Pemangkit (kebangkitan) Yesus ¹ Pada ari peruba ming'u yak, lelam kenyung benar rama gik keleman, Maria Magdalena angkat ke kubur yak, ngau yaa medak batu dah damik re kubur. ² Ya rari nguang Simon Petrus ngau murid bukai te dekasih Yesus, banai ngau sidak: "Tuhan dah damik urang re kubur ya ngau kami ndai ketau dini Ya detaruh." ³ Maka Petrus ngau bala murid angkat ke kubur. ⁴ Sedua beguang bereta, tapi murid te sikuk yak lebih sigat, nyak nyuruh yaa dulau datai ke kubur yak. ⁵ Ya nyenguk ke dalam, medak kain kafan teletak de tanah, tapi ya ndai tamak ke dalam. ⁶ Udek Simon Petrus datai kiak ugak, ya tamak kalam kubur yak. Ya medak kain kafan teletak de tanah, ⁷ sedang kain peluh de kepalak Yesus ndai sik medak damping kain kafan, de sisi pengkerang bukai ngau udah tegulung. ⁸ Maka tamak ugak murid bukai te lau datai tadik, ya medak ngau pecayak. ⁹ Empadai selamak yak sidak pan nyaruk isik Kitab Suci te madah, antik Ya kalah bangkit re entara urang mati. ¹⁰ Udek sedua pulai ke langkau. ¹¹ Tapi Maria nyabak bediri damping kubur, sam'il nyabak ya nyenguk k'alam kubur yak, ¹² ngau nampak depedak ya dua malaikat bepengau putih, sikuk duduk desepiak kepalak, sikuk desepiak kaki mayat Yesus tegalai. ¹³ Jekuh malaikat-malaikat yak ngau ya: "Ibuk, nama nuan nyabak?" Saut Maria ngau sidak: "Tuhanku dah d'amik urang ngau aku ndai ketau dini ya deletak." ¹⁴ Udah banai miak, ya malik ke belakang, ngaua medak Yesus bediri diak, tapi ya ndai ketau yak Yesus. ¹⁵ Jekuh Yesus ngau ya: "Ibuk, nama nuan nyabak? Sapa te nuan gegak?" Dekira Maria urang yak penunguk taman, udek banai ngau Ya: "Tuan, antik nuan te ngamik Ya, padah ngau aku dini nuan ngeletak, isak aku tau ngamik Ya." ¹⁶ Jekuh Yesus ngau ya: "Maria!" Maria malik ngau Ya samil banai alam basa Ibrani: "Rabuni!", rete Guru. ¹⁷ Jekuh Yesus ngau ya: "Nang nuan megai Aku, empadai Aku apan angkat ngau Apai, tapi angkat kin ngau bala menyadik Ku, padah ngau sidak, pituk Aku angkat ngau Apai Aku, Apai kitak, Allah Ku ngau Allah kitak." ¹⁸ Maria Magdalena angkat, udek banai ngau bala murid: "Aku dah medak Tuhan!" ngau Ya me te madah hal-hal yak ngau ya. ¹⁹ Rama dah malam, ari peruba mingu yak, bala murid bekumpul de sutik tempat ngau bala lawang dekunci empadai sidak takut ngau urang-urang Yahudi. Rama yak datai Yesus bediri detengah-tengah sidak ngau banai: "Damai sejahtera bagi kitak!" ²⁰ Udah Ya banai miak, Ya madah ke jari ngau perut Ya ngau sidak. Rama medak Tuhan, bala murid diak gaga bebenar. ²¹ Jekuh Yesus sekalik agik: "Damai sejahtera bagi kitak! Upa Apai ngutus Aku, piak ugak Aku ngutus kitak." ²² Ngau seudah banai miak, Ya ngem'us sidak ngau banai: "Terimak me Roh Kudus. ²³ Antik kitak ngampun dusa urang, dusa ya dampun, antik kitak madah dusa urang tetap bisik, dusa ya tetap bisik." ²⁴ Tapi Tomas, sikuk re kedua belas murid, te dejenang Didimus, ndai sik tamai sidak diak, rama Yesus datai kiak. ²⁵ Maka jekuh bala murid te bukai ngau ya: "Kami dah medak Tuhan!" Tapi Tomas banai ngau sidak: "Seapan aku medak bekas baku de jari Ya, ngau seapan aku ncucuk ke jari ku kalam lubang bekas paku yak, ngau seapan aku ncucuk ke jari aku kalam perut Ya, sekalik kalik aku matang ndai pecayak." ²⁶ Lapan ari udah yak, bala murid bekumpul de langkau yak agik, ngau Tomas bisik diak. Sementara bala lawang tekunci, Yesus datai ngau bediri de tengah-tengah sidak samil banai: "Damai sejahtera bagi kitak!" ²⁷ Udek Ya banai ngau Tomas: "Taruh jari mih dituk ngau pedak jari Aku, ulur ke jari mih, cucuk k'alam perut Ku, ngau nang sampai mih ndai pecayak agik, tapi kalah pecayak!" ²⁸ Tomas nyaut Ya: "Ya Tuhanku ngau Allahku!" ²⁹ Jekuh Yesus ngau ya: "Empadai dah medak Aku mih pecayak, gaga me sidak te ndai medak tapi pecayak." ³⁰ Agik mayuh bala kecelik bukai te depulah Yesus demua bala murid Ya, te ndai tecatat alam kitab tuk, ³¹ tapi semua te bisik dituk dah decatat, isak kitak pecayak antik Yesus yak Mesias, Anak Allah, isak kitak ulih iman kitak bulih idup alam nama Ya.