Kawin de Kana ¹ Pada ari ketiga, bisik gawai kawin de Kana, Galilea, ngau inai Yesus bisik diak; ² Yesus ngau murid-murid Ya d'unang ugak ke gawai yak. ³ Rama sidak kurang anggur, inai Yesus banai ngau Ya: "Sidak abis anggur." ⁴ Jekuh Yesus ngau ya: "Inai kak nyuruh Aku nama? Aku pan senta." ⁵ Tapi inai Yesus banai ngau bala pelayan: "Pulah na nama te depadah ngau kitak!" ⁶ Diak bisik desiap ke enam igik tepayan ngau masuk (pembasuhan) menurut adat urang Yahudi, masing-masing isik e dua tiga buyung. ⁷ Yesus banai ngau bala pelayan diak: "Isik tepayan-tepayan yak ngau aik sampai penuh." Sidak menuh ke tepayan-tepayan yak ngau aik. ⁸ Udek jekuh Yesus ngau sidak: "Pitok yak dekauk, baik ngau pemimpin gawai." Udek debaik sidak. ⁹ Udah pemimpin gawai ngasai aik te dah jadi anggur yak, ya ndai ketau reni penatai, tapi pelayan-pelayan te ngauk aik yak ketau- ya ngumai pengantin bakas, ¹⁰ udek banai ngau ya: "Tiap urang ngentang ke anggur te baik lau, dah puas urang minum, baruk dentang ke anggur te ndai beradu baik; tapi mih naruh anggur te baik sampai pituk." ¹¹ Hal yak depulah Yesus de Kana, Galilea, sebagai tan'a Ya te peruba, ngau piak Ya dah nyata ke kemuliaan Ya, ngau murid-murid Ya pecayak ngau Ya. ¹² Udah yak Yesus angkat ke Kapernaum tamai inai, menyadik, ngau murid Ya, ngau sidak nugau diak cuma berapa ari na. ¹³ Rama ari raya Paskah urang Yahudi udah damping, Yesus angkat ke Yerusalem. ¹⁴ Alam Bait Suci depedak Ya pedagang-pedagang lembu, kaming, domba ngau merpati, ngau penukar-penukar duit duduk diak. ¹⁵ Ya mulah penyipat (cambuk) re tali udek ngusir sidak semua re Bait Suci ngau bala kaming domba; duit penukar-penukar d'amur Ya ke tanah, ngau mija-mija sidak debalik ke Ya. ¹⁶ Ya banai ngau pedagang-pedagang merpati: "Amik semua yak retuk, nang kitak mulah rumah Apai Ku ngau tempat bejual." ¹⁷ Maka bala murid Ya tekingat ke nama te bisik tetulis: "Cinta untuk rumah NUAN ngalak ke Aku." ¹⁸ Urang-urang Yahudi nentang Yesus, jekuh Ya: "Kecelik nama te tau deberik Mih ngau kami, Mih tau mulah te layu yak?" ¹⁹ Saut Yesus ngau sidak: "Rerak Bait Allah tuk, alam tiga ari Aku diri ke agik." ²⁰ Udek jekuh urang Yahudi ngau Ya: "Empat puluh enam taun urang niri ke Bait Allah tuk, mungkak Mih tau mulah alam tiga ari?" ²¹ Tapi te demaksud ke Ya ngau Bait Allah yak tubuh Ya. ²² Udek seudah Ya bangkit dentara urang mati baruk mek murid-murid Ya tekingat antik hal yak udah depadah Ya, udek sidak pecayak ngau Kitab Suci ngau bala anai Yesus. ²³ Sementara Ya de Yerusalem selamak ari raya Paskah, mayuh urang pecayak alam nama Ya, empadai sidak dah medak bala kecelik te depulah Ya. ²⁴ Tapi Yesus ndai pecayak ke sidak, empadai Ya ketau semua sapa sidak, ²⁵ empadai ndai perelu urang merik kesaksian ngau Ya tentang mensia, Ya dah ketau nama te alam ati mensia.