Yesus angkat ke Yerusalem untuk ari raya Langkau Daun ¹ Udah yak Yesus bejalai ngelingik Galilea, Ya ngai seruntik nugau de Yudea, empadai din urang Yahudi berusaha kak munuh Ya. ² Rama yak dah damping ari raya urang Yahudi, ari raya Langkau Daun. ³ Jekuh menyadik-menyadik Yesus ngau Ya: "Angkat na retuk ke Yudea kin, isak murid-murid Mih medak ugak pempulah-pempulah Mih. ⁴ Empadai ndai sik urang te ngereja utai ara te ndai depedak, antik ya ining kak depedak urang mayuh. Antik Mih mulah hal-hal upa yak, padah ke dirik ngau urang." ⁵ Empadai menyadik-menyadik Ya sik ndai pecayak ngau Ya. ⁶ Saut Yesus ngau sidak: "Masa Ku apan senta, tapi untuk kitak bisik seruntik. ⁷ Denia ndai tau ngemencik kitak, tapi ngemencik Aku, empadai Aku besaksi tentang ya, kalau kerja-kerja ya jaik. ⁸ Angkat em kitak ke gawai yak, Aku pan angkat lau, empadai Ku pan senta." ⁹ Piak me jekuh Ya ngau sidak, udek Ya tetap nugau de Galilea. ¹⁰ Tapi udah menyadik-menyadik Yesus angkat, Ya angkat ugak kiak, ndai nampak, sunyik-sunyik na. ¹¹ Urang-urang Yahudi ngegak Ya de gawai yak ngau banai: "Dini Ya?" ¹² Mayuh bisik sidak tentang Ya te kenak dinga. Bisik te madah: "Ya urang baik." Bisik ugak te madah: "Ndai, Ya nyesat ke rakyat." ¹³ Tapi ndai ugak bisik urang te berani banai kayah tentang Ya empadai takut ngau uraang Yahudi. ¹⁴ Rama ketengaha gawai, Yesus tamak ke Bait Allah udek ngajar diak. ¹⁵ Nyuruh urang Yahudi iran udek banai: "Tipa urang tuk bulih penumut tapi ndai belajar!" ¹⁶ Saut Yesus ngau sidak: "Ajaran Ku ndai berasal re Aku, tapi re Ya te ngutus Aku. ¹⁷ Sapa te kak ngereje penekak YA, ya ketau entah ajaran Ku tuk berasal re Allah ataupun re dirik Aku. ¹⁸ Barangsapa banai re dirik ya kedirik, ya ngegak hormat untuk dirik ya, tapi barangsapa ngegak hurmat bagi YA te ngutus, ya benar, ndai sik bulak ntang ya. ¹⁹ Bukai nama Musa te dah merik ukum Taurat ngau kitak? Tapi ndai sik sikuk dentara kitak ngereja ukum Taurat yak. Nama kitak berusaha munuh Aku?" ²⁰ Urang mayuh yak nyaut: "Mih kesarung sitan; sapa te kak munuh Mih?" ²¹ Saut Yesus ngau sidak: "Cuma sutik pempulah te Ku kereja ngau kitak dah iran. ²² Jadi: Musa netap ke isak kitak besunat - sebenar sunat yak ndai berasal re Musa, tapi re akik inik kita - ngau kitak nyunat urang pada ari Sabat! ²³ Antik urang nerimak sunat pada ari Sabat, isak nang ngelangar ukum Musa, nama kitak luat ngau Aku, empadai Aku nyemuh ke seluruh tubuh sikuk mensia pada ari Sabat. ²⁴ Nang ngukum menurut nama te nampak, tapi ukumlah ngau adil." ²⁵ Urang Yerusalem banai: "Bukai mek Ya tuk te kak debunuh sidak? ²⁶ Ngau pedak, Ya banai bebas (leluasa) ngau sidak ndai sik madah ke nama-nama ngau Ya. Patut ndai kira pemimpin kita benar-benar dah ketau antik Ya tuk Kristus? ²⁷ Tapi tentang urang tuk kita ketau reni asal Ya, tapi antik Kristus datai, ndai sik urang te ketau reni asal Ya." ²⁸ Waktu Yesus ngajar de Bait Allah, Ya madah: "Mimang Aku kitak kelala ngau kitak ketau reni asal-Ku; tapi Aku datai bukai ngau penekak Aku, tapi Aku d'utus Ya te benar te ndai kitaak kelala. ²⁹ Aku ngelala YA, empadai Aku datai re YA, ngau YA me te ngutus Aku." ³⁰ Sidak berusaha nangkap Ya, tapi ndai sik sikuk te neguk Ya, empadai apan senta. ³¹ Tapi de'entara urang mayuh yak, mayuh te pecayak ngau Ya: "Antik Kristus datai, patut ndai kira Ya mulah mujizat te mayuh repada te depulah Ya tuk?" ³² Urang-urang Farisi ninga urang mayuh bebisik hal tentang Ya, nyak nyuruh imam-imam kepalak ngau urang-urang Farisi nyuruh penyaga-penyaga Bait Allah untuk nangkap-Ya. ³³ Maka saut Yesus: "Sekejap gik Aku tamai kitak, udah yak Aku angkat ngau YA te udah ngutus Aku. ³⁴ Kitak bakal ngegak Aku, tapi kitak ndai betemu ngau Aku, empadai kitak ndai tau datai ke penugau Aku." ³⁵ Urang-urang Yahudi yak banai sama direk: "Kini Ya angkat, sampai kita ndai tau betemu ngau Ya? Bisik nama maksud Ya kak angkat ngau sidak te merantau, de'entara urang Yunani, untuk ngajar urang Yunani? ³⁶ Nama maksud anai Ya: Kitak bakal ngegak Aku, tapi kitak ndai betemu ngau Aku, ngau: Kitak ndai tau datai ke tempat penugau Aku?" ³⁷ De puncak ari raya yak Yesus bediri udek banai: "Barangsapa aus, baik ya datai ngau Aku ngau minum! ³⁸ Barangsapa pecayak ngau Aku, upa te depadah ulih Kitab Suci: Re alam ati ati ya bakal ngalir alur-alur aik idup." ³⁹ Te demaksud ke Ya yak Roh te kaak deterimak sidak te pecayak ngau Ya; empadaai Roh yak pan datai, empadai Yesus apan demulia ke. ⁴⁰ Bisik urang dentara urang mayuh diak te ninga anai yak, banai: "Ya tuk bebenar nabi te kak datai." ⁴¹ Te bukai madah: "Te bukai banai: "Ya tuk Mesias." Tapi te bukai agik madah: "Bukai, Mesias ndai datai re Galilea! ⁴² Empadai Kitab Suci madah, Mesias berasal re kenturun Daud ngau re kampung Betlehem, penugau Daud subak." ⁴³ Nyak nyuruh timul banatah dentara urang mayuh empadai Ya. ⁴⁴ Bisik sidak te kak nangkap Ya, tapi ndai sik te tekik neguk Ya. ⁴⁵ Udek bala penyaga yak angkat ngau imam-imam kepala ngau urang-urang Farisi, te banai ngau sidak: "Nama kitak ndai ngemaik Ya?" ⁴⁶ Saut bala penyaga yak: "Pan suah bisik mensia banai upa urang yak!" ⁴⁷ Saut urang Farisi ngau sidak: "Kitak desesat ke ugak? ⁴⁸ Bisik ndai dentara pemimpin-pemimpin te pecayak ngau Ya, atau dentara urang-urang Farisi? ⁴⁹ Tapi urang mayuh yak te ndak ngelala ukum Taurat, tekutuk sidak!" ⁵⁰ Nikodemus, urang dentara sidak, te subak suah datai ngau Ya, banai ngau sidak: ⁵¹ "Ukum Taurat kita tau ngukum urang seapan ninga ya ngau seapan urang ketau nama te depulah Ya?" ⁵² Saut sidak: "Nama mih urang Galilea ugak? Selidik ke Kitab Suci ngau mih bakal ketau bahwa ndai sik nabi datai re Galilea." ⁵³ udek sidak pulai ke langkau direk masing-masing,