Iman ngalah ke denia ¹ Tiap urang te pecayak, Yesus Kristus lahir re Allah; ngau tiap urang te ngasih Ya (Allah) te beranak ke, ngasih ugak Ya (Yesus) te deperanak berasal re Ya (Allah). ² Tuk kecelik kalau kita ngasih anak-anak Allah, antik kita ngasih Allah ngau ngereja ke semua perintah Ya. ³ Tuk mek bentuk kasih kita ngau Allah, kita ngereje ke perintah Ya. Perintah-perintah Ya ndai berat, ⁴ empadai semua te lahir re Allah ngalah ke denia. Tuk mek kemenangan te ngalah ke denia: iman kita. ⁵ Sapa te ngalah ke denia, bukai re urang te pecayak, antik Yesus yak Anak Allah? ⁶ Tuk mek Ya te datai ngau aik ngaau darah, Kristus Yesus, bukai cuma ngau aik na, tapi ngau aik ngau daraah. Roh mek te merik kesaksian, empadai roh yak benar. ⁷ Empadai tiga te merik kesaksian (alam surga: Apai, Firman ngau Roh Kudus; ketiga yak sutik. ⁸ Bisik tiga te merik kesaksian de bumi: Roh, aik, darah, ketiga yak sutik. ⁹ Kita nerimak kesaksian mensia, tapi kesaksian Allah lebih kuat. Empadai upa yak mek kesaksian Allah tentang Anak Ya. ¹⁰ Barangsapa pecayak ke Anak Allah, alam dirik ya bisik kesaksian yak; barangsapa ndai pecayak ngau Allah, ya mulah Ya (Allah) jadi pengampur, empadai ya ndai pecayak ngau kesaksian te depadah ke Ya tentang AnakYa. ¹¹ Tuk mek kesaksian yak: Allah dah nganugerah ke idup kekal ngau kita, idup yak bisik alam Anak Ya. ¹² Barangsapa bisik empu Anak, ya ngempu idup; barangsapa ndai ngempu Anak,ya ndai empu idup. ¹³ Semua tuk kutulis ke ngau kitak, isak kitak pecayak ngau nama Anak Allah, ketau kalau kitak bisik idup kekal. ¹⁴ Tuk mek keberani kita pecayak ngau Ya, bahwa Ya ngabul ke doa kita, antik kita minta utai te sesuai ngau penekak Ya. ¹⁵ Antik kita ketau, Ya ngabul ke nama te depintak kita, maka kita ketau ugak, kalau kita bulih semua utai te depintak kita ngau Ya. ¹⁶ Antik bisik urang medak menyadik ya bebuat dosa te ndai natai ke maut, ya kalah bedoa ngau Allah, Ya (Allah) merik ke idup ngau ya, sidak te bedosa tadik te. Bisik dosa te ndai natai ke maut: tentang tuk ndai kupadah, ya cuma kalah bedoa. ¹⁷ Semua pempulah jaik adalah dosa, tapi bisik dosa te ndai natai ke maut. ¹⁸ Kita ketau bahwa setiap urang te lahir re Allah, ndai mulah dosa; tapi Ya (Yesus) te lahir re Allah ngelinuk ya, te jaik (si jahat) ndai dapat neguk (menjamah) ya. ¹⁹ Kita ketau bahwa kita berasal re Allah, ngau seluruh denia nugau debabah kuasa jahat. ²⁰ Tapi kita ketau bahwa Anak Allah dah datai, ngau merik pemahaman ngau kita, isak kita ngelala te benar, ngau kita bisik alam te benar, alam Anak Ya Yesus Kristus. Ya Allah te benar ngau idup kekal. ²¹ Anak-anakku, waspadalah teradap semua berhala (nyemah nyungkun te bukai Allah).