¹ Udek Pilatus ngamik Yesus ngau nyuruh urang nyesah Ya. ² Bala prajurit nganyam mahkota durik ngau naruh ya datau kepalak Yesus. Sidak nyaruk ke Ya jubah ungu, ³ ngau samil maju ke depan sidak banai: "Salam, raja urang Yahudi! udek sidak nampar mua Ya. ⁴ Pilatus keluar agik, banai ngau sidak: "Pedak! aku ngemaik Ya keluar ngau kitak, isak kitak ketau, aku ndai sik nemu kesalah entang Ya." ⁵ Udek Yesus keluar bemahkota durik bejubah ungu. Maka jekuh Pilatus ngau sidak: "Pedak Mensia yak!" ⁶ Rama imam-imam kepalak ngau bala penyaga medak Ya, sidak betumau: "Salib ke Ya, salib ke Ya!" Jekuh Pilatus ngau sidak: "Amik Ya ngau salib ke Ya; empadai aku ndai sik nemu kesalah entang Ya." ⁷ Saut urang-urang Yahudi ngau ya: "Kami bisik ukum, yak kalah dukum mati, empadai Ya madah ke dirik Anak Allah." ⁸ Rama Pilatus ninga anai yak, ya jadi makin takut, ⁹ udek ya tamak ugak k'alam gedung pengadilan ngau banai ngau Yesus: "Reni asal Mih?" Tapi Yesus ndai sik nyaut ya. ¹⁰ Maka jekuh Pilatus ngau Ya: "Ndai nama Mih kak banai ngau aku?" Ndai me Mih ketau aku bekuasa ngebebas ke Mih ngau bekuasa untuk nyalib ke Mih?" ¹¹ Saut Yesus: "Mih ndai sik kuasa nama-nama teradap Aku, antik kuasa yak ndai deberik ke ngau mih re'atau. Nyak nyuruh: ya te nyerah ke Aku ngau mih lebih besai dosa ya." ¹² Mulai re yak Pilatus berusaha ngebebas ke Ya, tapi urang-urang Yahudi mangkas agik: "Antik mih ngebebas ke Ya, mih bukai kaban Kaisar. Tetiap urang te ngang'ap dirik raja, ya ngelawan Kaisar." ¹³ Rama Pilatus ningaa anai yak, ya nyuruh ngemaik Yesus keluar, ya duduk debangku pengadilan, de tempat te benama Litostrotos, alam basa Yunani Gabata. ¹⁴ Ari yak nyiap ke Paskah, kekira jam dua belas. Jekuh Pilatus ngau urang-urang Yahudi yak: "Tuk me raja kitak!" ¹⁵ Udek sidak mangkas: "Bunuh na Ya! bunuh na! salib ke Ya!" Jekuh Pilatus ngau sidak: "Kalah nama aku nyalib ke raja kitak?" Saut imam-imam kepalak: "Kami ndai sik raja bukai re Kaisar!" ¹⁶ Udek Pilatus nyerah ke Yesus ngau sidak untuk desalib ke. Sidak nerimak Yesus. ¹⁷ Samil nangkun salib, Ya angkat ke luar ke tempat te depadah tempat tengkorak, alam basa Ibrani: Golgota. ¹⁸ Diak Ya desalib ke sidak, ngau tamai Ya desalib dua urang sepiak kanan ngau kibak, Yesus tengah. ¹⁹ Ngau Pilatus nyuruh masang tulisan datau kayu salib yak, piak: "Yesu, urang Nazaret, Raja urang Yahudi." ²⁰ Mayuh urang Yahudi maca tulisan yak, empadai pengkerang Yesus desalib letak damping kuta ngau anai yak tetulis alam bahasa Ibrani, latin ngau Yunani. ²¹ Maka jekuh imam-imam kepalak ngau Pilatus: "Nang Nuan nulis: Raja urang Yahudi, tapi Ya mdah Raaja urang Yahudi." ²² Saut Pilatus: Nama te kutulis tetap tetulis." ²³ Udah bala prajurit yak nyalib ke Yesus, sidak ngamik pengau Ya, sebagi empat, bulih sebagi seurang prajurit- ngau jubah Ya damik sidak. Jubah yak ndai dejait. r'atau sampai kebabah selansur. ²⁴ Nyak nyuruh sidak banai sama dirik: "Nang sampai kita magi tuk, tapi kita kalah cabut un'i untuk bulih tuk." Piak me isak genap nama te tetulis alam Kitab Suci: "Sidak magi-magi pengau Ku dentara sidak, ngau sidak nyabut un'i jubahKu." Hal yak dah depulah bala prajurit yak. ²⁵ Damping salib bediri inai Ya ngau menyadik inai Ya, Maria bini Klopas, ngau Maria Magdalena. ²⁶ Rama Yesus medak inai Ya ngau murid te palin dekasih Ya minik ya, Ya banai ngau inai Ya: "Inai, yak anak nuan!" ²⁷ Udek jekuh Ya ngau murid Ya: "Yak me inai mih!" Ngau mulai reyak, murid yak nerimak ya alam rumah ya. ²⁸ Udah yak, empadai Yesus ketau semua udah temuk, Ya banai - isak genap te tetulis alam Kitab Suci -: "Aku aus!" ²⁹ Diak bisik bekas penuh anggur masam. Udek sidak ncucuk ke bunga karang, te udah deculup ke anggur masam, udek desunsung ke nyawa Yesus. ³⁰ Udah Yesus ngirup anggur masam yak, Ya banai: "Udah temuk." Udek Ya nukuh ke kepalak Ya ngau nyerah ke nyawa-Ya. ³¹ Empadai ari yak ari siap-siap isak pada ari Sabat mayat-mayat yak ndai tegantung de kayu salib - empadai Sabat yak ari raya besai - maka datai urang-urang Yahudi ngau Pilatus, mintak ngau ya isak kaki-kaki sidak yak depatah ngau mayat-mayat deturun. ³² Maka datai kiak bala prajurit matah ke kaki urang peruba, ngau kaki urang bukai te desalib damping Yesus; ³³ tapi rama sidak datai ngau Yesus, medak Ya dah mati, sidak ndai matah ke kaki Ya, ³⁴ tapi sikuk dentara prajurit nikam karan perut Ya ngau tum'ak, darah ngau aik lansung belilih. ³⁵ Ngau urang te medak yak te merik kesaksian, ngau kesaksian ya benar. isak kitak pecayak ugak. ³⁶ Empadai hal yak tejadi, isak genap te tetulis alam Kitab Suci: "Ndai sik tulang Ya te depatah." ³⁷ Ngau bisik ugak nas te madah: "Sidak bakal medak Ya te sidak tikam." ³⁸ Udah yak, Yusuf ari Arimatea - ya murid Yesus, tapi bebelabuk empadai takut ngau urang-urang Yahudi - mintak ngau Pilatus, isak ya tau nurun ke mayat Yesus. Ngau Pilatus ngelulus ke pemintak ya, udek datai ngau nurun ke mayat yak. ³⁹ Nikodemus datai kiak ugak, ya yak me te peruba datai ngau Yesus rama malam, ya ngemaik campur minyak mur ngau gaharu, kekira limak puluh kati berat. ⁴⁰ Sidak ngamik mayat Yesus, debalut ngau kain Lenan, debubuh ngau rempah-rempah menurut adat istiadat urang Yahudi antik ngubur mayat. ⁴¹ Damping Yesus desalib, bisik taman, alam taman yak bisik kubur baru te pan suah depengau. ⁴² Empadai ari yak ari urang Yahudi siap-siap, sedang kubur yak ndai jauh letak, maka sidak ngeletak ke mayat Yesus diak.