Anai ngau Nikodemus ¹ Bisik urang Farisi te benama Nikodemus, Ya pemimpin agama Yahudi. ² Ya datai ngau Yesus rama malam, udek banai: "Rabi, kami ketau bahwa Nuan datai sebagai guru te d'utus Allah; empadai ndai sik urang numut mulah kecelik te depulah Nuan antik Allah ndai nyereta ya." ³ Saut Yesus: "Aku madah mih, antik urang ndai delahir ke agik, ya ndai dapat medak kerajaan Allah." ⁴ Jekuh Nikodemus ngau Ya: "Tipa urang delahir ke agik, antik ya udah tuai? Tau me ya tamak k'alam perut inai udek delahir ke agik?" ⁵ Saut Yesus: "Ku madah mih, antik urang ndai delahir ari aik ngau Roh, ya ndai tau tamak kalam kerajaan Allah. ⁶ Nama te delahir ke re dagin, ya dagin, nama te delahir ke re Roh, ya Roh. ⁷ Nang mih iran ninga ku madah: urang kalah delahir ke agik. ⁸ Ribut ngesuh kini ya kak, ngau mih ninga ingan ya, tapi mih ndai ketau re'ni penatai ngau kini tuju e. Piak ugak hal ngau tetiap urang te delahir re Roh." ⁹ Saut Nikodemus: "Tipa tau piak?" ¹⁰ Saut Yesus: "Mih pengajar Israel, tipa mih ndai nyaruk hal-hal yak? ¹¹ Aku madah mih, kami banai ke nama te kami ketau, ngau kami besaksi tentang nama te kami pedak, tapi kitak ndai nerimak kesaksian kami. ¹² Kitak ndai pecayak rama ku banai tentang hal-hal deniawi, tipa kitak tau pecayak antik Ku banai hal-hal surgawi? ¹³ Ndai sik urang te udah naik ke Surga, selain re urang te dah turun re Surga, yak me Anak Mensia. ¹⁴ Upa Musa ningik ke ular de padang pasir, piyak ugak Anak Mensia kalah detingik ke, ¹⁵ isak ke urang te pecayak ngau Ya bulih idup kekal. ¹⁶ Empadai besai kasih Allah ngau denia tuk, nyak nyuruh Ya merik ke Anak tungal Ya, isak tiap urang te pecayak ngau Ya ndai benasa, tapi bulih idup kekal. ¹⁷ Empadai Allah ngutus Anak YA kalau denia bukai untuk ngukum denia, tapi untuk nyelamatke ya ulih YA. ¹⁸ Barangsapa te pecayak ngau Ya, ndai kenak ukum; tapi barangsapa ndai pecayak, ya nugau de babah ukum, empadai Ya ndai pecayak alam nama Anak tungal Allah. ¹⁹ Tuk ya ukuman ya: Terang dah datai k'alam denia, tapi mensia lebih nyan keleman repada terang, empadai pempulah-pempulah sidak jaik. ²⁰ Empadai barangsapa mulah pengenyaik, ya ngemencik terang, ndai kak datai ngau terang yak, isak pempulah-pempulah ya te jaik ndai kenak pedak; ²¹ tapi barangsapa mulah te benar, ya datai ngau terang isak pempulah-pempulah ya te benar alam Allah jadi nampak (nyata)." ²² Udah yak Yesus ngau murid-murid Ya angkat ke tanah Yudea, Ya nugau din tamai sidak ngau bemanik urang. ²³ Tapi Yohanes sik bemanik urang ugak de Ainon, damping Salim, empadai diak mayuh aik, ngau bala urang datai kiak untuk depanik, ²⁴ empadai rama yak Yohanes apan detepuk k'alam penyara. ²⁵ Maka timul peselisih dentara murid-murid Yohanes ngau urang Yahudi tentang pemasuk (penyucian). ²⁶ Udek sidak datai ngau Yohanes, banai ngau ya: "Rabi, urang te tamai nuan de seberang sungai Yordan ngau te tentang Ya nuan dah merik kesaksian, Ya bemanik (membaptis) ugak, ngau semua urang datai ngau Ya." ²⁷ Saut Yohanes: "Ndai sik urang te tau ngamik nama-nama bagi dirik ya, antik ndai deberik ke ngau ya re surga. ²⁸ Kitak tau merik kesaksian, kalau aku suah banai: Aku bukai Mesias, tapi aku d'utus ngenulau Ya. ²⁹ Te empu mempelai inuk yak mempelai bakas; tapi kaban mempelai bakas, te bediri damping ya ngau te ninga ke ya, matang gaga bebenar ninga ingan mempelai bakas yak. Yak mek pengaga aku, pituk pengaga ku penuh. ³⁰ Ya kalah makin besai tapi aku kalah makin mit. ³¹ Sapa te datai re atau, ya datau semua utai; sapa te datai re tanah (bumi) banai ngau basa bumi. Sapa te datai re surga, datau semua utai. ³² Ya merik kesaksian tentang nama te depedak Ya, ngau nama te dedinga Ya, tapi ndai sik urang te ninga ke kesaksian Ya yak. ³³ Sapa te nerimak kesaksian Ya yak, ya ngakuk bahwa Allah tuk benar. ³⁴ Empadai sapa te dutus Allah, Ya mek te nyampai ke firman Allah, empadai Allah merik ke Roh Ya ngau ndai tebatas. ³⁵ Apai ngasih Anak ngau dah nyerah ke semua utai ngau Ya. ³⁶ Barangsapa pecayak ngau Anak, ya bulih idup kekal, tapi barangsapa ndai taat ngau Anak, ya ndai bakal medak idup, melain ke peluat Allah bisik seruntik atau ya."