Yesus merik makai limak ribu urang ¹ Udah yak Yesus angkat ke seberang danau Galilea, danau Tiberias. ² Urang mayuh begerumung nurut Ya, empadai sidak medak mujizat-mujizat penyemuh te depulah Ya teradap urang-urang pedih. ³ Yesus naik kaatau bukit ngau murid-murid Ya. ⁴ Ngau Paskah, ari raya urang Yahudi dah damping. ⁵ Rama Yesus medak sekelingik yak, Ya medak urang mayuh begerumung datai ngau Ya, udek Ya banai ngau Filipus: "Dini kita tau meli ruti, isak sidak yak tau makai?" ⁶ Hal yak depadah Ya untuk nguji ya, Ya dah ketau nama te kak depulah Ya. ⁷ Saut Filipus ngau Ya: "Ruti serega dua ratus dinar ndai cukup untuk sidak yak, sekalikpun sidak bulih sutik te mit." ⁸ Sikuk re bala murid Ya, Andreas menyadik Simon Petrus, banai ngau Ya: ⁹ "Dituk bisik nemiak te mpu limak ruti jelai ngau dua ikuk ikan; tapi kini kedatai ngau urang pememayuh tuk?" ¹⁰ Jekuh Yesus: "Suruh sidak yak duduk." Diak mayuh rumput. Udek sidak duduk, kekira limak ribu urang bakas. ¹¹ Udek Yesus ngamik ruti yak, ngucap sukur ngau magi-magi ke ruti yak ngau sidak te duduk diak, piak ugak Ya mulah ikan yak, sepenekak sidak pemayuh. ¹² Udah sidak kenyang Ya banai ngau murid-murid Ya: "Kumpul ke sisak lebih, isak ndai sik te debuai." ¹³ Udek dekumpul sidak, penuh dua belas igik bakul ngau sisak ruti jelai. ¹⁴ Rama sidak medak mujizat te depulah Ya, sidak banai: "Ya tuk bebenar Nabi te kak datai k'alam denia." ¹⁵ Empadai Yesus ketau, bahwa sidak datai kak ngemaik paksa Ya untuk dejadi ke raja, Ya angkat ke bukit kedirik. ¹⁶ Rama ari dah kak malam, bala amurid Yesus angkat ke danau, udek naik perau ¹⁷ ngau nyemerang ke Kapernaum. Rama ari dah keleman Yesus pan ugak datai ngau sidak, ¹⁸ laut ketengah begelumang empadai ribut kayah. ¹⁹ Udah sidak bekayuh kekira dua tiga mil penyauh, sidak medak Yesus bejalai atau aik minik perau sidak. Nyuruh sidak takut bebebnar. ²⁰ Tapi Ya banai ngau sidak: "Tuk Aku, nang takut!" ²¹ Sidak kak ngatung Ya kalam perau, sekelin yak ugak sidak datai ke pantai. ²² Ari sutek, urang mayuh te agik dudi de seberang, medak ndai sik perau bukai re perau te sutik tadik, ngau Yesus ndai sik tamai bala murid naik ke perau, cuma murid-murid ya na te angkat. ²³ Tapi sementara yak bisik perau bukai re Tiberias damping tempat sidak te makai ruti, udah Tuhan ngucap syukur. ²⁴ Rama urang mayuh medak Yesus ngau bala murid ndai sik diak, sidak naik ke perau udek angkat ke Kapernaum untuk ngegak Yesus. Roti hidup ²⁵ Rama urang mayuh nemu Yesus de seberang laut yak, sidak banai ngau Ya: "Rabi, sebila Nuan datai kituk?" ²⁶ Yesus nyaut sidak: "Aku madah kitak, sebenar kitak ngegak Aku bukai empadai kitak medak kecelik-kecelik, tapi empadai kitak dah makai ngau kitak kenyang. ²⁷ Bekerja lah bukai untuk pemakai te tau benasa, tapi untuk pemakai te tan sampai idup kekal, te deberik ke Anak Mensia ngau kitak: empadai Ya mek te de'sah ke Apai, ngau meterai-YA." ²⁸ Udek jekuh sidak ngau Ya: "Nama te kalah kami pulah, isak kami ngereja ke nama te dekedekak Allah?" ²⁹ Saut Yesus ngau sidak: "Tuk mek kereja te dekedekak Allah, kitak kalah pecayak ngau Ya te d'utus Allah." ³⁰ Jekuh sidak ngau Ya: "Kecelik nama te Nuan pulah isak kami medak sereta pecayak ngau Nuan? Kereja nama te Nuan pulah? ³¹ Inik akik kami udah makai manna de padang pasir, upa bisik tetulis: Sidak deberik Ya makai ruti re surga." ³² Jekuh Yesus ngau sidak: "Aku madah kitak, bukai Musa te merik kitak ruti re surga, tapi Apai Ku te merik kitak ruti te benar re surga. ³³ Empadai ruti te re Allah yak ruti te turun re surga ngau te merik idup ngau denia." ³⁴ Udek jekuh sidak ngau Ya: "Tuhan, berik kami ruti yak seruntik." ³⁵ Jekuh Yesus ngau sidak: "Aku tuk ruti idup; barangsapa datai ngau Aku, ya ndai lapar agik, barangsapa pecayak ngau Aku, ya ndai aus agik. ³⁶ Tapi Aku dah banai ngau kitak: Biar mek kitak dah medak Aku, kitak ndai pecayak. ³⁷ Semua te deberik ke Apai ngau Aku, bakal datai ngau Aku, ngau barangsapa te datai ngau Aku, ya ndai bakal Ku buai. ³⁸ Empadai Aku turun re surga bukai untuk mulah penekak Aku, tapi ngereja penekak YA te ngutus Aku. ³⁹ Ngau tuk mek penekak Ya te ngutus Aku, isak ke nama te deberik Ya ngau Aku nang sampai ayap, tapi isak Ku bangkit ke rama kebaduk zaman. ⁴⁰ Empadai tuk mek penekak Apai Ku, isak setiap urang, te medak Anak ngau te pecayak ngau Ya bulih idup kekal, ngau isak Aku ngemangkit ke ya rama kebaduk zaman." ⁴¹ Nyak nyuruh urang Yahudi ngerungut tentang Ya, empadai Ya madah: "Aku tuk me ruti te dah turun re surga." ⁴² Jekuh sidak: "Bukai me Ya tuk Yesus, anak Yusuf, te apai inai Ya kita kelala? tipa Ya tau madah: Aku dah turun re surga?" ⁴³ Saut Yesus ngau sidak: "Nang kitak ngerungut. ⁴⁴ Ndai sik urang te tau datai ngau Aku, antik ya ndai detarik Apai te ngutus Aku, ngau ya Ku bangkit ke rama kebaduk zaman. ⁴⁵ Bisik tetulis alam kitab nabi-nabi: "Ngau sidak semua bakal d'ajar Allah. Ngau tiap urang te dah ninga ngau nerimak pengajaran re Apai, datai ngau Aku. ⁴⁶ Hal yak ndai bereti bisik urang te udah medak Apai. Cuma Ya te datai re Allah te dah medak Apai. ⁴⁷ Aku madah kitak: "Barangsapa pecayak, ya bulih idup kekal. ⁴⁸ Aku me ruti idup. ⁴⁹ Inik akik kitak dah makai manna de padang pasir ngau sidak dah mati. ⁵⁰ Tuk mek ruti te turun re surga: Barangsapa makai ruti yak, ya ndai bakal mati. ⁵¹ Aku mek ruti idup te turun re surga. Antik urang makai ruti tuk, ya bakal idup sampai page lusak, ngau ruti te Ku berik yak mek dagin Ku, te bakal Ku berik untuk idup denia." ⁵² Urang-urang Yahudi betangkap sama direk ngau banai: "Tipa Ya tau merik dagin Ya ngau kita untuk demakai" ⁵³ Saut Yesus ngau sidak: "Aku madah kitak, antik kitak ndai makai dagin Anak Mensia ngau ngirup darah Ya, ndai sik idup alam dirik kitak. ⁵⁴ Barangsapa makai dagin Ku ngau ngirup darah Ku, ya bisik idup kekal, ngau Aku bakal ngemangkit ke ya rama kebaduk zaman. ⁵⁵ Empadai dagin Ku bebenar pemakai ngau darah Ku bebenar minuman. ⁵⁶ Barangsapa makai dagin Ku ngau ngirup dagin Ku , ya nugau alam Ku, ngau Aku alam ya. ⁵⁷ Sama upa Apai te idup ngutus Aku ngau Aku idup ulih Apai, piak ugak barangsapa te makai Aku, bakal idup ulih Aku. ⁵⁸ tuk mek ruti te turun re surga, bukai ruti upa te demakai inik akik kitak ngau sidak dah mati. Barangsapa makai ruti tuk, ya bakal idup sampai page lusak." ⁵⁹ Semua yak depadah Yesus de Kapernaum rama Ya ngajar de rumah ibadat. ⁶⁰ Udah ninga semua yak, mayuh re murid-murid Yesus te banai: "Anai tuk keras, sapa te sangup ninga?" ⁶¹ Yesus te alam ati Ya ketau, murid-murid Ya ngerungut tentang hal yak, banai ngau sidak: "Bisik nama anai tuk nguncang ke iman kitak? ⁶² Ngau tipa antik kitak medak Anak Mensia naik ke tempat Ya nugau peruba? ⁶³ Roh me te merik idup, dagin sama sekalik ndai sik guna. Anai te Ku padah ngau kitak yak me roh ngau idup. ⁶⁴ Tapi dentara kitak bisik te ndai pecayak." Empadai re peruba Yesus dah ketau sapa te ndai pecayak, ngau sapa te nyerah ke Ya. ⁶⁵ Udek Ya banai: "Nyak nyuruh Aku dah banai ngau kitak: Ndai sik urang te tau datai ngau Aku, antik bukai Apai te merik ngau ya." ⁶⁶ Mulai re yak mayuh murid-murid Ya baduk tamai Ya. ⁶⁷ Jekuh Yesus ngau kedua belas murid Ya: "Kitak ndai kak angkat ugak?" ⁶⁸ Saut Simon Petrus ngau Ya: "Tuhan, ngau sapa kami kak angkat? Anai Nuan yak idup te kekal; ⁶⁹ ngau kami dah pecayak ngau ketau Nuan yak te Kudus re Allah." ⁷⁰ Saut Yesus ngau sidak: "Bukai me Aku kedirik te dah milih kitak dua belas tuk? Tapi sikuk d'entara kitak yak Iblis." ⁷¹ Te demaksud ke Ya yak Yudas, anak Simon Iskariot; empadai ya yak me te nyerah ke Yesus, ya mek sikuk dentara sidak dua belas murid.