Roh Allah ngau roh antikristus ¹ Bala menyadi te kukasih, nang kitak pecayak ngau semua roh, tapi roh-roh yak kalah duji lau, berasal re Allah atau bukai; empadai mayuh nabi-nabi pelsu pansut ngau angkat de sekamat denia. ² Upa yak mek kita ngelala Roh Allah: tiap roh te ngaakuk Yesus Kristus dah datai sebagai mensia, berasal re Allah, ³ ngau tiap roh te ndai ngakuk Yesus, ndai berasal re Allah. Roh yak antikristus, tentang ya dah kitak dinga, bahwa ya bakal datai, pituk dah bisik alam denia. ⁴ KItak berasal re Allah, anak-anakku, kitak dah ngalah ke nabi-nabi pelse; empadai roh te alam kitak lebih besai repada roh alaam denia. ⁵ Sidak yak berasal re denia, empadai sidak banai tentang hal-hal deniawi, ngau denia ninga ke sidak. ⁶ Kami berasal re Allah: Barangsapa ngelala Allah, ia ninga ke kami; barangsapa ndai berasal re Allah, ia ndai ninga ke kami. Yak mek kecelik roh kebenaran ngau roh te nyesat. ⁷ Bala menyadikku te kukasih, buh kita sama kasih ke pangan, empadai kasih yak berasal re Allah; tiap urang te ngasih, lahir re Allah, ngau ngelala Allah. ⁸ Barangsapa ndai ngasih, ya ndai ngelala Allah, empadai Allah yak kasih. ⁹ Alam hal tuk mek kasih Allah denyata ke detengah-tengah kita, bahwa Allah dah ngutus Anak tungal Ya kalam denia, isak kita bulih idup. ¹⁰ Tuk mek kasih yak: Bukai kita te dulau ngasih Allah, tapi Allah te dulai ngasih kita ngau cara ngutus Anak Ya sebagai penamai (pendamaian) bagi dusa-dusa kita. ¹¹ Bala menyadik te kukasih, antik Allah dah sampai ngasih kita upa yak, maka kita matang kalah ngasih sama pangan. ¹² Ndai sik urang te suah medak Allah. Antik kita sama ngasih pangan, Allah nugau alam kita, ngau kasih Ya sempurna alam kita. ¹³ Upa yak mek kita ketau, kalau kita nugau alam Ya, Ya alam kita: Ya dah ngarunia ke kita bulih bagi alam roh Ya. ¹⁴ Kami dah medak ngau besaksi, Apai dah ngutus Anak Ya jadi Juruselamat denia. ¹⁵ Barangsapa ngakuk Yesus Anak Allah, Allah tetap bisik alam ya ngau ya alam Allah. ¹⁶ KIta dah ngelala ngau udah pecayak kasih Allah ngau kita. Allah yak kasih, barangsapa nugau alam kasih, ia nugau alam Allah ngau Allah alam ya. ¹⁷ Alam hal tuk me kasih Allah sempurna alam kita, antik kita bisik keberanian pecayak pada ari pengakiman, empadai sama ngau Ya, kita bisik ugak alam denia tuk. ¹⁸ Alam kasih ndai sik te ketakut: kasih te sempurna munuh penakut; empadai penakut bisik ukum, ngau barangsapa takut, ya ndai sempurna alam kasih. ¹⁹ Kita ngasih empadai Allah udah dulau ngasih kita. ²⁰ Antik urang madah: "Aku ngasih Allah," tapi ya ngemencik menyadik ya, berete ya pengampur, empadai sapa te ndai ngasih menyadik te depedak ya, ndai patut ya ngasih Allah te ndai depedak. ²¹ Perintah tuk kita terimak re Ya: Barangsapa ngasih Allah, ya kalah ngasih menyadik ya ugak.