Simon Petrus te ngemaik pedang, ngunus pedang yak, deselar ya ke pening hamba Imam Besai, ngau mutus ke pening sepiak kanan ya. Nama hamba yak Malkhus. ¹¹ Jekuh Yesus ngau Petrus: "Sarung ke agik pedang yak; Ndai me Aku kalah minum cawan te deberik Apai ngau Aku?" ¹² Udek pasukan prajurit ngau perwira, penyaga-penyaga te desuruh urang Yahudi yak nangkap Yesus ngau masung Ya. ¹³ Udek sidak ngemaik Ya peruba ngau Hanas, empadai Hanas yak mentua Kayafas, te pada taun yak jadi Imam Besai; ¹⁴ ngau Kayafas me te nesehat ke urang-urang Yahudi: "Lebih beguna sikuk mensia mati untuk semua bansa." ¹⁵ Simon Petrus ngau sikuk murid bukai nurut Yesus. Murid yak ngelala Imam Besai, ngau ya tamak tamai Yesus ke tanah kelang istana Imam Besai, ¹⁶ tapi Petrus nugau deluar minik mua lawang. Udek murid bukai tadik te ngelala Imam besai, bekalih keluar banai ngau inuk te nyaga lawang, udek ngemaik Petrus tamak. ¹⁷ Mungkak jekuh inuk te nyaga mua lawang yak ngau Petrus: "Ndai mek nuan murid mensia yak?" Saut Petrus: "Bukai!" ¹⁸ Sementara yak hamba-hamba ngau penyaga-penyaga Bait Allah udah nungkun api arang, empadai celap rama yak, ngau sidak engkinuk diak. Petrus bediri, engkinuk tamai sidak diak ugak. ¹⁹ Udek mulai me Imam Besai nanyak Yesus tentang murid-murid Ya ngau tentang pengajar Ya. ²⁰ Saut Yesus ngau ya: "Aku banai terus terang ngau denia: Aku seruntik ngajar derumah-rumah ibadat ngau de Bait Allah, pengkerang semua urang Yahudi bekumpul; Aku ndai suah banai belabuk-belabuk. ²¹ Nama pulah Nuan nanyak Aku? Tanyak sidak te dah ninga nama te Kupadah ngau sidak; sidak matang ketau nama te udah Kupanai." ²² Rama Ya madah miak, penyaga te bediri diak nampar mua Ya samil banai: "Piak nama saut Mih ngau Imam Besai?" ²³ Saut Yesus ngau ya: "Antik anai Ku yak salah, tunyuk ke dini penyalah, antik anai Ku yak kenak, nama pulah nuan nampar Aku?" ²⁴ Nyak nyuruh Hanas ngirim Ya tepasung ngau Kayafas, Imam Besai yak. ²⁵ Simon Petrus bediri engkinuk. Jekuh urang-urang diyak ngau ya: "Ndai mek mih murid Ya ugak?" ²⁶ Ya nyangkal, jekuh ya: "Bukai." Jekuh sikuk hamba Imam Besai, menyanak hamba te detungkung Petrus ke pening: "Bukai me mih te ku pedak de taman tamai Ya?" ²⁷ Mungkak Petrus nyaangkal ugak, ngau rama yak, engkukuk manuk. ²⁸ Sidak ngemaik Yesus re Kayafas ke gedung pengadilan. Rama yak agik lam kenyung. Sidak ndai tamak kalam gedung pengadilan yak, isak nang najis ke dirik, empadai sidak kak makai paskah. ²⁹ Nyak nyuruh Pilatus keluar medak sidak ngau banai: "Nama sangkak kitak ngau urang tuk?" ³⁰ Saut sidak ngau ya: "Antik Ya bukai urang jaik, ndai kami nyerah ke ngau nuan!" ³¹ Jekuh Pilatus ngau sidak: "Amik Ya ngau hakim ke Ya menurut ukum Taurat kitak." ³² Upa yak me isak genap firman Yesus, te depadah Ya untuk madah ke tipa cara Ya bakal mati. ³³ Maka Pilatus bekalih k'alam gedung pengadilan, udek ngumai Yesus ngau betanyak ngau Ya: "Mih tuk me raja urang Yahudi?" ³⁴ Saut Yesus: "Nama Nuan madah ke tuk ari alam ati mih, atau bisik urang bukai te madah ngau Nuan tentang Aku?" ³⁵ Jekuh Pilatus: Nama Aku tuk urang Yahudi? Bansa Mih ngau imam-imam kepalak te dah nyerah ke Mih ngau Aku; nama te dah Mih pulah?" ³⁶ Saut Yesus: "KerajaanKu bukai re denia tuk; antik kerajaan Ku re denia tuk, pesti bala hambaKu dah ngelawan isak nang Aku deserah ngau urang Yahudi, tapi kerajaanKu bukai retuk." ³⁷ Maka jekuh Pilatus ngau Ya: "Jadi Mih tuk raja?" Saut Yesus: "Nuan madah Aku tuk raja. Untuk yak me Ku bisik, ngau untuk yak me Ku datai ke denia, isak Aku merik kesaksian tentang kebenaran; tiap urang te berasal re kebenaran ninga ingan Ku." ³⁸ Jekuh Pilatus ngau Ya: "Nama kebenaran yak?" Udah miak, Pilatus keluar betemu ngau urang-urang Yahudi ngau banai ngau sidak: "Ku ndai nemu penyalah Ya." ³⁹ Tapi kitak bisik kejama, pada ari Paskah aku ngebebas ke surang untuk kitak, kitak kak ndai aku bebaskan raja urang Yahudi untuk kitak?" ⁴⁰ Sidak mukau ugak: "Ndai sah Ya, tapi Barabas!" Barabas yak penyamun.