² Yesus madah ke dirik Ya ngau bala murid Ya de pantai lepung Tiberias ¹ Udek Yesus madah ke dirik agik ngau bala murid de pantai lepung tiberias, upa tuk Ya madah ke dirik: " ² De pantai yak bekumpul Simon Petrus, Tomas te dejenang Didimus, Natanael re Kana te de Galilea, anak-anak Zebedeus, ngau dua ikuk murid bukai. ³ Jekuh Simon Petrus ngau sidak: "Aku angkat nangkap ikan." Jekuh sidak ngau ya: "Kami angkat ugak tamai mih." Sidak angkat lalu naik k'alam perau, tapi malam yak sidak ndai nangkap nama-nama. ⁴ Rama mulai tengah ari, Yesus bediri de pantai, tapi bala murid ndai sik te ketau antik yak Yesus. ⁵ Jekuh Yesus ngau sidak: "U bala anak, kitak bisik lauk pauk?" Saut sidak: "Ndai sik." ⁶ Maka jekuh Yesus ngau sidak: "Sempalung ke jala mih ke sepiak kanan perau, pesti mih bulih." Udek desempalung sidak jala, ngaau sidak ndai angkil narik jala yak agik, empadai mayuh bulih ikan. ⁷ Maka murid te dekasih Yesus yak banai ngau Petrus: "Yak Tuhan." Rama Petrus ninga yak Tuhan, ya nyaruk pengau, empadai ya ndai bepengau, udek terjun k'alam lepung. ⁸ Murid-murid bukai datai ngau perau, empadai sidak ndai jauh re darat, cuma kekira dua ratus seta, ngau sidak ngibuh ke jala te penuh ngau ikan yak. ⁹ Rama sidak datai ke darat, sidak medak api arang, datau ya bisik ikan ngau ruti. ¹⁰ Jekuh Yesus ngau sidak: "Baik kituk kedak ikan te baruk kitak tangkap yak." ¹¹ Simon Petrus naik ke perau udek ngemaik jala yak ke darat, penuh ngau ikan-ikan besai: seratus limak puluh tiga ikuk pemayuh, ngau sung'uh mek semayuh yak, jala yak ndai teridang. ¹² Jekuh Yesus ngau sidak: "Buh kita makai." Ndai sik dentara murid-murid diak te barani nanyak ngaau Ya: "Sapa Nuan?" Empadai sidak ketau, Ya yak Tuhan. ¹³ Yesus maju ke mua, ngamik ruti, deberik ke ngau sidak, piak ugak ngau ikan. ¹⁴ Yak mek ketiga kalik Yesus madah ke dirik ngau bala murid Ya, seudah Ya bangkit re'entara urang mati. ¹⁵ Udah nyegak, Yesus banai ngau Simon Petrus: "Simon, anak Yohanes, mih ngasih Aku lebih repada sidak tuk?" Saut Petrus ngau Ya: "Benar Tuhan, Nuan ketau aku ngasih Nuan." Jekuh Yesus ngau ya: "Gembala ke domba-domba Aku." ¹⁶ jekuh Yesus agik ngau ya kedua kalik: "Simon, anak Yohanes, mih ngasih Aku?" Saut Petrus ngau Ya: "Benar Tuhan, Nuan ketau aku ngasih Nuan." Jekuh Yesus ngau ya: "Gembala ke domba-domba Aku." ¹⁷ Jekuh Yesus ngau ya untuk ketiga kalik: "Simon, anak Yohanes, mih ngasih Aku?" Mungkak sedih ati Petrus empadai Yesus nanyak sampai ketiga kalik: mih ngasih Aku?" Ngau Petrus banai ngau Ya: "Tuhan, Nuan ketau semua utai, Nuan ketau aku ngasih Nuan." Jekuh Yesus ngau ya: "Gembala ke domba-domba Aku. ¹⁸ Aku madah kitak: Rama kitak gik biak, kitak ngetang pung'ung dirik, ngau kitak bejalai kini-kini te kedekak kitak, tapi antik kitak dah tuai, kitak ngulur ke jari ngau urang bukai ngebat kitak, ngau ngemaik kitak ara te ndai ketuju kitak." ¹⁹ Hal hak depadah Ya untuk madah ke tipa Petrus bakal mati ngau memulia ke Allah. Udah madah miak, Ya banai ngau Petrus: "Buh tamai Aku." ²⁰ Rama Petrus malik, ya medak murid te dekasih Yesus ketengah nurut sidak, yak mek murid te rama sidak ketengah makai bereta duduk damping Yesus ngau te banai: "Tuhan, sapa ya te kak nyerah ke Nuan?" ²¹ Rama Petrus medak murid yak, ya banai ngau Yesus: "Tuhan, nama te bakal tejadi ngau ya tuk?" ²² Saut Yesus: "Antik Aku kak ya tetap idup sampai Aku datai, yak bukai urusan mih. Tapi mih: buh tamai Aku." ²³ Maka tesebar me peluluk dentara sidak, kalau murid yak ndai bakal mati. Tapi Yesus ndai sik madah ngau Petrus, antik murid yak ndai bakal mati, tapi: "Antik Aku kak ya tetap idup sampai Aku datai, yak bukai urusan mih." ²⁴ Ya me murid, te merik kesaksian tentang semua tuk ngau te dah nulis ke yak, ngau kita ketau, kesaksian ya yak benar. ²⁵ Agik mayuh hal-hal bukai agik te depulah Yesus, tapi antik semua yak detulis sutik-sutik, ndai cukup denia tuk ngau engkah semua kitab te kalah detulis yak.