Anai ngau inuk Samaria ¹ Rama Tuhan Yesus dah ketau, bahwa urang-urang Farisi dah ninga, bahwa Ya bulih ngau bemanik murid lebih mayuh re Yohanaes ² - walaupun Yesus ndai bemanik, tapi murid-murid Ya, ³ Ya nudi ke Yudea ngau bekalih agik ke Galilea. ⁴ Ya kalah ngelintas daerah Samaria. ⁵ Ya datai ke kuta de Samaria te benama Sikhar, damping tanah te deberik Yakub subak ngau anak ya te benama Yusuf. ⁶ Diak bisik kulam Yakub. Yesus letih bebenar empadai pejalai Ya, nyak nyuruh Ya duduk de sisi kulam yak. Ari kekira jam dua belas. ⁷ Bisik inuk Samaria datai kiak, kak nimak aik. Jekuh Yesus ngau ya: "Berik Aku minum." ⁸ Empadai murid-murid Ya dah ke kuta meli pemakai. ⁹ Jekuh inuk Samaria yak ngau Ya: "Tipa Nuan urang Yahudi mintak minum ngau aku urang Samaria?" (Empadai urang Yahudi ndai begaul ngau urang Samaria.) ¹⁰ Saut Yesus ngau ya: "Antik dik ketau tentang karunia Allah ngau sapa Urang te banai ngau dik: Berik Aku minum! dik dah mintak ngau Ya, ngau Ya dah merik ngau dik aik idup." ¹¹ Jekuh inuk yak ngau Ya: "Tuhan, Nuan ndai sik penimak, kulam tuk dalam; re'ni Nuan bulih aik idup yak? ¹² Bisik me Nuan lebih besai re apai kami Yakub, te merik ke kulam tuk ngau kami, ngau te dah minum kedirik aik tuk, ya sereta anak-anak ngau pengidup pengumpan (ternak) ya?" ¹³ Saut Yesus ngau ya: "Barangsapa minum aik tuk, ya aus agik, ¹⁴ Tapi barangsapa minum aik te Ku berik ngau ya, ya ndai bakal aus agik sampai page lusak. Aik te Ku berik ngau ya, bakal jadi mata aik alam dirik ya, te mancar seruntik sampai ngau idup te kekal." ¹⁵ Jekuh inuk yak ngau Ya: "Tuhan, berik aku aik yak, isak aku ndai aus agik ngau ndai sah nimak aik kituk." ¹⁶ Jekuh Yesus ngau ya: "Angkat kin, kumai laki dik datai kituk gik." ¹⁷ Jekuh inuk yak: "Aku ndai sik laki." Jekuh Yesus ngau ya: "Benar jekuh dik, bahwa dik ndai sik laki, ¹⁸ empadai dik dah bisik limak laki, ngau te pitok yak bukai laki dik. Alam hal tuk dik banai benar." ¹⁹ Jekuh inuk yak ngau Ya: "Tuhan, nyata ngau aku bahwa Nuan surang nabi. ²⁰ Puyang jagang kami nyemah datau bukit tuk, tapi Nuan madah, bahwa Yerusalem mek tempat nyemah." ²¹ Jekuh Yesus ngau ya: "Pecayak na ngau aku ui inuk, datai senta bahwa kitak nyemah Apai bukai de bukit tuk ngau bukai ugak de Yerusalem. ²² Kitak nyemah nama te ndai kitak kelala, kami nyemah nama te kami kelala, empadai keselamatan datai re bansa Yahudi. ²³ Tapi bisik masa datai, ngau udah datai pituk, bahwa penyemah-penyemah benar bakal nyemah Apai alam roh ngau kebenar; empadai Apai kak ngau penyemah-penyemah te upa yak. ²⁴ Allah yak Roh ngau barangsapa nyemah-YA kalah nyemah alam roh ngau kebenar." ²⁵ Saut inuk yak ngau Ya: "Aku ketau bahwa Mesias yak kak datai, te detelah Kristus yak; antik Ya datai, Ya merik ke semua utai ngau kami." ²⁶ Jekuh Yesus ngau ya: "Aku tuk me Ya, te ketengah banai ngau dik." ²⁷ Rama yak bala murid-muris Ya datai, sidak iran medak Ya banai ngau urang inuk. Tapi ndai sik te banai: "Nama te kedekak Nuan? atau: Nama te dekampur ke Nuan ngau ya?" ²⁸ Inuk ya nudi ke tepayan ya diak, udek angkat ke kuta, udek banai ngau urang-urang diak: ²⁹ "Buh, pedak! Din bisik urang te madah ngau aku bala utai te suah kupulah. Amang Ya yak Kristus?" ³⁰ Udek sidak lalu angkat keluar kuta udek datai ngau Yesus. ³¹ Sementara yak, murid-murid Ya ngemaik Ya makai, jekuh sidak: "Rabi, makai am." ³² Tapi Ya banai ngau sidak: "Entang Aku bisik pemakai te ndai kitak kelala." ³³ Nyak nyuruh bala murid banai sama direk: "Bisik nama urang datai ngau Ya maik pemakai?" ³⁴ Jekuh Yesus ngau sidak: "PemakaiKu yak ngereja penekak YA te ngutus Aku ngau betemuk kereja YA. ³⁵ Bukai mek kitak te madah: Empat bulan agik rama ngetam? Tapi Ku madah kitak: "Pedak sekelingik kitak, bala uma dah kunyit, tumai deketam. ³⁶ Pitok pengetam dah nerimak upah, ya ngumpul ke buah untuk idup kekal, nyak nyuruh te tanam ngau te ngetam sama-sama gaga. ³⁷ Alam hal tuk benar perenguh urang: Sikuk nanam, sikuk mutik asil. ³⁸ Aku ngutus kitak mutik asil te bukai usaha kitak; urang berusaha nanam, kitak datai mutik asil usaha sidak." ³⁹ Mayuh urang Samaria re kuta yak dah pecayak ngau Ya empadai inuk yak te besaksi: "Ya madah ngau aku nama semua te udah ku pulah." ⁴⁰ Rama bala urang Samaria datai ngau Yesus, sidak mintak Yesus nugau tamai sidak, udek dua ari Yesus nugau tamai sidak. ⁴¹ Udek lebih mayuh agik uraang te pecayaak ngau Ya empadai anai Ya, ⁴² sidak banai ngau inuk yak: "Kami pecayak bukai agik empadai ninga gisah dik, tapi empadaai kami dah ninga kedirik, kami ketau kalau Ya yak benar-benar Juruselamaat denia." ⁴³ Dah dua ari yak Yesus angkat ke Galilea, ⁴⁴ empadai Yesus kedirik dah besaksi, antik nabi ndai dehormat de tempat asal ya. ⁴⁵ Udah Ya datai ke Galilea, urang-urang Galilea nyamut Ya, empadai sidak dah medak semua te depulah Yesus de Yerusalem rama gawai, empadai sidak bisik de gawai yak. ⁴⁶ Yesus bekalih agik ke Kana de Galilea, dini Ya mulah aik jadi anggur. Ngau de Kapernaum bisik pegawai istana te anak ya ketengah pedih. ⁴⁷ Rama ya ninga, kalau Yesus dah datai re Yudea ke Galilea, ya angkat ngau Ya udek mintak isak Yesus datai nyemuh ke anak ya, empadai anak ya kak mati. ⁴⁸ Jekuh Yesus ngau ya: "Antik mih ndai medak kecelik ngau mujizat, mih ndai pecayak." ⁴⁹ Jekuh pegawai istana yak ngau Ya: "Tuhan, Nuan kalah datai seapan anakku mati." ⁵⁰ Jekuh Yesus ngau ya: "Angkat am, anak mih idup!" Urang yak pecayak ke nama te jekuh Yesus, udek ya angkat. ⁵¹ Rama ya ketengah de jalai, anak buah ya datai ngemaik peluluk, kalau anak ya idup. ⁵² Ya nanayak sidak mulai jama berapa anak ya semuh. Saut sidak: "Kemarik jam satu tengah ari tabin ya ayap." ⁵³ Udek tekingat mek ya ke anai Yesus: "Anak mih idup." Udek ya ngau semua menyanak ya pecayak. ⁵⁴ Yak mek kecelik kedua te depulah Yesus rama Ya pulai re Yudea ke Galilea.