¹ tapi Yesus angkat ke bukit Zaitun. ² Lelam kenyung begayap Ya bisik agik de Bait Allah, ngau semua rakyat datai ngau Ya. Ya duduk ngau ngajar sidak. ³ Udek ahli-ahli Taurat ngau urang-urang Farisi ngemaik ngau Ya inuk te kenak temu bizinah. Sidak engkah inuk yak detengah-tengah ⁴ udek banai ngau Yesus: "Rabi, inuk tuk kenak tangkap ketengah bezinah. ⁵ Musa alam ukum Taurat merintah kita nyempalung urang te upa yak ngau batu. Tipa menurut nuan tentang hal yak?" ⁶ Sidak madah miak untuk ngencuba Ya, isak sidaka bulih te tau ngau nyalah ke Ya. Tapi Yesus lansung bungkuk, nulis detanah ngau jari Ya. ⁷ Ngau rama sidak nanyak Ya seruntik, Ya aangkat bediri udek banai ngau sidak: "Barangsapa dentara kitak dituk ndai bedusa, ya te palin peruba nikam inuk yaak ngau batu." ⁸ Udek Ya bungkuk ugak ngau nuliss de tanah. ⁹ Tapi udah sidak ninga anai yak, sidak angkat sikuk-sikuk mulai re te tuai. Udek tedudi Yesus kedirik tamai inuk te diak. ¹⁰ Yesus angkat bediri banai ngau ya: "Inuk, dini sidak? Ndai sik sidak te ngukum dik?" ¹¹ Saut ya: "Ndai sik, Tuhan." Udek jekuh Yesus: "Aku sik ndai ngukum dik. Angkat, ngau nang mulah dusa agik mulai re pituk." ¹² Yesus banai ugak ngau urang mayuh, jekuh Ya: "Aku tuk me terang denia, sapa te tamai Aku, ya ndai bejalai alam keleman, tapi bisik terang idup alam ya." ¹³ Jekuh urang-urang Farisi ngau Ya: "Mih besaksi tentang dirik kedirik, kesaksian Mih yak ndai benar." ¹⁴ Saut Yesus ngau sidak: "Biar Aku besaksi tentang dirik Aku kedirik, tapi kesaksian Aku yak benar, empadai Aku ketau reni Aku datai ngau kini Aku angkat. ¹⁵ Kitak ngukum menurut ukuran mensia, Aku ndai ngukum urang, ¹⁶ ngau antik Aku ngukum, ukum Ku yak benar, empadai Aku ndai kedirik tapi tamai YA te ngutus Aku. ¹⁷ Ngau alam kitab Taurat kitak bisik tetulis, kesaksian dua urang yak sah; ¹⁸ Aku me te besaksi tentang dirik kedirik, tapi Apai ugak, te ngutus Aku besaksi tentang Aku." ¹⁹ Jekuh sidak ngau Ya: "Dini Apai Mih?" Saut Yesus: "Baik Aku atau Apai ndai kitak kelala, sekira kitak ngelala Aku, kitak ngelala ugak Apai Ku." ²⁰ Anai yak depadah Yesus rama Ya ngajar de Bait Allah. Ngau ndai sik urang te nangkap Ya, empadai apan senta. ²¹ Yesus banai ugak ngau urang mayuh: "Aku bakal angkat ngau kitak ngegak Aku tapi kitak bakal mati alam dusa kitak. Ke pengkerang Aku angkat, ndai patut kitak datai." ²² Jekuh urang-urang Yahudi yak: "Nama Ya kak munuh dirik, nyak nyuruh depadah Ya: Kini Aku angkat kitak ndai patut datai?" ²³ Udek Ya banai ngau sidak: "Kitak berasal re babah, Aku re atau, kitak berasal re denia tuk, Aku bukai re denia tuk. ²⁴ Empadai nyak nyuruh Aku banai ngau kitak, kalau kitak bakal mati alam dusa kitak; empadai antik kitak ndai pecayak Aku tuk YA, kitak bakal mati alam dusa kitak." ²⁵ Jekuh sidak ngau Ya: "Sapa Mih?" Saut Yesus ngau sidak: "Nama guna gik Ku banai ngau kitak? ²⁶ Mayuh te kak Ku panai ngau kitak; tapi YA te ngutus Aku yak benar, ngau nama te ku dinga re YA yak me te Ku padah ngau denia." ²⁷ Sidak ndai nsaruk, nama te depanai Ya yak tentang Apai. ²⁸ Jekuh Yesus: "Antik kitak dah ningik ke Anak Mensia, baruk kitak ketau, Aku me YA, ngau Aku ndai mulah nama-nama re Aku kedirik, tapi Aku banai tentang hal-hal upa te d'ajar ke Apai ngau Aku. ²⁹ Ngau YA te udah ngutus Aku, YA nyereta Aku. YA ndai ngisak ke Aku kedirik, empadai Aku seruntik mulah te bekenan ngau YA." ³⁰ Udah Yesus madah ke semua yak, mayuh urang pecayak ngau Ya. ³¹ Jekuh Ya ngau urang-urang Yahudi te pecayak ngau Ya: "Antik kitak bebenar alam firman Ku, kitak bebenar murid Aku ³² ngau kitak bakal ketau kebenaran, ngau kebenaran yak nyuruh kitak merdeka." ³³ Saut sidak: "Kami tuk kenturun Abraham, ndai suah jadi hamba sapa-sapa, jadi tipa Nuan madah kami tau mendeka?" ³⁴ Jekuh Yesus ngau sidak: "Aku madah kitak, tiap urang te mulah dusa, ya hamba dusa. ³⁵ ngau hamba ndai selampur nugau de rumah, tapi Anak nugau de rumah selampur. ³⁶ Jadi, antik Anak nyuruh kitak merdeka, kitak bebenar merdeka." ³⁷ "Aku ketau, kitak kenturun Abraham, tapi kitak berusaha kak munuh Aku empadai firman Aku ndai sik pengkerang alam kitak. ³⁸ Nama te Ku pedaka entang Apai yak me te Ku padah, ngau piak ugak kitak pulah tentang nama te kitak dinga re apai kitak." ³⁹ Saut sidak ngau Ya: "Apai kami Abraham." Jekuh Yesus ngau sidak: "Antik sekira kitak anak-anak Abraham, tentu me kitak mulah kereja te depulah Abraham. ⁴⁰ Tapi te kitak kereja yak berusaha kak munuh Aku; Aku, urang te madah ke kebenar ngau kitak, kebenar te Ku dinga re Allah; kerja te upa yak, ndai dekereja ke ulih Abraham. ⁴¹ Kitak ngereja ke kereja apai kitak." Saut sidak: "Kami ndai delahir ke re zinah. Apai kami sikuk, Allah." ⁴² Jekuh Yesus ngau sidak: "Antik Allah yak Apai kitak, kitak bakal ngasih Aku empadai Aku keluar ngau datai re Allah. Ngau Aku datai bukai ngau penatai Ku kedirik, tapi Ya te ngutus Aku. ⁴³ Nama sebab kitak ndai nsaruk anai Ku? Empadai kitak ndai dapat nangkap firman Ku. ⁴⁴ Iblis yak me apai kitak, ngau kitak kak ngereja penekak apai kitak. Ya yak mek pemunuh mensia mulai re peruba ngau ndai idup alam kebenar, empadai alam ya ndai sik te benar. Antik ya banai bulak, yak penekak ya, empadai ya pemulak, ngau apai semua bulak. ⁴⁵ Tapi empadai Aku madah ke te benar ngau kitak, kitak ndai pecayak ngau Aku. ⁴⁶ Sapa dentara kitak te tau merik bukti antik Aku mulah dusa? Antik Aku madah ke te benar, nama kitak ndai pecayak ngau Aku? ⁴⁷ Barangsapa berasal re Allah, ya ninga firman Allah; nyak nyuruh kitak ndai ninga ke yak, empadai kitak ndai berasal re Allah." ⁴⁸ Urang-urang Yahudi nyaut Yesus: "Ndai mek kenak antik kami madah Nuan urang Samaria te kesarung sitan?" ⁴⁹ Saut Yesus: "Aku ndai kesarung sitan, tapi Aku ngehurmat Apai Ku, ngau kitak ndai ngehurmat Aku. ⁵⁰ Taki Aku ndai ngegak hurmat bagi Aku: bisik sikuk na te ngegak yak, ngau Ya sik ngakim. ⁵¹ Aku mdah kitak: "Barangsapa nunak ke firman Aku, ya ndai ngasai maut sampai sebila bila." ⁵² Jekuh urang-urang Yahudi ngau Ya: "Pituk kami ketau, Nuan kesarung sitan. Empadai Abraham dah mati, piak ugak naabi-nabi tapi Mih banai: "Barang saapa nunak firman Aku, ya ndai ngasai maaut sampai sebila-bila. ⁵³ Bisik me Mih lebih besai re apai kita Abraham, te udah mati, ngau nabi-nabi sik udah mati; ngau sapa Mih nyama ke dirik?" ⁵⁴ Saut Yesus: "Antik Aku memulia ke dirik Aku kedirik, maka kemulia yak sikit sik ndai sik reti. Apai me te memulia ke Aku, tentang sapa kitak banai: YA yak Allah kami, ⁵⁵ padahal kitak ndai ngelala YA, tapi Aku ngelala YA. Antik Ku madah Ku ndai ngelala YA, rete Aku pengampur upa kitak, tapi Aku ngelala YA ngau Aku nunak firman YA. ⁵⁶ Abraham apai kitak gaga ya bakal medak ariKu ngau ya dah medak ngau gaga." ⁵⁷ Jekuh urang-urang Yahudi ngau Ya: "Umur Mih pan sampai limak puluh taun ngau Mih dah medak Abraham?" ⁵⁸ Jekuh Yesus ngau sidak: "Aku madah kitak, seapan Abraham jadi, Aku dah bisik." ⁵⁹ Udek sidak ngamik batu, desempalung ngau Ya; tapi Ya ayap nudi ke Bait Allah.